Xaricdən idarə olunan “şəbəkə təxribatları” yenidən qızışıb...
Azər Həsrət: “Bizdən minlərlə kilometr uzaqda olan Qərb dövlətlərindən, hətta okeanın o tayından Azərbaycanın daxili işlərinə qarışmaq cəhdləri müşahidə edilir”
Azərbaycan dövlət müstəqilliyi əldə etdikdən indiyə qədər müxtəlif Qərb təşkilatları, antiazərbaycan qüvvələr ölkəmizi hədəfə alıb, hər vasitədən istifadə edirlər ki, ölkə daxilində hansısa qarışıqlıq yaratsınlar.
Həmin təşkilatlar öz cinayət əməllərini həyata keçirmək üçün əsasən yerli media vasitələrindən, qeyri-hökumət təşkilatlarından da istifadə etməyi unutmayıblar. Xarici qüvvələrlə əlaqədə şübhəli bilinən “Abzas media”, “Toplum TV” və başqa onlar kimi media qurumlarının əməkdaşları, rəhbərləri müxtəlif ittihamlarla cinayət məsuliyyətinə cəlb ediliblər. Onlarla bağlı konkret ittihamların mövcud olduğu məlumdur. “Abzas media” işi üzrə bir neçə nəfərlə bağlı 206.3.2-ci (qaçaqmalçılıq, qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Sözügedən saytın direktoru Ülvi Həsənli və baş redaktoru Sevinc Vaqifqızı, direktor müavini Məhəmməd Kekalov, əməkdaş Nərgiz Absalamova qaçaqmalçılıq ittihamı ilə həbs ediliblər.
Məlum olduğu kimi, martın 6-da Nərimanov rayonu Y.V.Çəmənzəminli ev 98 B ünvanında yerləşən ofisdə və əlavə digər ünvanlarda bir qrup şəxsin fəaliyyəti ilə bağlı daxil olan məlumat üzrə polis əməkdaşları tərəfindən əməliyyat-axtarış tədbirləri keçirilib. “Toplum TV”-nin əməkdaşı Fərid İsmayılov barəsində də Cinayət Məcəlləsinin 206.3.2 -ci (qaçaqmalçılıq qabaqcadan əlbir olan bir qrup şəxs tərəfindən törədildikdə) maddəsi ilə cinayət işi açılıb. Bundan əlavə, “Toplum TV” ilə bağlı işdə Müşfiq Cabbar, Əli Zeynal, Ramil Babayev, Elmir Abbasov və İlkin Əhmədova qarşı da Cinayət Məcəlləsinin 206.3.2-ci (qaçaqmalçılıq) maddəsi ilə cinayət işi açılıb. Göründüyü kimi, həbs edilənlərin hər birinə qarşı irəli sürülən ittihamlar eynidir.
Təbii ki, Qərb təşkilatları və Qərb mediası harayın ağzını başqa istiqamətə yönəltmək üçün cəfəng iddialar irəli sürür, bunu “söz azadlığının” boğulması kimi qələmə vermək istəyir. Amma müşahidələr də, ortada olan ittihamlar da onu deməyə əsas verir ki, bu media qurumlarının bəlli Qərb təşkilatları ilə əlaqələri olub. Fikrimizcə, qarşıdakı məhkəmə proseslərində tam olaraq bu məsələyə aydınlıq gətiriləcək.
Müxtəlif Qərb təşkilatlarının Azərbaycanda xaos yaratmaq istədiyi aydındır və bu əyani şəkildə sübut olunur.
Bəli, uzun illər ərzində Azərbaycanda şəbəkə vasitəsilə qarışıqlıq yaratmaq istəyən məlum xarici qüvvələr olub, amma təbii ki, onların cəhdləri tamamilə uğursuzluğa düçar olub. Mübağiləsiz deyə bilərik ki, Azərbaycan güclü dövlətdir və belə metodlarla, üsullarla daxili sabitliyə xələl gətirmək cəhdləri hər zaman iflasa uğrayıb. Hər cəhddə Qərb təşkilatlarının və onların əlaltılarının əli boşa çıxıb. İfşa olunublar, amma yenə də kor tutduğunu buraxmayan kimi, bunlar da Azərbaycandan əl çəkməyiblər. Deyildiyi kimi, müəyyən medialar, QHT-lər, fondlar vasitəsilə Azərbaycanda daxili vəziyyəti pozmaq istəyiblər, amma hər zaman oxları daşa dəyib, özləri isə biabırcasına ifşa olunublar, onlarla əlbir olanlar isə aşkarlanaraq məsuliyyətə cəlb edilib.
Xaricdən idarə olunan "şəbəkə təxribatları" son günlər yenidən qızışıb, yenidən özlərini göstərməyə başlayıblar, amma hər cəhdləri Azərbaycan dövləti tərəfindən dəf edilir.
“Onların bütün təxribat cəhdləri iflasa uğrayacaq, necə ki, indiyə qədər uğrayıb”
Siyasi şərhçi Azər Həsrət “Bakı-Xəbər”ə “Ümumiyyətlə, müstəqillik dövründə istisnasız olaraq bütün illərdə Azərbaycan dövlətinin daxili işlərinə qarışmaq cəhdləri olub, bu gün də var. Özəlliklə də, qonşu dövlətlərdən, eyni zamanda bizdən minlərlə kilometr uzaqda olan Qərb dövlətlərindən, hətta okeanın o tayından Azərbaycanın daxili işlərinə qarışmaq cəhdləri müşahidə edilir. Bu cəhdlər bir çox hallarda QHT-lər, ayrı-ayrı media qurumları, jurnalistləri, siyasi fəalları maliyələşdirmə yolu ilə həyata keçirilir. Bunu nəzərə alaraq bir neçə il əvvəl Azərbaycan dövləti gərəkli profilaktik tədbirlər gördü. Yəni xaricdən bu və ya digər şəkildə maliyyələşən şəxslərin və qurumların fəaliyyətinin şəffaflaşdırılması üçün gərəkli qanunlar qəbul edildi, qaydalar müəyyənləşdirildi. Nəticə etibarı ilə hər kəsə çağırış edildi ki, bütün qanuni fəaliyyətlər şəffaf şəkildə həyata keçirilsin. Ancaq təəssüflər olsun ki, bəlli bir kəsimə aid insanlar və onların rəhbərlik etdiyi təşkilatlar, hətta siyasi təşkilatlar bu şəffaflıq çağırışına məhəl qoymadılar. Bunlar Azərbaycan dövlətinin nəzarətindən yayınmaq üçün yeni üsullar “kəşf” etdilər. Təəssüflər olsun ki, həmin üsulların “kəşf” edilməsində, xüsusən də Qərbdən olan təşkilatlar fəallıq göstərdilər”-deyə bildirdi.
A.Həsrətin sözlərinə görə, nəticə etibarı ilə ölkədə qanunçuluğun, insan haqlarının, media azadlığının, ifadə azadlığının uğrunda çarpışdığını iddia edən adamlar özləri qanunsuz maliyyə fəaliyyəti ilə məşğul oldular: “Bu gün də olmaqdadırlar. Təbiidir ki, belə bir durum dövləti narahat etməyə bilməzdi. Ona görə də həmin qurumlara və şəxslərə qarşı vaxtlı-vaxtında gərəkli tədbirlər görülür. Bu tədbirlər də görüləndə yenə də Qərbdə oturmuş qurumlar səs-səsə verib hay-küy salırlar ki, Azərbaycanda media azadlığı “boğuldu”, nə bilim, vətəndaş cəmiyyətinə “hücum” var, guya “siyasi məhbuslar” varmış və sair. Amma bütün bunlar bizi bu yoldan çəkindirməməlidir. Dövlət bəyan edirsə ki, hər şey şəffaf, hər şey qanun çərçivəsində olmalıdır, hüquq, qanun uğrunda mücadilə etdiyini iddia edən adamlar niyə bundan qorxmalıdır, çəkinməlidir? O baxımdan düşünürəm ki, bütövlükdə bizim cəmiyyətimiz bu kimi məsələlərdə diqqətli olmalıdır”.
A.Həsrət qeyd etdi ki, həmin Qərb təşkilatlarının bizim ölkəmizin daxilində hansısa təxribat həyata keçirmək cəhdləri yolverilməzdir və Azərbaycan dövləti buna qarşı barışmaz mövqe sərgiləyir. O qüvvələrin Azərbaycana qarşı həyata keçirdiyi bütün təxribatların, xaos yaratmaq cəhdlərinin uğursuzluğa düçar olduğunu vurğulayan siyasi şərhçi hesab edir ki, bundan sonra da onlar heç nəyə nail ola bilməyəcəklər, çünki onların qarşısında güclü Azərbaycan dövləti dayanıb: “Onların bütün təxribat cəhdləri iflasa uğrayacaq, necə ki, indiyə qədər uğrayıb”.
İradə SARIYEVA
