Ermənistan Naxçıvandakı ordudan və Türkiyənin "bir addım" dəstəyindən qorxmur?..
Rövşən Məhərrəmov: "Ermənistanın Naxçıvan istiqamətini seçməsinin səbəblərindən biri də Türkiyə ilə bağlıdır"
Son bir neçə gündə erməni qoşunlarının sərhədboyu ərazilərdə cəmlənməsi, hücum silahlarını yerləşdirməsi və mühəndislik işlərini sürətləndirməsi müşahidə edilir. Baş verənlər göstərir ki, erməni qoşunların hərəkətə keçməsi 1 aprel-28 iyun tarixində nəzərdə tutulan hərbi təlimlərlə bağlı deyil. Ermənistan Müdafiə Nazirliyi yaydığı bəyanatda bildirir ki, onların öz ərazilərində mühəndislik işləri aparmaq, müdafiəni gücləndirmək suveren hüquqlarıdır.
Qeyd edək ki, aprelin 5-də Brüsseldə keçiriləcək Ermənistan-Avropa Birliyi-ABŞ formatındakı görüş ərəfəsində Qərb qüvvələrinin bölgəyə cəlb edilməsini əsaslandırmaq üçün sərhəddə müəyyən eskalasiyanın yaradılması gözləniləndir.
Maraqlıdır ki, bu dəfə ermənilər atəşkəsi Naxçıvan istiqamətindən pozurlar. Uzun müddətdir Ermənistan Naxçıvana qarşı təxribat törətməkdən imtina edib. Türkiyə faktoru, oradakı güclü ordu amili və İrəvana yaxınlığı nəzərə alıb. İndi niyə hədəf kimi Naxçıvan istiqamətini seçib?
Hərbi-siyasi ekspert, ehtiyatda olan polkovnik Rövşən Məhərrəmov "Bakı-Xəbər"ə açıqlamasında bildirdi ki, Ermənistanın Naxçıvanı hədəf seçməsi epizodik ola bilər: "Onların Naxçıvana hücumla bağlı ciddi planları ola bilməz. Çünki Azərbaycan ordusunun gücünü, Şuşa Bəyənnaməsini bir kənara qoysaq belə, Qars müqaviləsinə görə, Ermənistanın atacağı səhv addım Türkiyəni hərəkətə keçirəcək və bu, İrəvana baha başa gələr. Düşünürəm ki, Ermənistan bunu bilir. Ona görə də, Ermənistan əsas hədəfdən yayındırmaq üçün Naxçıvan istiqamətində manevr edir. Ermənistan tərəfi silahlanmadan əlavə ciddi şəkildə müdafiə xətləri inşa edir. Görünən odur ki, qarşı tərəf ən azı sərhəd toqquşmalarının qaçınılmaz olacağını düşünür. Ermənistanın nə insan resursu, nə iqtisadi gücü hücum etməyə, işğalçılıq siyasəti yeritməyə yetmir. Eyni zamanda Ermənistan öz istəyi ilə də hərəkət edə bilmir.
Hesab edirəm ki, Ermənistanın Naxçıvan istiqamətini seçməsinin səbəblərindən biri də Türkiyə ilə bağlıdır. Türkiyəni digər regionda apardığı siyasətdən ayırıb, Cənubi Qafqazdakı bataqlığa çəkmək niyyəti güdür. Belə ki, regionda Qərblə Rusiya arasında informasiya və psixoloji müharibə artıq sahəyə enməkdədir. Türkiyə digər istiqamətlərdə Azərbaycana siyasi dəstək verir, ancaq Naxçıvan elə bir istiqamətdir ki, Türkiyə burada birbaşa oyuna qatılmalıdır. Qərb də, Rusiya da Cənubi Qafqazda Türkiyəni yanında görmək istəyir. Görünən odur ki, Naxçıvanın hədəfə çevrilməsi daha çox Rusiyanın işinə yarayır. Ermənistana təzyiq edəcək ölkələr siyahısına Türkiyə də qatılacaq. Yeri gəlmişkən, elə erməni mediasında Türkiyənin Ermənistan sərhədinə hücum silahları yığması barədə informasiya yayılmışdı".
Məhəmmədəli QƏRİBLİ
