Doğulduğu 10 noyabr günü Şuşada şəhid oldu - şəhid Nicat Qasımzadənin anası danışır...
“20 yaşı Şuşada tamam oldu və həmin gün də şəhadətə yüksəldi”
Yuxusu çəkilib göyə,
Ürəyində yarası var.
Bağrı şan-şan olub onun
Oxlanmamış harası var?
Şəhid anasının!..
Yuxusu ərşə çıxar şəhid anasının, gecəni sübhə dirigözlü açar, yastığını isladan göz yaşları da ürəyindəki oğul yarasının sızıltısını dinşətməz.
Gecələr gözləri ağlayır, gündüzlər ürəyi sızlayır, gedib qayıtmayan balasının yolunu gözləyir hey. Balası gəlmir ki, gəlmir. Deyir ki, üçrəngli bayrağımızı öpüb oxşayır, balasının uğrunda öldüyü, tabutubnun süsləndiyi bayrağa baxıb təsəlli alır, balasının cismi torpağa köçsə də, elə bilir ki, ruhu da bayrağa köçüb.
Biləsuvar rayonunun Zəhmətabad kəndində doğulan Vətən müharibəsi şəhidi Nicat Höccət oğlu Qasımzadənin anası Asifə Qasımova belə deyir.
“Nicat məni nə qədər arxayın salmaq istəsə də onun arxada yox, ön cəbhədə olduğunu bilirdim”
Asifə xanımla martın 15-də Mədəniyyət Nazirliyi Respublika Xatirə Kitabı Redaksiyasının hazırladığı “44 gün - Tarixi zəfər” adlı kitabın I və II cildlərinin Biləsuvar rayonunun Heydər Əliyev Mərkəzində keçirilən təqdimat mərasimində həmsöhbət olduq.
Ana deyir ki, iki bacının tək qardaşı olub Nicat, uşaqlıqdan zəhməti çox sevib, ata-ana, torpaq, Vətən qədri bilib. Bütün ruhu ilə Azərbaycan torpağına bağlı olan Nicat Qasımzadə əsgəri xidmətini üç ay idi ki, başa vurmuşdu, işə düzəlmişdi, ailəsinə dayaq olmaq istəyirdi. Lakin müharibənin başlaması onun ürəyindəki ən böyük arzusunu gerçəkləşdirib - Vətən torpaqlarının işğaldan azad edilməsində iştirak etmək istəyini.
Gözü yığılmaz yollardan,
Sığal çəkər şəkillərə...
Balasına həsrət qalıb
Düçar olubdu qəmlərə
Şəhid anası!
Dərdi o qədər çoxdur ki, kədər çökmüş yaşlı gözlərini gizlətməyə çalışır...Gah susur, gah danışır, gah xəyallara dalır, gah da üzünü acı bir təbəssüm bürüyür. Ana oğlundan danışır, deyir ki, Nicat 10 noyabr 2000-ci ildə Biləsuvar rayonunun Zəhmətabad kəndində anadan olub. 2007-cı ildə şəhid Ənvər Rəhmətov adına kənd tam orta məktəbində təhsil almağa başlayıb . 2018-ci ildə təhsilini başa vurub. Nicat Qasımzadə 2019-cu il yanvar ayının 3-ü həqiqi hərbi xidmətə başlayıb. İlk 3 ay Goranboy rayonunda xidmət edib. Daha sonra Ağdama yollanaraq 3 ay artilleriya qoşunlarında xidmətini davam etdirib. N. Qasımzadəyə hərbi xidməti dövründə pulemyotçu vəzifəsi verilir, daha sonra manqa komandiri olur. Xidmətinin axırıncı 2 ayını isə kiçik çavuş rütbəsi ilə başa vurur və 6 iyul 2020-ci il tarixində tərxis olunur.
“Nicat qismən səfərbərliklə 21 sentyabr 2020-ci il tarixində Səfərbərlik və Hərbi Xidmətə Çağırış üzrə Dövlət Xidməti tərəfindən hərbi xidmətə çağırıldı. O, müharibə dövründə Füzuli və Cəbrayıl istiqamətində gedən ağır döyüşlərdə iştirak edib. Mənim oğlum bir qəhrəman olub, düşmənin xeyli canlı qüvvəsini məhv edib, bir neçə yaralı silah yoldaşını xilas edib. Oğlum doğulduğu 10 noyabrda ürəyindən aldığı qəlpə yarası nəticəsində Şuşada qəhrəmancasına şəhid olub. 20 yaşı Şuşada tamam oldu və həmin gün də şəhadətə yüksəldi. Mən oğlumun qəhrəmanlığı ilə fəxr edirəm.
Nicatım uşaqlıqdan mənim qəhrəmanım idi. Həmişə oğlumla qürur duyurdum. 2019-cu ildə Ağdam rayonunda hərbi xidmət keçdi, 1 il 6 ayını çox nümunəvi şəkildə başa vurdu. Balamla fəxr edirəm. Müharibədə olduğu vaxt qətiyyən bizim narahat olmağımızı istəmirdi, hey deyirdi ki, yerim rahatdır, məndən narahat olmayın, arxadayam. Nicat məni nə qədər arxayın salmaq istəsə də onun arxada yox, ön cəbhədə olduğunu bilirdim. Çünki mənim balam heç zaman arxada olmağa razı olmazdı”.
Ana bildirdi ki, Nicat məktəbi bitirəndən sonra kollecə qəbul olsa da, ancaq kollecdə oxumayıb, rəssamlıq bacarığı olduğundan, arzusu hərbi xidmətini başa vurub, Azərbaycan Dövlət Rəssamlıq Akademiyasına daxil olmaq olub.
Asifə xanım deyir ki, oğlunun ən böyük arzularından biri Dövlət Rəssamlıq Akademiyasına qəbul olub rəssam olmaq idi, amma bu arzusu həyata keçməyib.
Nicat Qasımzadənin 2020-ci ilin 12 noyabrında doğulduğu Zəhmətabad kənd məzarıstanlığında dəfn olunduğunu deyən ana onu da qeyd etdi ki, oğlunun abidə kompleksi və xatirə bulağının açılışı da olub. Bu gün Nicatın təkcə iki bacısının qardaşı deyil, bütün Azərbaycan qızlarının qardaşı olduğunu deyən ana bildirdi ki, elə bir oğul anası olmaqla əbədi olaraq fəxr edir. Ana deyir ki, bütün tədbirlərdə Azərbaycan bayraqları ilə iştirak edir, çünki oğlu o bayraq uğrunda şəhid olub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamları ilə Nicat Qasımzadə ölümündən sonra "Vətən uğrunda", "Xocavəndin azad olunmasına görə", "Füzulinin azad olunmasına görə", "Şuşanın azad olunmasına görə" , "Cəsur döyüşçü"medalları və 3-cü dərəcəli "Vətənə xidmətə görə" ordeni ilə təltif edilib. Asifə xanım deyir ki, oğlunun bu medallarının hamısı ona əzizdir, çünki balasına dövlətin verdiyi qiymətdir.
Respublika Xatirə Kitabı Redaksiyanın baş redaktoru Nəzakət Məmmədovaya və kollektivinə təşəkkür edən ana bildirdi ki, şəhidlərin adlarının əbədiləşdirilməsi onlar üçün böyük təsəllidir: “Bizim acımız unudulmazdır. Amma balalarımız haqda məqalələr yazılanda, onların adları bu cür kitablara salınanda, barələrində danışılanda bu bizə böyük təsəlli olur. Xatirə Kitabı Redaksiyasının rəhbəri Nəzakət xanıma, o redaksiyanın bütün əməkdaşlarına minnətdarlıq edirik ki, övladlarımızı yaşadırlar. Bu bizə güc verir”.
Bir barmaq kağıza, bir kitab səhifəsinə doğma balasına sarılırmış kimi sarılır şəhid anaları. Balalarının ətrini bu yazılardan alırlar.
Biləsvar rayonun Zəhmətabad kəndinin bir neçə şəhid oğlu var və onların hər birinin məzarı biləsuvarlıların ziyarət yeridir...
Bir ana ürəyinə azacıq da olsun təsəlli ola bilmək böyük səadətdir. Biz o analara, o mərd, cəsur analara minnətdarıq ki, Nicat kimi qəhrəman oğullar böyüdüb Vətənə bəxş edirlər.
20 bahar yaşayan Nicat həmişə 20 yaşında qalacaq və heç zaman unudulmayacaq...
İradə SARIYEVA
Biləsuvar-Bakı
