Anar Eyvazov antiterror tədbirlərindən sonra mülki obyektlərdə çox sayda silah-sursat aşkarlandığını açıqladı
Antiterror tədbirlərindən sonra işğaldan azad edilmiş ərazilərdə yerləşən mülki obyektlərdə çoxlu sayda silah və hərbi sursat aşkarlanıb.
Bunu Müdafiə Nazirliyinin mətbuat katibi Anar Eyvazov Azərbaycan Xarici İşlər Nazirliyi və Azərbaycan Müdafiə Nazirliyi tərəfindən ölkəmizdə akkreditə olunmuş diplomatik korpusun nümayəndələri və hərbi attaşelər üçün təşkil olunan brifinqdə deyib.
Anar Eyvazov qeyd edib ki, Azərbaycan beynəlxalq təşkilatların diqqətini Ermənistan Silahlı Qüvvələrinin silah tədarükünə çəkməyə davam edir.
Onun sözlərinə görə, Ermənistan Silahlı Qüvvələri mülki şəxslər üçün hərbi məqsədlə dronlardan istifadə üzrə təlimlər keçib. "44 günlük müharibədən sonra işğaldan azad edilmiş ərazilərdə 10 mindən çox piyada əleyhinə və 3 mindən çox tank əleyhinə minalar aşkarlanıb. Sentyabrın 19-da keçirilən antiterror tədbirləindən əvvəl bu rayonlara qanunsuz yolla silah daşınmağa davam edilib. Bundan başqa, Ermənistan Silahlı Qüvvələri Azərbaycanın hərbi və mülki infrastrukturuna zərbələr endirmək məqsədilə mülki şəxslər üçün dronlardan istifadə üzrə təlimlər keçib", - o deyib.
