Rusiya xəbərdarlıq etdi - yaxınlarda Ermənistan...
Azərbaycan Dövlət Təhlükəsizliyi Xidmətinin rəisi Əli Nağıyev ATƏT Parlament Assambleyasının Prezidenti Pia Kauma ilə görüşündə bildirib ki, bəzi dövlətlərin Ermənistanı silahlandırması qəbuledilməzdir. Məlumdur ki, burada söhbət ilk növbədə Fransadan gedir.
Bu yaxınlarda Fransa və Ermənistan arasında hərbi əməkdaşlıq imzalanıb. Artıq Fransa istehsalı olan "Bastion" çoxfunksiyalı zirehli avtomobilləri Ermənistana çatdırılıb.
Elə bu fonda ATƏT rəsmisi Pia Kauma ilə görüşən Əli Nağıyev deyib ki, regionda dayanıqlı sülhün yaranmasına əlverişli imkanın mövcud olduğu bir vaxtda bəzi dövlətlərin bölgədə vəziyyəti yenidən gərginləşdirmək məqsədilə Ermənistanı silahlandırması qəbuledilməzdir və belə hallar yenidən müharibənin alovlanmasına səbəb olacaq. Onu da xatırladaq ki, bu il oktyabrın 23-də Ermənistanın müdafiə naziri Suren Papikyanın fransalı həmkarı Sebastien Lecornu ilə imzaladığı hərbi əməkdaşlıq sazişinə görə İrəvan Fransanın "Thales" müdafiə qrupundan üç "Ground Master 200" (GM200) radar sistemi, eləcə də digər növ hərbi texnika və sursat alacaq. Rəsmi Bakı Fransanın Ermənistana hərbi texnika göndərməsini pisləyib və Parisin bu addımını regionda destruktiv fəaliyyət kimi qiymətləndirib. Fransanın "Le Monde" qəzetində saziş imzalanandan sonra dərc edilən məqalədə bu müqaviləyə radar və zenit-raket komplekslərinin satışı ilə yanaşı, Fransanın Ermənistana dəstəyi üçün təlimlərin də daxil olduğu xatırladılıb və Ermənistanın bu xərcləri necə ödəyəcəyinin sual altında olduğu qeyd edilib: "Bunlar Ukraynaya hərbi yardımda olduğu kimi silah tədarükü deyil, məbləği bir neçə yüz milyon avroya çata biləcək müqavilələrdir. Amma İrəvanın onların pulunu necə ödəyəcəyi hələ məlum deyil". Ermənistan həmçinin Hindistan ilə də hərbi sahədə əməkdaşlığı dərinləşdirməkdə maraqlı görünür. Hindistanın "EurAsian Times" xəbər saytının bu həftə verdiyi məlumata görə, Ermənistan və Hindistan arasında 41,5 milyon dollar dəyərində antidron sistemlərinin alınması üçün müqavilə imzalanıb. Bundan başqa, Ermənistan hələ 2022-ci ildə Hindistanla ümumi dəyəri 250 milyon dollar olan PINAKA – "Qrad" tipli reaktiv yaylım atəş sistemlərinin, eləcə də tank əleyhinə raketlərin və digər növ hərbi sursatların alınmasına dair müqavilə imzalayıb Azərbaycan Ermənistan və Fransanı bölgədə silahlanmaya və hərbiləşmə siyasətinə son qoymağa çağırıb.
Indilikdə görünən budur ki, Fransa başda olmaqla Qərb ölkələri Ermənistanı silahlandırmaqda və onu Rusiyaya qarşı qoymaqda maraqlıdır. Təbii ki, Rusiya bununla razılaşmayaraq, əks addımlar atacaq. Elə rusiyalı hərbi-siyası analitik Yevgeni Mixaylov da bildirib ki, bu gedişlə İrəvanı yaxşı aqibət gözləmir: "Ermənistanda Ukrayna ssenarisi təkrarlana bilər. İrəvanı Kiyevin taleyi gözləyir. Qərb Ermənistanı silahlandırmaqla Cənubi Qafqaz regionunda, Rusiya Federasiyasının sərhədləri yaxınlığında münaqişə ocağı yaratmaq istəyir".
Onun sözlərinə görə, Avropa İttifaqı, xüsusilə Fransa Ermənistan vasitəsi ilə Cənubi Qafqazda vəziyyəti gərginləşdirməyə cəhd edir: "İrəvanın qərbli tərəfdaşlarına Cənubi Qafqaz regionunda, Rusiyanın sərhədləri yaxınlığında münaqişə lazımdır. Bu günlərdə Gürcüstanın Poti limanı vasitəsilə Ermənistana silah tədarükünün ilk partiyasının həyata keçirildiyini müşahidə etdik. Bu fakt onu göstərir ki, Ermənistan Qərb tərəfindən silahlandırılır. Bu nədən xəbər verir? Bu ilk növbədə ondan xəbər verir ki, Ermənistan revanş arzulayır. Lakin məsələ ondadır ki, Azərbaycan üzərində hansısa üstünlüyə nail olmaq üçün uzun illər lazımdır. Özü də təkcə silahlanma deyil, həm də ordunu hazırlamaq lazımdır. Bu birincisi, ikincisi, Azərbaycan yerində saymayacaq. Üçüncüsü isə motivasiya olmalıdır. Ermənistan ordusunda isə heç bir motivasiya yoxdur. Zəif iqtisadiyyat, genişmiqyaslı məğlubiyyət, özünün olmayan torpaqlar uğrunda mübarizə motivasiya deyil. Bu onu göstərir ki, Ermənistan xalqı növbəti tələyə düşüb. Paşinyanın qərbli kuratorlarının tələsinə". Rusiyalı ekspert vurğulayıb ki, Paşinyanın anti-Rusiya siyasəti Ermənistanın növbəti Ukraynaya çevrilməsi ehtimallarını artırır: "Düşünürəm ki, Ermənistan bu xətti davam etdirsə, Ukraynada baş verənlər təkrarlanacaq. O zaman "peçenye" paylamaqla Ukraynanı aldatdılar və Ukrayna xalqının faciəsinə səbəb oldular. Ukrayna iqtisadiyyatı tam məhv oldu. Tarixi və strateji müttəfiqinə xəyanət edənlərin sonu bu cür olur. Əgər rəsmi İrəvan da bu ruhda fəaliyyətini davam etdirəcəksə, o zaman Ermənistanı da Ukraynanın taleyi gözləyir. Hesab edirəm ki, baş verənləri Azərbaycan sakit müşahidə etməyəcək. Əlbəttə ki, Rusiya da Ermənistana NATO-nun gəlməsinə göz yummayacaq. Bəli, Ermənistana NATO gəlir, bunu birbaşa demək lazımdır. Heç bir sülhməramlı, müşahidə missiyası filan yox, birbaşa NATO gəlir. Düşünürəm ki, yaxın vaxtlarda Ermənistan üçün vəziyyət daha da pisləşəcək". Digər rusiyalı hərbi politoloq Aleksandr Perenciyev isə Ermənistanın NATO layihələrində iştirak etmək istəyinin və Gümrüdəki 102-ci Rusiya hərbi bazası ilə bağlı mğvqeyinin Moskva tərəfindən süngü ilə qarşılanacağını bildirib: "Haqqında danışdığımız Kollektiv Təhlükəsizlik Sistemi KTMT çərçivəsində qurulub. Baş qərargahlar, müdafiə nazirlikləri, dövlətlərimizin təhlükəsizlik şuraları arasında bir növ məlumat mübadiləsi, mübadilə var. Bu cür əməkdaşlıq ona gətirib çıxarır ki, Ermənistanla eyni Kollektiv Təhlükəsizlik çərçivəsində əməkdaşlıq etməyin nə dərəcədə mümkün olduğu bəlli deyil. Yəni burada hansı dərəcədə məhdudiyyət olmalıdır? Hətta bundan əvvəl də Ermənistan-ABŞ birgə hərbi təlimləri ilə bağlı məsələlər qaldırılırdı. Rusiya indi, demək olar ki, NATO ilə birbaşa qarşıdurma vəziyyətindədir, təkcə Ukrayna ərazisindən deyil, bəzi başqa ərazilərdən də danışırıq".
Tahir TAĞIYEV
