Hərbi əməliyyatlar barədə saxta məlumatları kimlər və hansı məqsədlə yaydılar...
Elyar İslamoğlu: “Bu feyk xəbərləri yayanlar cəmiyyətdə təşviş yaratmağa, dövlətimizin və ordumuzun gücünə, qüdrətinə ləkə salmağa cəhd ediblər”
Bildiyiniz kimi, martın 31-də saxta müharibə xəbəri yayıldı. Heç bir əsası olmayan bu xəbəri elə işləyib yaydılar ki, az qaldı Azərbaycan ictimaiyyəti buna inansın. Tik-Tok-dakı 1-2 dəqiqəlik saxta xəbəri o şəkildə təqdim etdilər ki, Ermənistanın hücumu nəticəsində guya şəhidlərimiz var, müharibə, əks-hücum əməliyyatı başlayıb.
Əlbəttə, bu saxta xəbəri hazırlayıb yayanların əsas məqsədi Azərbaycan cəmiyyətində xof yaratmaq və insanları narahat etmək olub.
Yeri gəlmişkən, bu xəbərin saxta olduğuna dair Medianın İnkişafı Agentliyi (MEDİA) və Xüsusi Rabitə və İnformasiya Təhlükəsizliyi Dövlət Xidməti birgə açıqlama yayıb. Açıqlamada bildirilib ki, “TikTok” sosial şəbəkəsində açılmış hesablarda hərbi əməliyyatların başlaması və şəhidlərimizin olması barədə saxta (feyk) xəbərlər yayılıb.
Birgə açıqlamada vurğulanır ki, köhnə məlumatların manipulyasiyası nəticəsində hazırlanmış saxta xəbər heç bir reallığı əks etdirmir və ictimai rəyi çaşdırmağa yönəlmiş uğursuz cəhddir.
Açıqlamada hər iki qurum Azərbaycan vətəndaşlarını, jurnalistləri, ictimai fəalları bu kimi hallara qarşı hər zaman prinsipiallıq nümayiş etdirməyə, saxta və yalan məlumatlara söykənən kampaniyaların qlobal səviyyədə vüsət aldığı bir şəraitdə sayıq olmağa çağırıblar.
“Qeyd olunan saxta xəbər və onun mənbəyi barədə müvafiq tədbirlərin görülməsi təmin edilməkdədir” - deyə açıqlamada bildirilib.
Daxili İşlər Nazirliyinin mətbuat xidmətindən də mətbuata bildirilib ki, bəzi sosial şəbəkə səhifələrində hərbi əməliyyatlar, texnika və şəhidlərimiz barədə saxta xəbərlər yayılıb. DİN-nin yaydığı məlumatda bildirilib ki, polis əməkdaşları tərəfindən keçirilən tədbirlərlə həmin şəxslər müəyyən olunub. Onlar barəsində qanunvericiliyə uyğun olaraq tədbirlər görülür.
DİN vətəndaşları reallığı əks etdirməyən və ictimai rəyi çaşdırmağa yönələn saxta xəbərləri paylaşmaqdan çəkinməyə çağırıb, bu halların qanunvericiliklə məsuliyyət yaratdığını bəyan edib.
Hərbi əməliyyatlar barədə saxta məlumatları kimlər və hansı məqsədlə yaydılar?
“Ehtimal ki, onlar bunu xaricdə oturan və Azərbaycandakı stabilliyi, sabitliyi həzm edə bilməyən qüvvələrin maraqlarını təmin etmək məqsədilə...”
Filologiya üzrə fəlsəfə doktoru, ictimai fəal Elyar İslamoğlu “Bakı-Xəbər”ə şərhində bildirdi ki, yayılan saxta məlumatın arxasında müəyyən qüvvələrin maraqları dayanır. Bu saxta məlumatı yayanların kimliyinin hüquq-mühafizə orqanlarının araşdırmasından sonra bəlli olacağını deyən E.İslamoğlunun sözlərinə görə, onların hədəfi cəmiyyətimizdə hansısa xof, həyacan yaratmaq olub. “Bilirsiz ki, artıq o feyk xəbəri yayanlar saxlanılıb, onların bunu hansı məqsədlə etdiyi, kimlərin, hansı qüvvələrin sifarişi ilə həyata keçirdikləri araşdırma nəticəsində üzə çıxarılacaq.
Bu məlumata mən də rast gəldim və feyk olduğunu ətrafımdakı insanlara da dedim. Sosial şəbəkələrdə, xüsusən də Tik-Tokda saxta xəbərlər çox yayılır. Tik-Tok-a kifayət qədər nəzarət olmadığı üçün orada saxta məlumatlar, təşviş, panika yaradan xəbərlər çox yayılır”-deyə E.İslamoğlu bildirdi.
O hesab edir ki, hərbi əməliyyatın başlaması ilə bağlı bu feyk xəbərləri yayanlar ola bilsin xarici xüsusi xidmət orqanlarının təsiri altına düşən şəxslərdir. “Bu müxtəlif məqsədlərlə edilə bilər. Bir ictimaiyyət nümayəndəsi kimi ehtimallarımdan biri odur ki, ola bilsin, onlar xaricdən idarə olunurlar, xarici xüsusi xidmət orqanlarının tapşırıqlarını yerinə yetiriblər. Ehtimal ki, onlar bunu xaricdə oturan və Azərbaycandakı stabilliyi, sabitliyi həzm edə bilməyən qüvvələrin maraqlarını təmin etmək məqsədilə ediblər.
Məqsədləri də həmin feyk xəbərləri yaymaqla arxa cəbhədə təşviş yaranmasına, hərbiçilərin, əsgəri xidmətdə olanların ailələrinin, yaxınlarının ciddi narahatlıq keçirməsinə nail olmaqdır. Onların bunu hansı məqsədlə etdiyi araşdırma zamanı daha dəqiq şəkildə üzə çıxarılacaq.
Başqa bir ehtimal da odur ki, bəlkə kimsə “Tik-Tok”da öz səhifəsinin reytinqini yüksəltmək üçün bunu edib ki, guya bunlar məlumatlı şəxslərdir və bütün xəbərləri bunlar birinci paylaşır. Üçüncü ehtimal odur ki, bəzi şəxslər görür ki, Ermənistan tərəfdə sərhəddə hərbi sursat, hərbi texnika, qoşun yığma cəhdlərindən danışılır, belələri də “xəbəri” hamıdan tez vermə üçün belə ediblər. Hər üç hal qınanası haldır. Belələri barədə ciddi tədbirlər görülməlidir ki, başqalarına da görk olsun”.
Özü şəhid qardaşı olan E.İslamoğlu bildirdi ki, belə feyk xəbərlər şəhid ailələrinə, qazilərə mənfi təsir göstərir və onlar həmin hissləri təkrar yaşayırlar, eyni zamanda yaxınları hərbiçi olanlar, övladları ön cəbhədə xidmət edənlər də təşvişə düşür. “Həssas insanlar bu feyk xəbərlərdən çox narahat olurlar. Müharibə “anonsunun verilməsi” kimi xəbərlər belə insanları çox pis vəziyyətə salır. Artıq Daxili İşlər Nazirliyi açıqlama yayıb ki, bu saxta məlumatı yayan şəxslər aşkarlanaraq saxlanılıblar. Düşünürəm ki, gələcəkdə belə halların təkrar olunmaması üçün onlara sərt cəzalar verilməlidir. Düşünürəm ki, “Tik-Tok” sosial şəbəkəsinə də nəzarət etməyin artıq vaxtı çatıb. Çünki oradan həddən artıq çox feyk xəbər yayılır. Bu feyk xəbərləri yayanlar cəmiyyətdə təşviş yaratmağa, dövlətimizin və ordumuzun gücünə, qüdrətinə ləkə salmağa cəhd ediblər. Məqsədlərindən biri bu olub. Bu da Azərbaycan cəmiyyəti tərəfindən şiddətlə qınanılır”-deyə E.İslamoğlu qeyd etdi.
Müsahibimiz onu da vurğuladı ki, Azərbaycanın qələbəsini həzm edə bilməyən qüvvələr hər zaman bu cür informasiya təxribatı ilə qarşımıza çıxa bilər, bu məsələdə cəmiyyət olaraq diqqətli olmalıyıq, yalnız rəsmi xəbərlərə inanmalıyıq.
İradə SARIYEVA
