Üç ölkə İrəvanı, ya ATƏT PA-nı boykot etdi?..
- Mirkazım Seyidov: “Bütün bunları bölgənin əsas gücləri olan Rusiya və Türkiyə yaxşı dərk etdiyi üçün belə boykot qərarını veriblər”
Azərbaycan nümayəndə heyəti ATƏT Parlament Assambleyasının (AƏTƏT PA) İrəvanda keçirilən payız sessiyasında iştirak etməyib. Maraqlıdır ki, Azərbaycanla yanaşı Türkiyə və Rusiya da iclasda iştirakdan imtina edib.
Ermənistan tərəfi Azərbaycanın iştirak etməməsini güya bizim təhlükəsizlikdən narahat olduğumuzla izah etməyə çalışıb. Ermənistan rəsmiləri hətta bizim nümayəndə heyətinin təhlükəsizliyinə təminat verdiklərini də bəyan ediblər. Ancaq Azərbaycanın açıqladığı mövqedən və quruma üzv olan iki böyük ölkənin iştirakdan imtinası bu boykotun təhlükəsizliklə bağlı olmadığını üzə çıxarmış olur. Üç ölkə eyni anda İrəvanda keçirilən tədbirdə iştirakdan imtina etməklə dünyaya hansı mesajı vermiş olub?
Müstəqil siyasətçi Mirkazım Seyidov “Bakı-Xəbər”ə açıqlamasında bildirdi ki, Azərbaycan bununla bağlı rəsmi mövqeyini açıqlayıb: “Həmin mövqedə Azərbaycan tərəfinin Ermənistanda ölkəmizə qarşı hökm sürən düşmənçilik və nifrət hissindən, özünü qabarıq şəkildə büruzə verən anti-Azərbaycan təbliğatı və azərbaycanofobiyadan narahatlıq ifadə olunub. Bu il aprelin 14-də keçirilən beynəlxalq idman tədbiri zamanı bu ölkənin baş naziri Nikol Paşinyanın gözləri önündə Azərbaycan bayrağına qarşı edilən hörmətsizlik, Ermənistan parlamentinin üzvləri, jurnalistlər, bloqerlər tərəfindən bu cinayət əməlini törədən şəxsin dərhal azad edilməsi ilə bağlı mitinqin təşkili Azərbaycan ictimaiyyətində haqlı narazılıq yaradıb. Azərbaycan nümayəndə heyətinin iştirak edə bilmədiyi payız sessiyasında ölkəmizlə bağlı hər hansı məsələnin müzakirəsi doğru olmazdı. Ancaq orada belə bir hazırlıq gedirdi. Toplantı Səmərqənddə keçirilməli idi, lakin 2023-cü ilin fevralında Özbəkistan hökuməti bundan imtina etdi. Ermənistanın ATƏT-dəki nümayəndə heyətinin rəhbəri Sarkis Xandanyanın isə sessiyanın İrəvana köçürülməsi təklifi qəbul edildi. İrəvanda sessiyanın keçirilməsi Nikol Paşinyanın xarici siyasətdəki kəskin dəyişikliyinin mükafatıdır. Ukrayna hadisələri fonunda Paşinyanın getdikcə artan Qərbpərəst siyasəti, sülh danışıqları üçün Amerika və Avropa platformalarına üstünlük verməsi, Zəngəzur dəhlizinə nəzarəti Rusiya Federasiyasına verməkdən imtinasının müqabilində İrəvana jest edilib. Çox güman ki, Rusiyanın tədbirdən imtinası da bununla bağlıdır.
ATƏT PA Ermənistanın mühüm anti-Azərbaycan tribunasına çevrilib. Qurum özünün payız sessiyasını Ermənistanda keçirmək qərarı ilə beynəlxalq ictimaiyyətin diqqətini Cənubi Qafqaza yönəltmək məqsədi güdür. Məqsəd diqqəti bilavasitə Ermənistan ətrafında cəmləşdirməkdir. Ölkənin məzlum obrazını canlandırmaq başlıca xətti təşkil edir. Guya ölkə Cənubi Qafqazda demokratiya qalasıdır və əgər dünya həmrəylik göstərməsə, bu qala yad qüvvələr tərəfindən dağıdılacaq. ATƏT PA-nın İrəvanda sessiya keçirmək məntiqi eyni zamanda Ermənistanın anti-Rusiya siyasətinin təzahür formasıdır. Faktiki olaraq, İrəvan özünün açıq tekstlə Rusiya əleyhinə söyləməyə cəsarət etmədiklərini ATƏT-in deputatlarının dili ilə gündəmə gətirməyə çalışır. Bütün bunları bölgənin əsas gücləri olan Rusiya və Türkiyə yaxşı dərk etdiyi üçün belə boykot qərarını veriblər”.
Məhəmmədəli QƏRİBLİ
