Bəhruz Quliyev: "8 Noyabr Qələbə paradı Azərbaycan dövlətinin, Silahlı Qüvvələrin gücünün göstəricisidi"
Noyabrın 8-də Xankəndidə qələbə paradının keçiriləcəyi haqda yayılan məlumatlar Ermənistanda kədərlə qarşılanıb. Erməni separatizminin ləğvindən sonra Xankəndidə hərbi parad hazırlığı Ermənistanda isteriya ilə qarşılanır. Bununla bağlı yayılan məlumatlar erməniləri əməllicə məyus edib.
Xankəndidə planlaşdırılan paradla bağlı informasiyanı tirajlayan Ermənistan mediası buna görə Paşinyan hakimiyyətini və Qarabağda ləğv edilmiş separatçı rejimin "rəhbərlərini" kəskin tənqid edir. Ölkə mediası paradı Paşinyan hakimiyyətinin 2018-ci ildən sonra həyata keçirdiyi siyasətin məntiqi sonluğu olaraq şərh edib. "Hraparak" nəşri isə paradda Prezident İlham Əliyevin iştirakını xüsusilə vurğulayıb. Görünən odur ki, Xankəndidə parad söhbətləri Ermənistanı şoka salıb.
"Bu o deməkdir ki, yaratdıqları qondarma rejim də sabun köpüyü kimi göyə sovruldu"
Sözügedən məsələ ilə bağlı fikirlərini "Bakı-Xəbər"lə bölüşən "SƏS" Media Qrupunun rəhbəri, politoloq Bəhruz Quliyevin fikrincə, Xankəndidə keçiriləcək parad Azərbaycanın qüdrətini ortaya qoyur: "Noyabrın 8-də - Zəfər Günündə Xankəndidə keçirilməsi planlaşdırılan Qələbə paradı bir daha Azərbaycanın gücünü ortaya qoyur. İlk növbədə qeyd etmək istərdim ki, bu parad bizim üçün qürur mənbəyidir. Çünki biz 30 ildən sonra bu ana nail olduq. Ali Baş Komandan, Prezident İlham Əliyevin də vurğuladığı kimi, "Nəyi, necə, nə vaxt etmək lazımdır, bunu mən bilirəm. Yaxın tarix dəfələrlə bunu göstərib, həm siyasi müstəvidə, diplomatik müstəvidə, eyni zamanda, döyüş meydanında. Nəyi ediriksə, dəqiqliklə edirik". Şübhəsiz ki, bu fikirlərin təsdiqini bugünədək aparılan siyasət, atılan addımlar, o cümlədən sentyabrın 27-dən başlayan əks-hücum əməliyyatlarında gördük. Ali Baş komandanımızın göstərişləri, düzgün taktikaları sayəsində tezliklə Qarabağımızı işğaldan azad etdik və azad edilmiş hər bir rayonda Azərbaycan Bayrağı sancıldı".
Politoloq hesab edir ki, Xankəndidə keçirilməsi planlaşdırılan Qələbə paradı Azərbaycan dövlətinin, Silahlı Qüvvələrinin gücünün göstəricisidir: "Təbii ki, düşmən tərəfinin bu proseslərə nə kimi don geyindirəcəyi artıq onların öz işidir. Heç kimə sirr deyil ki, bu, Azərbaycan dövləti və xalqı üçün ən böyük bayramlardan biridir. Bu gün Qarabağ və Şərqi Zəngəzur sürətlə bərpa olunur və işğaldan azad edilmiş ərazilərimizdə kompleks yenidənqurma işləri gündən-günə genişlənir. Bu istiqamətdə qısa müddətdə əldə edilən uğurlar bir daha təsdiq edir ki, Qarabağ və Şərqi Zəngəzur tezliklə əvvəlki şöhrətini özünə qaytaracaq və cənnətə çevriləcək. Ermənistan mətbuatında isə hələ də, təəssüflər olsun ki, o dövrkü separatçıların tənqidlərinə söykənən yazılar dərc edilməkdədir. Amma bütün bunlara rəğmən, həmin o separatçı rejimin rəhbərləri bu gün Azərbaycan Dövlət Təhlükəsizliyi Xidmətinin zirzəmisində gün saymaqla məşğuldurlar. Bu o deməkdir ki, onlar gec-tez öz layiqli cəzalarını aldılar və yaratdıqları qondarma rejim də sabun köpüyü kimi göyə sovruldu. Noyabrın 8-də keçirilməsi planlaşdırılan hərbi paradda Prezident İlham Əliyevin iştirak edəcəyi, qələbə mərasiminin daha sonra Şuşada davam etdiriləcəyi haqda artıq məlumatlar vardır. Cənab Prezident İlham Əliyev bu addımı ilə bir daha bütün dünyaya və Ermənistana göstərdi ki, o əsl Liderdir və hər yerdə xalqının, ordusunun önündədir. Məhz əməlləri ilə də sübut etdi ki, Azərbaycan haqlı tərəf idi, ölkəmizin atdığı addımların hər biri ədalətə və hüquqa söykənir. Bu gün biz dünyada mövcud olan münaqişələri, eləcə də həmin proseslərdə müharibənin şərtlərinin (Ukrayna-Rusiya, İsrail-Fələstin və s.) necə pozuluğunu görürük. Amma Ali Baş Komandan İlham Əliyevin müdrikliyi ondan ibarət idi ki, heç bir dinc sakinə toxunmamaq şərtilə separatçılara qarşı müharibə apardı və onlar təslim olmağa məcbur qaldı".
Vidadi ORDAHALLI
