"Məndən xəbərsiz pensiyamı ləğv etdilər" - Xızı sakini nazirlikdən niyə narazıdır...
Yeganə Quliyeva: “...Heç bir əsas göstərilmədən atamın pensiyası kəsildi”
Bu günlərdə Xızı rayon,Yeni Yaşma kənd sakini Quliyeva Yeganə Qeno qızı atası, 65 yaşlı (05.10.1958) Quliyev Qeno Əli oğlunun üzləşdiyi problemlə əlaqədar olaraq redaksiyamıza müraciət göndərib. Problemini ictimailəşdirməyimizi istəyən vətəndaş Y.Quliyeva bildirir ki, atasına qarşı haqsızlıq edilib.
O bildirdi ki, atası müayinədən keçdikdən, diaqnozu qoyulduqdan, Dövlət Tibbi-Sosial Ekspertiza və Reabilitasiya Agentliyinin (DTSERA) aidiyyəti komissiyasından keçdikdən sonra ona 2019-cu ildə 5 illik müddətə II qrup əlillik təyin edilsə də, 2020-ci il yanvarın 24-də əlillik təyinatı dayandırılıb: “2019-2024-il müddətinə müvafiq tibb müəssisəsinin göndərişi və eyni zamanda DTSERA-in mərkəzi komisiyyasında əyani müayinə olunduqdan sonra atamın vəziyyəti II qrup əlil kimi qiymətləndirildi. Təyin olunmuş müddətin bir ili tamam olanda heç bir əsas göstərilmədən atamın pensiyası kəsildi. Əsaslı cavab tələb etdikdə isə bizə “təyin olunmuş əlillik xəstənin vəziyyəti ilə uyğun deyil”-deyildi”.
Y.Quliyevanın sözlərinə görə, atası bir il pensiya aldıqdan sonra ortada heç bir müayinə sənədi olmadığı halda ona “sənədiniz saxtadır” deyilib. “Bizə deyirlər ki, sənəd saxta olub. Mənə bir məktub göndərlib və orada “saxta” dedikləri əlilliyin səbəbi Xızı rayon xəstəxanasında atamın müayinəsidir. O xəstəxanadan atamın sənədlərini DTSERA-na göndəriblər. Məhz həmin agentliyin həkim komissiyası baxıb bu işə. Düzdür, oradan birinci dəfə imtina verilmişdi, səbəb göstərilirdi ki, forma 88 tam olaraq doldurulmayıb. Ondan sonra atamı Agentliyin komissiyasına dəvət etdilər. Ona əlillik həmin komissiya tərəfindən təyin olundu. Təbii ki, əlillik təyin olunubsa demək xəstənin əlində müayinə sənədləri var və əlillik də ona əsasən təyin olunub. Həmin sənədlərlə təsdiq edilən əlilliyi sonra “saxta” adlandırırlar. Əgər belədirsə saxtalığı təsdiq edən sənəd də göstərilməlidir. Amma heç bir təkrar müayinə aparılayıb və onların dediyini təsdiqləyən heç bir sənəd yoxdur. Deyirlər ki, onların 20 mart 2020-ci il tarixli bir protokolu olub. Mən qəbulda olanda dedilər ki, bizə yenidən bir arayış təqdim edin biz sizin atanızın əliliyini bərpa edək. Mən də həmin arayışı onlara təqdim etdim. Amma sonra neçə dəfə onlara məktub yazıb soruşdum ki, siz məndən arayış tələb etsiniz, dediniz bu arayış əsasında əlillik bərpa ediləcək, mən arayışı təqdim etdim, amma siz bərpa etmədiniz. Bəs verdiyiniz sənəddə niyə o arayışı göstərməmisiniz? Deyirlər ki, arayış protokoldadır. Həmin arayış protokolda varsa surətini versinlər. Mənə heç həmin komissiyanın videosurətini də vermədilər, baxmayaraq ki, verəcəkləri deyilmişdi”-deyə şikayətçi bildirdi.
“Müraciətimin səbəbi odur ki...”
Y.Quliyeva bildirdi ki, bütün müraciətləri cavabsız qalıb və atasının əlilliyi bərpa edilməyib. Bundan əlavə, Y.Quliyeva bildirdi ki, 1 il ərzində atası 130 manat civarında əlillik pensiyası alıb. “Atam artıq yaşla əlaqədar 1 aydır ki, pensiya alır. Pensiyası köçən kimi, ödənilən müavinətdən məbləğ tutulur. Hansı əsasla mənim atamın yaşla bağlı sosial müavinətindən hansısa məbləğ tutursunuz? Guya ki, atamın əlilliyi saxta olub və ona görə də pul tutulur. Mən şikayətimi etdim, iş məhkəməyə qədər gedib çıxdı. Dövlət Tibbi-Sosial Ekspertiza və Reabilitasiya Agentliyini Bakı İnzibati Məhkəməsinə vermişdim, proses getdi. Qarşı tərəfin nümayəndəsi gəlib məhkəmədə barışıq təklif etdi. Dövlət Tibbi-Sosial Ekspertiza və Reabilitasiya Agentliyinin nümayəndəsi gəlib “bəlkə elə səhv bizdə olub” dedi, barışıq istədilər. Barışıq ərizəsi yazıldıqdan sonra işə yenidən baxılmalı idi, yenidən sənədlər istədilər. Mən də getmədim. Çünki beş il bu işə görə əziyyət çəkmişim, sosial durumu çox aşağı olan əhali qrupuna aidəm.
Növbəti məhkəmə instansiyalarına getmədim, bunun da səbəbi anamın səhətində yaranan problem oldu, başım ona qarışdı. Məhkəmə prosesi tamamilə dayandırıldı, mən irəli getmədim.
Mən dedim ki, atamın istənilən vaxt, istənilən komissiyaya dəvət edilməsi xaricində bütün proseduru təkrar etməyəcəyəm. Atamın müayinəsinin də ona görə təkrar keçirilməsini istəyirəm ki, sonra haqsız duruma düşməyim. Atam istənilən yerdə istənilən komissiyaya gedə bilər, amma təkrar prosedurlardan keçməyəcəyik.
Mənim sizə müraciətimin səbəbi odur ki, atamın yaşlılığa görə aldığı pensiyadan məbləğ çıxılmasın. Çünki pensiyadan keçmişdə ödənilən müavinət çıxılır. Atamın pensiyasından pul kəsiminin dayandırılmısını istəyirəm”-deyə Y.Quliyeva bildirir.
Qeyd edək ki, Y.Quliyeva vatsap üzərindən redaksiyamıza onun ərizəsinə cavab olaraq Sumqayıt şəhər Təcili və Təxirəsalınmaz Tibbi Yardım Stansiyasının baş həkimi İ.İ Namazovun imzası ilə verilən 21.08.2019-cu il tarixli arayışın, 13.08.2018-ci il tarixində Quliyev Qeno Əli oğluna ünvanlanan Əmək və Əhalinin Sosial Müdafiəsi Nazirliyinin Dövlət Tibbi-Sosial Ekspertiza və Reabilitasiya Xidmətinin rəis müavini Gülnarə Hacıyevanın imzası ilə təqdim edilən 18430067601 nömrəli sənədin surətini də göndərib. Eyni zamanda Y.Quliyevanın müraciəti ilə bağlı Əmək və Əhalinin Sosial Müdafiəsi Nazirliyinin Dövlət Tibbi-Sosial Ekspertiza və Reabilitasiya Xidmətinin 12.03.2020 tarixli məktubunda qeyd edilir: “Əmək və Əhalinin Sosial Müdafiəsi Nazirliyinin Dövlət Tibbi-Sosial Ekspertiza və Reabilitasiya Xidmətində qəbul zamanı atanız - Qeno Quliyevin əlillik vəziyyətinin qiymətləndirilməsi ilə bağlı ünvamladığınız müraciətə baxılmışdır.
Bildirirəm ki, Xızı rayon sakini Quliyev Qeno Əli oğlunun əlillik vəziyyəti səhiyyə müəssisəsinin 0331AABKU nömrəli göndərişi əsasında onun iştirakı olmadan 21.02.2019-cu il tarixində qiymətləndirilmiş və ümumi xəstəlik səbəbi ilə 5 il struktur bölmə əməkdaşlarının iştirakı ilə xəstə 24.01.2020-ci ildə nəzarət qaydasında əyani müayinə olunmuş və əlillik dərəcəsinin təyininə əsas verən ağırlaşmalar aşkar edilmədiyinə görə əlil hesab edilməməsi barədə qərar verilmişdir. Qəbulda müraciətiniz əsasında Quliyev Qeno Əli oğlunun tibbi-ekspertiza sənədləri tərəfimizdən araşdırıldı. Müəyyən olunmuşdur ki, Akademik M.Ə.Mirqasımov adına Respublika Klinik Xəstəxanasın 5383 nömrəli məsləhət vərəqəsində nevropatoloqun obyektik müayinəsində epleptik tutmalar və eplepsiya xarakterizə edən əlamətlər qeyd edilməmişdir. Eləcə də Sumqayıt şəhəri “İnter-med plyus” Diaqnostika Mərkəzinin 29.02.2020-ci il tarixli kompüterli EEQ müayinəsinin nəticəsi-“Lokal və diffuz olan potoloji dalğa, epileptik ocaq aşkarlanmadı. Beyin metobolizminin zəifliyi-hipoksiya izləndi. Neyronların ləbilliyi izləndi. Sütun strukturklarının disfunksiyası, ləngimə tormozlanmanın üstünlüyü ilə təpə paylarında çox yüngül paroksizmal meyl izləndi”-səhiyyə müəssisəsinin 0331003AABKU saylı göndərişində qeyd edilən diaqnozu təsdiqləmir. Buna görə də təqdim edilmiş sənədlər əsasında Quliyev Qeno Əli oğlunun əlilliyi təsdilmir. Bu barədə Xidmətdə 03.03.2020 il tarixli müvafiq protokol təqdim olunmuşdur”.
Vətəndaşın redaksiyamıza müraciətinə biganə qalmadıq, onu işıqlandırırıq. Ümid edirik, Əmək və Əhalinin Sosial Müdafiəsi Nazirliyinin müvafiq qurumları Quliyev Geno Əli oğlunun pensiyasından keçmişdə ödənilən məbləğin çıxılması qərarına bir də baxacaq və vətəndaşın sosial durumu nəzərə alınaraq müraciəti araşdırılacaq.
Məsələ ilə bağlı qarşı tərəfin müraciəti olarsa onu da işıqlandırarıq.
İradə SARIYEVA
