Ermənilərin Xankəndidən sakit köçü "xristianlığın təqibi" kimi qələmə verildi...
Robert Mobili: “Biz Azərbaycanda fəaliyyət göstərən xristian dini icmaları bu hesabata qarşı bəyanat hazırlayıb yayacağıq”
Erməni lobbisinin antiazərbaycan təbliğatı nəticəsində xristian dini ilə bağlı bəzi təşkilatlar ölkəmizlə bağlı heç bir reallığı əks etdirməyən hesabatlar yayır. Təəssüf ki, bu qurumlar gerçəyi görmək istəməyib ermənilərin verdiklərini tutuquşu kimi ötürlər.
Götürək elə “Beynəlxalq Xristian Narahatlığı” təşkilatının (“Persecutors of the year”) antiazərbaycan hesabatını. 2023-cü ili əhatə edən hesabatda Azərbaycanla bağlı həqiqətə uyğun olmayan iddialar yer alıb.
Qəribədir ki, bu təşkilat heç bir araşdırma aparmadan, həqiqəti görmək istəmədən ermənilərin Qarabağdan mütəşəkkil və təhlükəsiz, könüllü miqrasiya edərək İrəvana köçməsini “Azərbaycanda xristianların təqibi kimi qələmə verir”. İddia edir ki, guya ermənilərin Qarabağdan köçüb getməsi “xristianların təqib edilməsi” ilə “bağlıdır”. Guya 100 min erməni bu səbəbdən ölkəmizin ərazisini tərk edib. Çox təəssüf ki, bu təşkilat heç bir reallığa əsaslanmadan sonuncu 2023-cü ilki hesabatında “xristianların təqib edildiyi” 10 ölkə arasında Azərbaycanın da adını qeyd edib. Məlumdur ki, təşkilat tərəfindən hazırlanan hesabatda əsasən ölkəmizin öz ərazi bütövlüyünü bərpa etdikdən sonra Qarabağdakı erməni əsilli vətəndaşlarımızın könüllü olaraq Ermənistana miqrasiyası “etnik təmizləmə” və ya “dini əsaslı təqib” kimi qiymətləndirilməklə Azərbaycana haqsız olaraq böhtan atılıb.
“Bu hesabat məqsədli şəkildə hazırlanıb, burada erməni lobbisinin əli var”
Alban-Udi Xristian Dini İcmasının sədri Robert Mobili “Bakı-Xəbər”ə şərhində bildirdi ki, ermənilər 44 günlük müharibədə uduzduqları üçün Azərbaycanı qaralamaqda davam edirlər. Sözügedən qurumun hesabatına gəlincə, R.Mobili qeyd etdi ki, burada əks olunanlar həqiqəti əks etdirmir, Azərbaycanda xristian dini mənsublarına qarşı hər hansı bir təqibdən söhbət gedə bilməz. Hesabatın ABŞ-dakı erməni lobbisinin və ermənipərəst qüvvələrin təsiri ilə hazırlandığına şübhə etməyən R.Mobili “ermənilərin Xankəndidən İrəvana könüllü şəkildə miqrasiya etdiyi faktdır. Onlar heç bir təzyiqə məruz qalmayıblar. Biz Azərbaycanda fəaliyyət göstərən xristian dini icmaları bu hesabata qarşı bəyanat hazırlayıb yayacağıq”-deyə bildirdi.
R.Mobilinin sözlərinə görə, rus pravoslav kilsəsi, katolik, lüteran kilsəsi təmsilçiləri, alban-Udi Xristian İcması və başqa xristian dini təşkilatları bir yerdə bu bəyanatı hazırlayır. Əvvəlki dövrdə ABŞ Dövlət Deportamentində iki dəfə görüşləri olduğunu deyən R.Mobili qeyd etdi ki, o vaxt da “dini azlıqların sıxılma” məsələsini ortaya atmışdılar. “Biz o vaxt bu məsələni narazılıqla qarşıladıq və gəlib baxdılar, gördülər ki, vəziyyət başqa cürdür, onların bildiyi kimi deyil. Yəni ayrı-ayrı vaxtlarda Azərbaycana qarşı belə əsassız yanaşmalar olub.
Sözügedən təşkilatın sonuncu hesabatında isə Xankəndini könüllü tərk edən ermənilərin oradan guya “xristianların təqib” edilməsi səbəbindən köçdükləri iddia olunub. Təəssüf doğuran məqamlardan biri odur ki, Azərbaycanı həqiqətən də bu məsələdə sıxıntı olan ölkələrin 10-luğuna salıblar. Bizim ölkəmizin “xristianların təqib” olunduğu ölkələrin 10-luğuna salınması dəhşətdir, gülməlidir və absurddur. Bu hesabat ermənilər özxoşuna Xankəndidən gedəndən sonra çıxdı. Burada məsələ ancaq ermənilərlə bağlıdırsa, onda təkcə ermənilərdən danışsınlar, ümumi xristianları niyə bura salırlar? Azərbaycanda xristianların təqibindən söhbət gedə bilməz, burada belə bir məsələ yoxdur. Gəlib baxsınlar, tanış olsunlar, görsünlər ki, iddiaları əsassızdır. Ermənilər dünyaya qışqırırlar ki, guya Azərbaycanda xristianları sıxırlar. Burada təkcə ermənilər xristian idi? Başqa xristianlar yoxdur ki? Cənab Prezident ermənilərə üz tutub dedi ki, yaşamaq istəyirsinizsə başqa xalqlar kimi siz də qalıb yaşayıb. Biz buna bariz nümunəyik, yaşayırıq. Ermənilər niyə separatizmə əl atdılar ki, indi də “burada yaşamaq mümkün deyil” deyib dünyaya qışqırırlar?
Siz hesabata fikir versəniz görərsiniz ki, ora müxtəlif maddələr salıblar, guya bu məsələ həmişə olub. Bu hesabat məqsədli şəkildə hazırlanıb, burada erməni lobbisinin əli var. Kaliforniyada yaşayan ermənilərin sayı Ermənistanda yaşayan ermənilərdən çoxdur. Orada onların çox güclü diasporu, lobbisi var ki, bu cür çirkin işlərlə məşğuldurlar. Bu çox ciddi məsələdir və bunu da erməni lobbisi qaldırır. Orada həm də ermənilərdən səs almaq üçün onlara dəstək verən senatorlar var. Onlara sərf edir ki, bu məsələni qaldırmaqla gələcəkdə seçkilərdə səs yığsınlar.
Təbii ki, hesabatda əks olunanlar yalandır, həqiqəti əks etdirmir. Biz bu hesabatda yer alan məsələlərin əleyhinə bəyanat yayacağıq və fikrimizi tam olaraq orada bəyan edəcəyik. Ermənilər hər zaman din faktorundan sui-istifadə edirlər, kilsədən, mədəni irsdən yapışırlar. 44 günlük müharibə yeni başlayanda onlar bunu dini zəmində baş verən müharibə kimi qələmə verməyə çalışırdılar. Bu müharibəyə birinci dini don geydirmək istəyirdilər, ikinci milli məsələdən yapışırdılar. Amma onlar nə dini, nə də etnik baxımından heç nə bacarmadılar. Yenə də deyirəm, ermənilər 44 günlük müharibədə uduzduqları, Qarabağı itirdikləri üçün bu cür əsassız iddialar səsləndirirlər ki, ermənilərin Xankəndidən köç etməsinin səbəbi guya “xristianların təqibi”dir. Bu da ki, gerçəkliyi ifadə etmir”-deyə R.Mobili əlavə etdi.
Ermənilərin məqsədi Qarabağda guya “qədimdən yaşadıqlarını”, eləcə də buradakı alban-xristian abidələrinin, kilsələrin ermənilərə aid olduğunu dünyaya yaymaq və öz yalanlarını təbliğ etməkdir. Ermənilərin Qarabağda yeparxiya yaratmaq niyyətinin də olduğunu deyən R.Mobili hesab edir ki, bu da onların kilsə yolu ilə ərazi iddialarını yenidən oraya qoymasıdır, buna isə yol vermək olmaz. O bildirdi ki, yeparxiyanın yaradılması gələcəkdə erməni keşişlərinin gəlib burada xeyir-dua verməsi ilə nəticələnə bilərdi, bu isə yolverilməzdir. “Yeparxiyanın olması o torpağın sahibi olmaq deməkdir, buna yol vermək olmaz. Ermənilər dünyaya yalandan yayırlar ki, guya alban kilsələri onlara aiddir və sair. Görürlər ki, Qarabağ əldən gedib, Azərbaycan öz ərazilərində möhkəmlənib, ərazi bütövlüyünü təmin edib, Paşinyan da Azərbaycanın ərazi bütövlüyünü tanıyıb, imzası ilə 86, 6 kvadratmetrlik ərazimizi tanıdığını təsdiqləyib, bundan sonra yenidən hay-küy salırlar. İmza məsələsi çox ciddidir. İndi də yeparxiya məsələsini, din xadimlərinin orada xeyir-dua alması məsələsini qaldırırar. Bunlar isə absurddur. İndi əsas hədəfləri odur ki, alban kilsələri dünyaya “erməni kilsə”ləri, “erməni irsi” kimi təbliğ olunsun. Bunu da gələcəkdə yenə ərazi iddiası qadırmaq üçün edirlər”-deyə R.Mobili vurğuladı.
R.Mobili əlavə etdi ki, alban kilsəsinin müstəqilliyinin bərpa edilməsi vacibdir və biz bu yöndə daha ciddi çalışmalıyıq.
İradə SARIYEVA
