İrəvan 4 kəndi qaytarmaq üçün ağılsız şərt qoydu...
Elxan Şıxəliyev: “Ermənistan, sanki nəticələrdə karlı çıxmaq üzərinə, sülh sazişinin bağlanmasında öz təkliflərini Azərbaycana qəbul etdirmək istəyir”
Erməni mənbələri yazır ki, Baş nazir Nikol Paşinyan Azərbaycanın tələb etdiyi 4 kəndi geri qaytarmağa hazırdır, ancaq bunun qarşılığında Azərbaycan Ordusunun sərhəddəki strateji yüksəklikləri tərk etməsini istəyib.
Həmin kəndlər boşdur və Ermənistan üçün elə bir əhəmiyyəti yoxdur. Azərbaycanın digər ərazilərinə bitişik 4 kəndin geri qaytarılması Ermənistanın özü üçün faydalıdır ki, danışıqlarda müsbət atmosfer formalaşacaq. Buna baxmayaraq, Paşinyan həmin 4 kənddən alver predmeti kimi istifadə etməklə qarşılığında nəsə qazanmaq istəyir. Bakı buna razı olarmı və ümumiyyətlə bu məsələdə niyə şərt olmalıdır?
Hərbi-siyasi ekspert, ehtiyatda olan polkovnik-leytenant Elxan Şıxəliyev “Bakı-Xəbər”ə açıqlamasında bildirdi ki, Azərbaycanla Ermənistan arasında Xarici İşlər Nazirliyi səviyyəsində müzakirələr davam edir: “12 fevralda beş ay müddətində sülh sazişinə gedən yolun nəticələri Ermənistan tərəfindən atəşkəsin pozulması, hərbiçimizin yaralanması ilə sıfırlandı. Münhen təhlükəsizlik konfransından sonra Ermənistan baş naziri ilə Azərbaycan Prezidentinin görüşü oldu. Bu görüşdən sonra xarici işlər nazirlərinin Almaniyada görüşləri oldu. Bu müzakirələrin içində əsas mövzu Azərbaycanla birbaşa sərhəddə anklav vəziyyətdə olan 4 kəndin qaytarılması idi. Digər bir məsələ isə Zəngəzur dəhlizinin açılması, kommunikasiyaların və sərhədin delimitasiya, demarkasiyasıdır. Ancaq Azərbaycanın Ermənistanın anklavlarının geri qaytarılması qarşılığında, Ermənistanda, arqument olaraq, Azərbaycanın Ermənistanın şərti sərhəd üzərindən kəndlərinin, bəzi ərazilərinin bizim nəzarətimizdə olmasının müzakirələri gedir. Strateji yüksəkliklərdən geri çəkilmə, onların Avropadakı tərəfdaşlarının Ermənistanın təklifləri üzərinə güzgü prinsipi ilə qoşunlarının geri çəkilməsi də bu məsələyə hesablanıb. Halbuki, sərhəd yoxdursa, burada tərəflərin razılığı üst - üstə düşmür. Biz 8 kənd dediyimiz üçün, Ermənistan da bunun qarşılığında qeyd etdiyimiz məsələni masaya yatırmağa çalışır. Ona görə də, bu məsələlərin müzakirəsi uzanacaq kimi görünür. Düşünmürəm ki, müharibələr tarixində qalib tərəfin təsniflərini məğlub tərəfin müzakirə predmetinə çevirməsi nümunəsi olsun. Biz görürük ki, Ermənistan, sanki nəticələrdə karlı çıxmaq üzərinə, sülh sazişinin bağlanmasında öz təkliflərini Azərbaycana qəbul etdirmək istəyir. Sanki qalib tərəf biz yox, Ermənistandır. Onu da bir az cəsarətləndirirlər. Fransa hərbi gücü ilə Ermənistana dəstək olmağa çalışır. Ona görə də, hesab edirəm ki, sülh danışıqları tərəflərin sırf sərhəd və ərazilər üzərindən müzakirəsi üzündən çox vaxt aparacaq”.
Məhəmmədəli QƏRİBLİ
