Avropa İttifaqı BMT miqyasında da Azərbaycana qarşı qərəzli hücuma keçdi...
Qulamhüseyn Əlibəyli: “Qəbul etmək istəmirlər ki, Azərbaycan öz ərazilərini işğaldan azad edib”
Avropa qurumlarının Azərbaycanla bağlı qərəzli, qeyri-obyektiv mövqeyi səngimir. BMT İnsan Hüquqları Şurasının 55-ci iclasında Avropa İttifaqının nümayəndəsi ermənilərin Qarabağı tərk etməsindən danışıb.
Aİ nümayəndəsi qeyd edib ki, ermənilərin Qarabağa könüllü, təhlükəsiz, ləyaqətli və sabit qayıtması, xüsusən də terror və ayrıseçkilik olmadan öz evlərində ləyaqətlə yaşamaq hüququ üçün şərait yaradılması mühümdür. Bundan başqa, yerli əhalinin mədəni irsi və mülkiyyət hüquqları effektiv şəkildə qorunmalı və təmin edilməlidir. BMT-nin Beynəlxalq Məhkəməsinin qərarlarının tam icrasının son dərəcə vacib olduğu vurğulanıb.
Görünən odur ki, Avropa Birliyinin Azərbaycana münasibətdə qərəzi soyumaq bilmir. Özləri qətnamə qəbul edirlər, təşkilatları çərçivəsində ölkəmizə hücumlar edirlər. Bütün bunlarla yanaşı həm də digər beynəlxalq təşkilatlarda ermənilərin lobbiçiliyini edirlər. Bunun nəticəsidir ki, BMT İnsan Hüquqları Şurasının 55-ci iclasında belə bir əsassız məsələ qaldırırlar.
“O dəyərlərin özlərinə nə Avropa İttifaqı, nə də Avropa Şurasının özü əməl edir”
Məsələ ilə bağlı “Bakı-Xəbər”ə açıqlama verən sabiq millət vəkili, hüquqşünas Qulamhüseyn Əlibəylinin fikrincə, ümumiyyətlə, Avropa İttifaqının da, Avropa Şurasının da Azərbaycana qərəzli münasibəti dəfələrlə özünü müxtəlif formalarda göstərib: “Çünki Azərbaycan öz ərazilərini azad edəndən sonra istəmirlər ki, Cənubi Qafqazda, daha sonra beynəlxalq aləmdə tədricən söz sahibinə çevrilmiş olsun. Bu cür beynəlxalq təşkilatlar istəyirlər ki, müəyyən təzyiq mexanizmləri vasitəsilə digər dövlətləri öz təsirləri altında saxlasınlar. Beləcə, müxtəlif dövlətləri öz dəyərlərinə tabe etdirsinlər. Ancaq beynəlxalq aləmdə də məlumdur ki, artıq həmin dəyərlər əhəmiyyətini itirib. O dəyərlərin özlərinə nə Avropa İttifaqı, nə də Avropa Şurasının özü əməl edir. Ona görə də başqa dövlətlər artıq Avroittifaqın hegemonluğu ilə yaşamaq istəmirlər. Qərbin diqtəsini qəbul etmək istəmirlər. Hesab edirəm ki, bunu qəbul etmək lazımdır. Hələ ki, Aİ ilə AŞ bu məsələni qəbul etmək istəmirlər. Qəbul etmək istəmirlər ki, Azərbaycan öz ərazilərini işğaldan azad edib. Azərbaycan isə əraziləri azad edəndən sonra bərpa-quruculuq işlərini həyata keçirir. Belə olduğu üçün çalışırlar ki, Cənubi Qafqaza Ermənistan vasitəsilə daxil olsunlar. O üzdən, hər vasitə ilə erməni fəaliyyətini himayə edirlər. Bu minvalla Azərbaycanı ittiham edirlər. Guya Azərbaycan Ermənistana hücum etməyə hazırlaşır. Guya Azərbaycan Qarabağ ermənilərinin hüquqlarını pozur. Məqsəd həm də Cənubi Qafqazda Ermənistandan Rusiyaya qarşı bir vasitə kimi istifadə etməkdir. Azərbaycana belə qərəzli münasibət həm də müsəlman-türk amili ilə bağlıdır. Qərb istəmir ki, regionda bu faktorun rolu artsın”.
Vidadi ORDAHALLI
