Fitrə pulu mübahisələrinə birdəfəlik son qoymaq olmaz?..
Tural İtfan: “Fitrə zəkatı indiki hesabla, dövrümüzün sosial vəziyyətinə görə adambaşına 5-15 manat arası ola bilər”
Ramazan ayı sona çatır. Aprelin 10-da Azərbaycanda Ramazan (Fitr) bayramının namazı qılınacaq. Bayram namazına qədər, yəni 1 gün əvvəl fitrə zəkatı çıxarılacaq, ehtiyacı olanlara yardım ediləcək.
Fitrə zəkatı bayram namazına qədər çıxarılmalıdır, çünki ondan sonra verilən zəkat adi sədəqə sayılır. Fitrə zəkatının miqdarı adambaşına üç kiloqram ərzaqla hesablanır. Yəni evdən hər bir ailə üzvünün adına üç kq müəyyən növ ərzaq çıxarmaq lazımdır.
Bu arada Qafqaz Müsəlmanları İdarəsinin (QMİ) fitrə zəkatının pulla hesablanmış məbləği barədə açıqlaması birmənalı qarşılanmayıb. QMİ tövsiyə edib ki, fitrə zəkatını pulla hesablayarkən adambaşına 10 manatdan götürmək məqsədəuyğundur: “İmkanı olanlar bu məbləğdən daha çox hesablaya bilərlər. Maddi durumunu normallaşdırmış, borcları olmayan, ailəsini dolandıra bilən insanlar mütləq fitrə zəkatı çıxarmalıdırlar”.
“Fitrəni ancaq pulla ölçmək düz deyil, kimin hansı ərzağa gücü çatsa, ondan versin, ya da onun məbləğini versin”
Sosial şəbəkələrdə isə Qafqaz Müsəlmanları İdarəsinin açıqlaması narazılığa səbəb olub. İnsanlar fitrə zəkatının adambaşına 10 manatdan hesablanmasını çox hesab edirlər. Bu onunla əsaslandırılır ki, hazırda buğdanın bir kq-ı 0,8-1,2 manatdırsa, ya da düyünün bir kq-ı 3-6 manatdırsa, QMİ niyə fitrə zəkatının minimum məbləğini 10 manatdan hesablayır?
İlahiyyatçı Tural İrfan “Bakı-Xəbər”ə açıqlamasında bildirdi ki, fitrə zəkatı oruc tutan, yaxud tutmayan, ailədəki hər adambaşına təqribən 2-3 kq arası xurma, kişmiş, pendir, qarabaşaq, arpa, buğda, darı, mərcimək, düyü kimi ərzaq növlərindən verilir: “Bu məhsullar daha çox istifadə edilir. Bu o demək deyil ki, başqa ərzaq növlərindən vermək olmaz. İstəyən ət məhsullarından, daha qiymətli ərzaqdan da verə bilər. Adıçəkilən məhsullar hədislərdə ona görə xatırlanıb ki, hamı verə bilsin, yaxud o dövrdə əsasən həmin ərazilərdə o məhsullar istifadə olunurdu. Ona görə bir neçə məhsulun adı çəkilib ki, kimin imkanı hansına çatsa, kimdə hansı məhsuldan olsa, ondan verə bilsin. Tutaq ki, buğdaya imkanı çatan buğdadan, kişmişə imkanı çatan da kişmişdən verər. Adambaşına minimum hədd 2-3 kq-dır. İllik qazancını ödəmək imkanında olan, krediti, borcu olmayan müsəlmanlara bu zəkat növü vacibdir. O miqdardan daha çox da vermək olar".
Həmsöhbətimizin sözlərinə görə, fitrə zəkatı indiki hesabla, dövrümüzün sosial vəziyyətinə görə adambaşına 5-15 manat arası ola bilər. İstəyən, imkanı olan, təbii ki, adam başına 50 manatlıq da fitrə verər. Onun savabı daha çox olar. Ərzaqların kateqoriyalara ayrılması insanları çaşdırmamalıdır: “Bəzən arpa, buğda, xurma, kişmiş deyirlər, möminlər də çaş-baş qalır ki, axı bunların qiyməti eyni deyil, necə edək? Ona görə bir daha xatırladım, bu kateqoriyalar, təsniflər ona görədir ki, kimin nümunə verilən bu və ya başqa halal ərzaqlardan hansına, hansının dəyərinə aid məbləğə gücü çatarsa elə ondan da, o qədər də versin. Problem budur ki, məlumat verənlər dininizim hökmünü düzgün, aydın şərh etmirlər. Fitrəni ancaq pulla ölçmək düz deyil. Kimin hansı ərzağa gücü çatsa, ondan versin, ya da onun məbləğini versin".
Günel CƏLİLOVA
