Delimitasiyanın Tavuşdan başlanması təsadüfi qərar deyildi - Əliyev mətləbləri açdı...
Məhərrəm Zülfüqarlı: “Birinci belə bir təkliflə ilin əvvəlində Prezident Əliyev çıxış edib”
Prezident İlham Əliyev ADA Universitetində keçirilən “COP29 və Azərbaycan üçün Yaşıl Baxış” mövzusunda beynəlxalq forumda sərhədlərin delimitasiyasının Qazax-Tavuş sərhəddindən başlamasını belə izah etdi:
“Delimitasiyanın Qazaxın işğal olunmuş kəndlərindən başlanması bizim təklifimiz idi. Biz Ermənistan tərəfinə dedik, əgər onlar həqiqətən də nümayiş etdirmək istəyirlərsə ki, bu istiqamətdə irəliləməyə hazırdırlar, bunu etməlidirlər. Çünki bu kəndlər məskunlaşmış kəndlərdir, mübahisə obyekti ola biləcək məskunlaşma olmayan təpələr deyil. Orada azərbaycanlılar məskunlaşmışdılar və kəndlər işğal edilmişdi”.
Dövlət başçısı qeyd edib ki, eksklavlar məsələsi başqadır: “Çünki onlar daha mürəkkəbdir və digər ölkənin əhatə etdiyi ərazidə yerləşir. Buna görə onlara delimitasiya prosesində baxılmalıdır. Düşünürəm ki, hər iki tərəf, yəni iki Delimitasiya Komissiyası növbəti addımlar üzərində razılığa gəlməlidir. Biz həmin məsələyə ayrıca epizod kimi baxılmasını istəmirik və delimitasiya işini davam etdirmək istəyirik”.
Üstəlik, hələ bu ilin əvvəlində Prezident Əliyev yerli telekanallara müsahibəsində demişdi ki, bizim anklav olmayan kəndlərimiz qeyd-şərtsiz qaytarılmalıdır. Yerdə qalan ekslav kəndlərimizin taleyinə isə delimitasiya prosesində baxılacaq. Bu kəndlərlə bağlı ayrıca işçi qrupları yaradıla bilər ki, məsələ həll olunsun. Bir sözlə, delimitasiyanın Qazax-Tavuş sərhədindən başlaması Prezidentin ideyasıdır və ADA-dakı tədbirdə də buna ətraflı izah verdi.
“Artıq Ermənistan da bu reallıqlarla barışmağın fərqindədir”
Sözügedən məsələ ilə bağlı “Bakı-Xəbər”ə açıqlama verən AVCİYA-nın vitse-prezidenti, professor Məhərrəm Zülfüqarlı hesab edir ki, hazırkı üstün mövqedə olmağımızın səbəbi 44 günlük Vətən müharibəsindəki qələbəmizdir: “Bu qələbələr, o cümlədən 19-20 sentyabr 2023-də keçirilən antiterror əməliyyatları olmasaydı, ermənilər öz havadarları vasitəsilə bizi işğalla barışmağa vadar etməyə çalışardılar. Ona görə də belə bir vəziyyəti biz heç vaxt yaddan çıxarmamalıyıq. 2019-cu ilin avqustinda Paşinyan “Qarabağ Ermənistandır” deyirdi. Ermənilər nəinki Qarabağı, işğal etdikləri ətraf 7 rayonu belə qaytarmaq istəmirdilər. Hətta Ermənistanın ovaxtkı müdafiə naziri Tonoyan 2019-cu ildə ABŞ-da səfərdə olarkən yeni ərazilərin işğalından dəm vururdu. Nikol Şuşanın Cıdır düzündə “Yallı” gedirdi. İndi isə Paşinyan deyir ki, biz əfsanələri yaddan çıxarmalıyıq. Ona görə də qələbəmiz çox şeyi dəyişib. Bütün bunlarla yanaşı, Prezident İlham Əliyev doğru olaraq qeyd etdi ki, birinci işğal altında olan Qazaxın eksklav olmayan kəndləri azad edilməlidir. Qazaxdan başlayan delemitasiya tədbirləri çərçivəsində eksklav kəndlərin məsələsi də öz həllini tapmalıdır. Birinci belə bir təkliflə ilin əvvəlində Prezident Əliyev çıxış edib. Artıq Ermənistan da bu reallıqlarla barışmağın fərqindədir. Bu günlərdə sərhəd kəndlərdə olan Nikol Paşinyan da qeyd etdi ki, sözügedən ərazilər Azərbaycana məxsus olduğu üçün təhvil verməliyik. Təhvil verməsək, dövlətçiliyimizi itirə bilərik. Bu, düzgün mövqedir, amma ermənilər mübadilədən bəhs edir. Anklav olan Kərkini Başkəndə dəyişmək istəyirlər. Görünən odur ki, SSRİ dağılarkən mövcud sərhədlər daxilində iki ölkə bir-birinin ərazi bütövlüyünü tanımaqla saziş imzalaya bilər”.
Vidadi ORDAHALLI
