Yaxın Şərqdə gərginlik daha da artır, İsrail İranın nüvə bazalarını vura bilər - MÜMKÜN SSENARİLƏR...
Dünən İran tarixdə ilk dəfə İsrailə hücum etdi. Gecə saatlarında başlayan kamikadze dron hücumundan sonra İsrailə raketlər də atıldı. Təl-Əviv hücumu uğurla dəf etdiklərini açıqlayıb, İran isə əməliyyatın uğurlu keçdiyini iddia edib. Hücumdan sonra Tehran İsrailin onlara hücum etmədiyi təqdirdə növbəti hücum planlarının olmadığını açıqlayıb. İranın İsrailə qarşı hücum əməliyyatından sonra İsrail hələ ki, Tehrana necə reaksiya verəcəyi ilə bağlı qərar verməyib. Xarici media yazır ki, bu gün keçiriləcək Hərbi Nazirlər Kabinetinin iclasında İsrailin İrana cavabı müzakirə olunacaq.
İranın İsrailə pilotsuz uçuş aparatları (PUA) və ballistik raketlərlə hücumu ilə bağlı açıqlama verən İsrailin xarici işlər naziri Yisrael Katz bildirib ki, İsrailin İrana hücum qərarı hələ də qüvvədədir. Katz bildirib ki, onların iki məqsədi var: İnqilab Keşikçiləri Korpusunu (SEPAH) “terror təşkilatı” adlandırmaq və İrana çəkindirici sanksiyalar tətbiq etmək üçün təzyiq etmək. İsrailin Aliya (yəhudi köçü) və inteqrasiya naziri Ofir Sofer də deyib ki, İranın belə bir hücumu həyata keçirmək cəsarəti aradan qaldırılmalıdır.
İsrailin müdafiə naziri Yoav Gallant da deyib ki, ötən gecə Tehranın İsrailə hücumundan sonra İsraillə İsrail arasında münaqişə “hələ bitməyib”.
İsrailin təhsil naziri Yoav Kiş isə sosial media platformasında açıqlama verib və bildirib ki, İsrail Hərbi Hava Qüvvələri, hava hücumundan müdafiə qüvvələri, ABŞ və regional qüvvələrin dəstəyi ilə İranın hücumu nəzarət altına alınıb. Kiş İrana sakit və ağıllı cavab veriləcəyini deyərək, hücum vaxtının gəldiyini vurğulayıb.
Adı açıqlanmayan bir İsrail rəsmisi "New York Times" qəzetinə deyib ki, İsrailin istənilən cavabı “müttəfiqləri ilə razılaşdırılacaq”. Ekspertlər İsrailin bu qərarı ilə Yaxın Şərqdə gərginliyin daha da arta və vəziyyətin daha da pisləşə biləcəyinə diqqət çəkirlər.
BBC İsrailin İranın hərbi bazalarını hədəfə ala biləcəyini açıqlayıb. Hətta Təl-Əvivin daha da irəli gedə biləcəyi və ölkə daxilindəki böyük hərbi bazaları və SEPAH-ın təlim mərkəzlərini hədəfə ala biləcəyi və bu hücumların maddi ziyanla yanaşı, ölümlə də nəticələnə biləcəyi bildirilib.
İsrailin ən böyük qəzetlərindən biri olan “Jerusalem Post” Təl-Əvivin İrana qarşı mümkün hücumundan yazıb. Qəzet “İranın nüvə bazalarını vurmağa qərar versəy, nə olar?” sualını verib və bu hücumların artıq illərdir planlaşdırıldığını xatırladıb.
F-35-lərin radarda görünməməsi səbəbindən belə bir hücumun əslində İrana qarşı asanlıqla həyata keçirilə biləcəyini iddia edən "Jerusalem Post", döyüş təyyarələrinin Suriyanın şimalı, İraq və Fars körfəzi üzərində İranı hədəfə ala biləcəyini bildirib. İsrail ordusunun əsas məqsədinin İranın hava gücünü qırmaq olduğunu iddia edən qəzet, F-35-lər tərəfindən hava hücumundan müdafiə sistemləri məhv edildikdən sonra 1 tona qədər raket daşıya bilən F-15 və F-16 təyyarələrinin İrana hücum etməli olduğunu yazıb.
"F-15 və F-16-lar üçün ən əhəmiyyətli yerlərin İranın Fordo və Natanzdakı nüvə bazaları olduğu ifadə edilir. Kəşfiyyat məlumatlarına görə, Fordo bazası yerin təxminən 80 metr altında yerləşir. Bu ərazi İsrail-Həmas müharibəsinin əvvəlində ABŞ-dan alınmış və istifadəsi qadağan edilən “Bunker Cluster” raketi ilə asanlıqla partlatıla bilər. İsrail indiyədək bu raketdən HƏMAS-a qarşı bir neçə dəfə istifadə edib, lakin bölgədəki mülki insanlar da həyatını itirib" - “Jerusalem Post” yazır.
Bu arada, ABŞ prezidenti Baydenin İsrailin baş naziri Benyamin Netanyahuya ABŞ-ın İsrailin İrana qarşı əks-hücumunu dəstəkləməyəcəyini dediyi iddia edilir. Amerikanın CNN kanalına danışan adı açıqlanmayan yüksək vəzifəli məmurun sözlərinə görə, Bayden Netanyahu ilə telefon danışığında Vaşinqtonun mövqeyini açıqlayıb. Qeyd edilir ki, Bayden Netanyahuya ABŞ-ın İsraili tam dəstəklədiyini, ancaq İsrailin İrana qarşı heç bir əks-hücumunu dəstəkləməyəcəyini bildirib.
Qeyd edək ki, İsrail aprelin 1-də İranın Dəməşqdəki konsulluğunun binasına hava hücumu həyata keçirib. Hücum zamanı İran İnqilab Keşikçiləri Korpusundan 2-si general olmaqla, ümumilikdə 7 nəfər həlak olub.
İran bəyan etmişdi ki, İsrailin konsulluğuna hücum onun ölkə ərazisinə hücum deməkdir və onlar cavab verəcəklər. İsrail də İranın hücumlarına cavab verəcəyini bəyan edib.
Dünən İran yüzlərlə kamikadze pilotsuz uçuş aparatı, ballistik və qanadlı raketlərlə İsrailə hücum edib və bəzi hərbi hədəflərin vurulduğunu açıqlayıb.
İsrail bildirib ki, hücumların əksəriyyətinin qarşısı hava hücumundan müdafiə sistemləri tərəfindən alınıb, hücum zamanı ölkənin cənubdakı hərbi bazaya kiçik ziyan dəyib.
Tahir TAĞIYEV
