Polis düz etdi - uşağa siqaret öyrədən valideynlər...
Hüseyn Axundov: “Yetkinlik yaşına çatmayanlara tütün məmulatlarının satışı və onların tütündən istifadə etməsi qadağan olunub”
Fatimə Hacıbəyli: “Azyaşlılara siqaret çəkməyi öyrətmək heç də birmənalı qarşılana bilməz”
Son zamanlar sosial şəbəkələrdə azyaşlıların siqaret çəkməsi, içki içməsi barədə görüntülər yayılır. Təbii ki, videolar birmənalı qarşılanmır. Son paylaşılan videoda hətta ata azyaşlı oğluna siqaret çəkməyi öyrədir. Məhəmməd Nəbilinin körpə uşağına qarşı bu addımı sosial şəbəkələrdə geniş müzakirə olunub və qınanılıb. Narazılıqlara cavab verən ata sonradan çəkib paylaşdığı videoda bildirib ki, siqareti uşağa çəkdirməyib, onun ağzından aralı tutub. “Uşaq mənimdir, özüm bilərəm. Əziyyətlə böyüdürəm. Mənim nə etməyimin heç kimə aidiyyəti yoxdur”, – deyə Məhəmməd Nəbili bildirib.
Qeyd edək ki, atanın canlı yayımda uşağa tütün məmulatları çəkdirilməsini əks etdirən görüntüləri polis araşdırıb. Daxili İşlər Nazirliyindən verilən məlumata görə, 1 yaşlı övladını hüquqazidd hərəkətə məruz qoyan 1993-cü il təvəllüdlü Məhəmməd Nəbili müəyyən olunaraq saxlanılıb. O bu hərəkətinin məqsədini sosial şəbəkələrdə auditoriya toplamaq olması ilə izah edib. Onun barəsində qanunvericiliyə uyğun olaraq tədbir görülüb.
Onu da bildirək ki, bu tip halların yaşanması birinci dəfə deyil. Uşağı zərərli vərdişlərə aludə edənlər necə cəzalandırılmalıdır?
Hüquqşunas Hüseyn Axundov “Bakı-Xəbər”ə açıqlamasında qeyd etdi ki, yetkinlik yaşına çatmayanlara tütün məmulatlarının satışı və onların tütündən istifadə etməsi qadağan olunub: “Yetkinlik yaşına çatmayanlara tütün məmulatlarının satışı, habelə onlara tütün məmulatı almaqla, verməklə, tütün məmulatından istifadəni təklif və ya tələb etmək yolu ilə onların tütündən istifadə prosesinə cəlb edilməsi qadağandır. Fərqi yoxdur, istəyirsən tütün məmulatını həmin şəxsə sat, ya istifadə etməsi üçün ver. Bu, birmənalı olaraq qadağandır”.
Sosioloq Fatimə Hacıbəyli “Bakı-Xəbər”ə açıqlamasında qeyd etdi ki, azyaşlılara siqaret çəkməyi öyrətmək heç də birmənalı qarşılana bilməz: “Pis nəsə olsa, onun yaddaşında, şüuraltında mənfi iz buraxır. Uşağa siqaret çəkdirmək, dalaşmağı öyrətmək yolverilməzdir”.
Həmsöhbətimiz onu da əlavə etdi ki, siqaretdən istifadə edən yeniyetmə və azyaşlılar özlərini cəmiyyətə sübut etmək istəyirlər. Eyni zamanda, onlar bu zərərli məhsulları istehsal edən yerli və transmilli şirkətlərin qurbanına çevrilirlər: “Sosial şəbəkələrdə də görürük ki, bir əlində siqaret, digərində enerji içkisi varkən şəkil paylaşanların əksəriyyəti yeniyetmələrdir, hansı ki, onlar “vorzakonluğu” özünə nümunə götürüblər. Həmin yeniyetmə və uşaqlarla həm ailə, həm məktəb və al təhsil müəssisələri, həm uşaq mərkəzləri, həm bələdiyyə, həm də mühit ciddi mübarizə aparmalıdır. Yalnız ictimai maarifləndirmə, qadağalar, cərimə və həbslərlə bunun qarşısını almaq mümkün deyil. Bunun üçün artıq ciddi addımlar atmaq lazımdır. Bir neçə gün əvvəl ata öz uşağının ağzına siqaret qoyub və bunu sosial şəbəkədə bəh-bəhlə yayıb. Bunu edən ata hüquq-mühafizə orqanlarının əməkdaşları tərəfindən saxlanılıb. Azyaşlı uşaqları pis vərdişlərə öyrədən valideynlər cəzalandırılmalıdır”.
Günel CƏLİLOVA
