Ermənistanda 2 min nəfər "səfirlik ordusu" + 13 hərbi bioloji laboratoriya...
Sahil Kərimli: "ABŞ hərtərəfli, həm siyasi, həm iqtisadi, həm də hərbi baxımdan Ermənistanın iplərini tam əlinə almağa çalışır"
ABŞ-ın və Qərbin regionda göstərdiyi bütün fəallıqlar Ermənistan üzərindəndir. Bu özünü hətta hərbi mövcudluq səviyyəsində də göstərir. Ancaq ABŞ və Qərb bunu müxtəlif adlarla pərdələyir.
Məsələn, ABŞ-ın Ermənistanda 2 min nəfərlik səfirlik saxlaması buna misaldır. Bununla yanaşı Ermənistanda hazırda amerikalı hərbi instruktorların, Pentaqonun nəzarət etdiyi xüsusi hərbiləşdirilmiş strukturların olması da ciddi mətləblərdən xəbər verir. Bura ABŞ -ın Ermənistanda yaratdığı və sayı 13-ə çatan hərbi bioloji laborotoriyaları da aid edə bilərik.
ABŞ bu cür addımları ilə hansı niyyətləri güdür?
Siyasi şərhçi Sahil Kərimli "Bakı-Xəbər"ə açıqlamasında bildirdi ki, ABŞ, dünyanın hər yerində olduğu kimi, Cənubi Qafqaza da nüfuz etməyə çalışıb: "Özünü super güc, hegemon hesab edən, dünyanın jandarmeriyası kimi davranan ABŞ Cənubi Qafqazda da öz maraqlarını təmin etmək üçün bir çox siyasi gedişlər edir. Əlbəttə ki, bununla qarşısına qoyduğu hədəflərə çatmaq üçün Ermənistan kimi müstəqil olmayan, qətiyyətsiz rəhbərlərlə təmsil olunan bir ölkədən istifadə edir. Ermənistan, eyni zamanda, siyasətini işğalçılıq, terrorizm, separatizm kimi meyllər üzərində quran bir ölkə olub. Bu baxımdan da ABŞ-a bu tipli ölkələr daha çox sərf edir. Bununla ABŞ öz maraqlarına nail olmağa çalışır. Digər tərəfdən burada Rusiya amili də var. Məlum olduğu kimi, bu gün ABŞ, Qərb və Avropa İttifaqına daxil olan ölkələr dünyada qütbləşmə həyata keçirirlər. Rusiyaya qarşı çox sərt və ciddi müharibə elan olunub. Burada da Ukraynadan istifadə olunur, Ukrayna hərtərəfli silahlandırılır, maddi, iqtisadi yardımlar həyata keçirilir. Bununla da Qərb Ukraynadan istifadə edərək, Rusiyaya qarşı öz savaşını həyata keçirir. Eyni zamanda, Cənubi Qafqaza da Rusiya ilə Ermənistan üzərindən ciddi şəkildə nüfuz edir. Ermənistan daim Rusiyanın forpostu olan ölkə kimi tanınıb. Bu gün Qərb çalışır ki, Rusiyanın bölgəmizdəki varlığını sona gətirsin. Ona görə də Ermənistandan istifadə edir. Bu da Ermənistanda olan Rusiyanın hərbi bazalarının sıxışdırılıb çıxarılmasına, İrəvandakı hava limanından rus sərhədçilərinin çıxarılmasına gətirib çıxarır. Təbii ki, belə olduğu halda, ABŞ öz hərbi kontingentini Ermənistana yeritməlidir və bu istiqamətdə işlər həyata keçirilir. Xüsusilə də, ABŞ-ın Ermənistanda olan səfirliklərindəki nümayəndələrinin sayına baxsaq, kifayət qədər əyani şəkildə bunun şahidi olmuş olarıq. ABŞ hərtərəfli, həm siyasi, həm iqtisadi, həm də hərbi baxımdan Ermənistanın iplərini tam əlinə almağa çalışır. Buna da Ermənistan rəhbərliyi çox rahat imkan verir. Bu isə bölgəmiz üçün yaxşı heç nə vəd etmir, bölgədə ciddi təhlükələr yaradır. Ermənistan yeni revanşist, radikal meyllərə sürükləndirilir".
Məhəmmədəli QƏRİBLİ
