İrəvanın satın aldığı 24 avropalı deputat özlərini büruzə verdi...
Məhəmməd Əsədullazadə: "Bu kimi variantlarla çalışırlar ki, Ermənistana Fransa təhlükəsizlik zəmanəti versin"
Avropa Parlamentindən növbəti həyasızlıq. Avropa Parlamentinin müxtəlif fraksiyalarından olan 24 deputatdan ibarət qrup Avropa Komissiyasının rəhbəri Ursula Fon der Lyayen və ABŞ dövlət katibi Entoni Blinkeni Ermənistanın təhlükəsizliyini təmin etməyə çağırıb.
Bununla bağlı ünvanlanan çağrışda qeyd olunur ki, Ermənistan Azərbaycan tərəfindən təhdid edilir və ona yubanmadan təhlükəsizlik qarantiyaları verilməlidir: "Azərbaycan Ermənistanı uydurma təxribatlarda ittiham edərək ona qarşı döyüşkən ritorikasını nümayiş etdirməkdən əl çəkmir. Eyni zamanda, Rusiya Ermənistanı Avropaya yönəldiyinə görə cəzalandırmaq üçün səbəb axtarır. Biz demokratiyaya təhdidlərə reaksiyasız qala bilmərik və əminik ki, Ermənistan qonşuları ilə sülh şəraitində yaşamaq və öz yolunu seçməkdən başqa heç nə axtarmır".
"Müxtəlif fraksiyalarından olan 24 deputatdan ibarət qrupun müraciəti bunun göstəricisidir"
Sözügedən məsələni "Bakı-Xəbər"ə şərh edən politoloq Məhəmməd Əsədullazadənin fikrincə, belə qərəzli çağrışlar prinsipcə gözlənilən idi: "Ona görə ki, Avropa Parlamenti deputatları hər zaman Azərbaycana qarşı qərəzli olublar. Xüsusən də orada olan fransız əsilli deputatlar bu məsələdə xüsusi canfəşanlıq göstərirlər. O baxımdan yenidən ortalığı qızışdırmaq istəyən dairələr var. İrəli sürülən arqumentlərin heç bir əsası yoxdur. Birincisi, Azərbaycan Ermənistanın təhlükəsizliyini təhdid etmir. Azərbaycan hər zaman Ermənistana sülh əlini uzadır. Ümumiyyətlə, Ermənistan və Fransa mətbuatı, guya Azərbaycanın Rusiya ilə birlikdə hərəkət etdiyini iddia edirlər. Bütün bunlar tamamilə absurddur. Aparılan yalan kampaniyasının bir hissəsidir. Bütün bunlar Fransa və Ermənistan mətbuatının Azərbaycana qarşı apardıqları birgə kampaniyadır. İkincisi, Azərbaycanla Ermənistan arasında artıq delimitasiya və demarkasiya ilə bağlı razılıq əldə olunub. Yaxın günlərdə prosesin başlayacağı gözlənilir. Aprelin 5-də keçirilən məlum Brüssel görüşündə təhlükəsizliklə bağlı məsələlər barəsində ictimaiyyətə geniş açıqlama verilməsə də, hesab edirəm, orada bununla bağlı müəyyən bir razılıq əldə olunub. Görünür, bu kimi variantlarla çalışırlar Ermənistana Fransa təhlükəsizlik zəmanəti versin. Hesab edirəm ki, bu kimi məsələlər, Avropa Parlamentinin çağırışları birbaşa sülhə mane olur. Çünki 30 il ərzində Ermənistan Azərbaycana qarşı birbaşa işğalçılıq siyasəti aparırdı. Ancaq buna baxmayaraq, Avropa Parlamentinin səsi çıxmırdı. İndi isə bunlar hamılıqla Ermənistana qahmar çıxırlar. Birbaşa olaraq sülh danışıqlarına mane olur və prosesi sabotaj etməyə çalışırlar. Avroparlamentdə müxtəlif fraksiyalarından olan 24 deputatdan ibarət qrupun müraciəti də bunun göstəricisidir".
Vidadi ORDAHALLI
