Orucluqdan dərhal sonra toy qiymətləri "ceyranın belinə çıxacaq" - anonslar var ...
Elxan Əliyev: “Ərzaq məhsullarının qiyməti bahalaşdıqca menyu qiymətləri də artmaqda davam edəcək”
Ailə qurmağa hazırlaşan cütlükləri maraqlandıran əsas məsələlərdən biri də şadlıq saraylarının mövcud menyu qiymətləridir. Bakıda menyusu 45 manatdan tutmuş 450 manata qədər xidmət təklif edən şadlıq evlərinə rast gəlinir.
İqtisadi və Sosial İnkişaf Mərkəzinin yaydığı məlumatda qeyd edilir ki, Bakıda şadlıq saraylarında qiymət artımı davam edir. 2024-cü ilin fevral ayında şadlıq saraylarında sifarişlərin sayı cəmi 2.1 faiz artıb. Eyni zamanda, şadlıq saraylarında fevral ayında qiymətlər 3.8 faiz artıb.
Xüsusən 40 manatadək olan menyularda qiymət daha çox artıb – 5.1 faiz. Qiyməti 40-80 manat olan menyuların qiyməti 2.6 faiz yüksəlib. Dəyəri 100 manatdan çox olan menyuların qiymətində də 3.7 faiz artım qeydə alınıb.
Məlumdur ki, hazırda Ramazan ayıdır. Ramazan ayında toylar keçirilmir. Ehtimal edilir ki, şadlıq evləri yeni toy mövsumunə yeni qiymətlərlə daxil olacaq.
“Rəqabətdə uduzanlar restoranın təyinatını dəyişməli, ya da bağlamalıdırlar”
Sosial sahə üzrə ekspert Elxan Əliyev “Bakı-Xəbər”ə açıqlamasında bildirdi ki, qiymətlərin formalaşmasına müxtəlif amillər təsir göstərir: “Son aylar ərzaq məhsullarının qiymətində baş verən bahalaşma həm şadlıq evlərində, həmçinin də digər restoranlarda qiymətə təsir edir. Təbii ki, ərzaq məhsullarının qiyməti bahalaşdıqca menyu qiymətləri də artmaqda davam edəcək. Şadlıq saraylarının qiymətlərinin bahalaşması onların xərcinin artması deməkdir. Rəqabətdə uduzanlar restoranın təyinatını dəyişməli, ya da bağlamalıdırlar. Şadlıq sarayları və restoranları qarşıda daha çətin günlər gözləyir. Məlumdur ki, son zamanlar şadlıq evlərində keçirilən toyların sayı azalıb. Elə şadlıq evi var ki, ayda bir və ya iki toy olur. Əvvəllər qız, oğlan toyu ayrı olurdu. Ancaq indi bu bir yerdə keçirilir. Digər mərasimlər şadlıq evlərində deyil, evlərdə keçirilir. Şadlıq evlərində keçirilən toyların sayının azalması onların büdcəsinə təsir edir. Yaxın gələcəkdə şadlıq saraylarının bəziləri sıradan çıxacaq, iflasa uğrayacaq. Yəqin ki, gələcəkdə şadlıq saraylarının sayı azalacaq. Çünki bu sahədə rəqabət çoxalıb və hər kəs bu sahə ilə məşğul olmaq həvəsində olmayacaq”.
Günel CƏLİLOVA
