Ermənistan 5-ci saziş variantını təsadüfən gecikdirmir…
Turab Rzayev: “İstənilən halda, düzəlişlərə münasibətdən bilinəcək ki, gecikmənin əsl səbəbi nədir”
Prezidentin köməkçisi Hikmət Hacıyev bildirib ki, Sülh müqaviləsinin mətni nüvə fizikası deyil: “2023-cü il sentyabrın 11-də Azərbaycan tərəfi Ermənistanın cavabının yaxın vaxtlarda təqdim olunacağı ümidi ilə ikitərəfli kanallar vasitəsilə sülh sazişinin 5-ci düzəliş edilmiş variantını müvafiq izahatlarla birlikdə qarşı tərəfə təqdim edib:
"Bu ilin sonunadək sülh müqaviləsi imzalamağa hazır olduqları barədə ictimaiyyətin bəyanatlarına baxmayaraq, Ermənistan tərəfi sənədin öz variantının təqdim olunmasını iki aydan artıq gecikdirir. Azərbaycan tərəfi dəfələrlə bəyan edib ki, indi bu, tarixi fürsətdir. Xüsusilə Azərbaycanın suverenliyini bərpa etdikdən sonra sülh müqaviləsinin imzalanmasına heç bir maneə yoxdur. Ermənistanın buna nə dərəcədə hazır olması indi ciddi suallar doğurur. Sülh müqaviləsinin mətni nüvə fizikası deyil. Azərbaycanın təklif etdiyi beynəlxalq hüququn əsas prinsiplərinə uyğun olaraq, intensiv ikitərəfli danışıqlar yolu ilə sülh sazişinin mətni daha əvvəl bağlana bilər. Top Ermənistanın meydanındadır!"
Ermənistanın 5- ci saziş variantını gecikdirməkdə məqsədi nədir?
Siyasi şərhçi Turab Rzayev “Bakı-Xəbər”ə açıqlamasında bildirdi ki, Ermənistanın bu məsələdə bir neçə məqsədi ola bilər: “Birincisi budur ki, hazırda sülh müqaviləsinin bağlanması nə Ermənistana, nə də onun havadarı olan Avropa İttifaqına indiki şərtlər daxilində sərf edir. Çünki Rusiya ən ali və rəsmi səviyyədə dəfələrlə bildirib ki, Zəngəzur yolunda Rusiya hərbçiləri olmalıdır. Hətta bildirdilər ki, həmin yolda Ermənistan əsgərləri olmayacaq. Mariya Zaxarova həmin yolda birgə xidmətin aparılmasına da qarşı çıxdı. Ermənistan buna narazıdır, bu səbəbdən də Rusiya təzyiqlərini davam etdirir. Yaxın müddətdə sülh müqaviləsi imzalansa və kommunikasiya xətləri açılsa, Rusiya həmin anda Zəngəzur dəhlizini öz üzərinə götürəcək. Ola bilsin ki, Qarabağdakı sülhməramlıları aparıb ora yerləçdirsin. Bu, Ermənistanı və onun havadarlarını çox narahat edir. Onlar əmin olduqda ki, Rusiya heç bir halda Zəngəzura yerləşə bilməyəcək və Gümrüdəki Rusiya hırbi bazası ölkədın çıxarılıb, yalnız onda müqavilənin imzalanmasında maraqlı olacaqlar. İkinci səbəb, ola bilsin ki, bizim esklavlarla bağlıdır. Bu məsələ hələ də çözülməyib. Yəqin ki, Azərbaycan bununla bağlı irəliləyiş istəyir. Paşinyan bu məsələdə hərdən bir söz deyir. Onlar bilir ki, həmin kəndlər çox ciddi strateji ərazidə yerləşir. Buna görə də, prosesi yubadırlar. Mən daha çox bunu sərhədlərin dəqiqləşməsi prosesi ilə izah edərdim. Ortada xəritə problemi var. Onlar konkret olaraq 1975-ci ilin xəritəsinin üzərində durur. Biz isə bununla razılaşmırıq. İstənilən halda, düzəlişlərə münasibətdən bilinəcək ki, gecikmənin əsl səbəbi nədir”.
Ermənistanın Təhlükəsizlik Şurasının katibi Armen Qriqoryan yerli mətbuata müsahibəsində rəsmi İrəvan Azərbaycanla danışıqları davam etdirməkdə maraqlıdırsa, niyə nümayəndələri Moskvaya getmədi sualına cavab verərkən deyib ki, Ermənistan artıq razılaşmaların əldə olunduğu danışıqlara getmək istəyir:
"Sülh sazişini yekunlaşdırmaq üçün bu formatda danışıqları davam etdirməyə və mümkünsə ilin sonuna qədər sülh sazişi imzalamağa hazırıq. Bu danışıqları digər səviyyələrdə, məsələn, Vaşinqtonda davam etdirmək imkanı var. Ermənistan hazırdır və ümid edirik ki, belə bir görüş baş tutacaq”.
Ermənistan tərəfinin niyə hələ də Moskvaya getməməsi ilə bağlı sualı cavablandıran Qriqoryan buna belə cavab verib: “Biz vacib hesab etdiyimiz, hazırda fürsət gördüyümüz və aydın təkliflər aldığımız yerə gedirik”.
Məhəmmədəli QƏRİBLİ
