Ucqar kəndlərimizin hamısında bankomatlar niyə yoxdur?..
Əkrəm Həsənov: “Azərpoçt”un səlahiyyətləri genişləndirilməlidir ki, bu problem öz həllini tapa bilsin”
Günümüzün tələbinə uyğun olaraq, müavinət, təqaüd və maaşlar fərdi bank kartlarına köçürülür və kim nə vaxt, nə qədər istəsə, bankomatlara yaxınlaşıb lazım olan məbləği nağdlaşdıra bilər. Lakin bir çox kənd və qəsəbələrdə sakinlər üçün bu imkan məhduddur, çünki bankomat çatışmazlığından əziyyət çəkənlər var.
Kartından vəsait çıxarmaq istəyən şəxs bunun üçün ya uzaq məsafə qət etməli, ya da pulu yaxınlıqdakı digər bankın bankomatından çıxararaq əlavə komissiya ödəməli olur.
“Tələb çox, bankomat azdırsa, bu o deməkdir ki, bank öz xidmətlərinin əlçatanlığını təmin etmir”
Məlum məsələ ilə bağlı fikir bildirən bank sahəsi üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, bu problem maliyyə xidmətlərinə əlçatanlığı çətinləşdirir: “Məlumdur ki, bankomatları yalnız bank yerləşdirir. Hazırda ölkəmizdə 23 bank var. Təəssüf ki, bankların sayı get-gedə azalır. Bankların ucqar ərazilərdə, kəndlərdə filialı yoxdur. Banklara ucqar ərazilərdə filial və ya bankomat saxlamaq sərf etmir. Kənd ərazilərində olan bankomatlara pul daşımaq banklar üçün əlavə xərc sayılır. Banklar özəl kommersiya qurumudur, bu səbəbdən də onlar üçün əsas mənfəətdir. Hansısa kənd və ya rayonda mənfəət yoxdursa onlar fəaliyyət göstərməyəcək. Ümumiyyətlə, tələb çox, bankomat azdırsa, bu o deməkdir ki, bank öz xidmətlərinin əlçatanlığını təmin etmir”.
Ekspert hesab edir ki, bu məsələ “Azərpoçt” vasitəsilə həll olunmalıdır: “Məlumdur ki, “Azərpoçt”un hər kənddə, qəsəbədə şöbəsi var və bu gün də maliyyə xidməti göstərir. “Azərpoçt”un səlahiyyətləri genişləndirilməlidir ki, bu problem öz həllini tapa bilsin. Ümumiyyətlə, məlum problemin həll olunmasında aidiyyəti qurumlar da maraqlı olmalıdır. Əhalinin vəziyyəti nəzərə alınmalıdır. Yaşlı şəxs pensiyasını çıxarmaq üçün başqa bir əraziyə gedir, bu isə sərfəli deyil”.
Günel CƏLİLOVA
