800 məktəb bərbad gündədir - hökumətdən etiraf...
Nizami Hüseynov: “Xüsusilə də ucqar kəndlərdə təmirsiz məktəblərə daha çox rast gəlinir”
İnkişaf təhsildən başlayır. Bu inkişafı da formalaşdıran təhsil ocaqlarıdır. Lakin bəzi təhsil ocaqlarında vəziyyət acınacaqlıdır və ürəkaçan deyil. Belə ki, hələ də təmirsiz vəziyyətdə olan məktəblər az deyil.
Nazirlər Kabinetinin 2023-cü il üzrə fəaliyyəti haqqında hesabatında qeyd edilir ki, Azərbaycanda təxminən 800 məktəb təmirsiz vəziyyətdədir: “2022-2026-cı illərdə sosial-iqtisadi inkişaf Strategiyasına əsasən 2026-cı ilədək maddi-texniki bazası yenilənmiş məktəblərin xüsusi çəkisinin 86%-ə çatdırılması nəzərdə tutulub”.
“Bu kateqoriyaya aid məktəblərin təmirinə biganə yanaşılır”
Təhsil eksperti Nizami Hüseynov “Bakı-Xəbər”ə açıqlamasında qeyd etdi ki, hələ də təmirsiz, istifadəyə yararsız məktəblər var. Dövlət başçısı tərəfindən prioritet məsələ kimi məktəb tikintiləri əsas götürülsə də, təəssüf ki, nazirlik tərəfindən bu istiqamətdə işlər ləng aparılır: “4430 məktəb mövcuddur, amma onlardan təxminən 800-ə yaxınının əsaslı təmirə ehtiyacı var. Xüsusilə də ucqar kəndlərdə bu tip təhsil ocaqlarına daha çox rast gəlinir. Dövlət bununla bağlı müvafiq proqramlar həyata keçirir. Hər il ölkə başçısının sərəncamı ilə modul tipli məktəblər tikilir. Bu modul tipli məktəblərin ən azından təmirsizlər bərpa olunana kimi istifadəsi mümkündür. Həmçinin modul tipli məktəb formasında tədrisin davam etdirilməsi nəzərdə tutulur. Təəssüf ki, bu tip kateqoriyaya aid olan məktəblərin təmirinə biganə yanaşılır. Şagirdlərin dərs oxumaq imkanları daha da yaxşılaşdırılmalıdır.Tədrisin təşkili və reallaşdırılmasına uyğun daha çox təhsil ocaqları olmalıdır. Onlar istilik sistemi ilə təmin olunmayan, əlverişsiz imkanlara malik siniflərdə təhsilini davam etdirə bilməyəcək. Bütün bunları müvafiq qurumlar nəzərə almalıdır. Təhsilin keyfiyyətinə birbaşa təsir göstərən əsas amillərdən biri də təhsilin mövcud infrastrukturlarından daha səmərəli, rasional və məqsədyönlü şəkildə istifadə olunması və yeni zəruri strukturların yaradılmasıdır”.
Günel CƏLİLOVA
