Ombudsmanın "ayrıca həbsxanalar" təklifi mübahisəli qarşılandı...
Təhlükə törətməyən və az ağır cinayət törətmiş 18-24 yaş arası məhkumlar üçün xüsusi cəzaçəkmə müəssisəsinin yaradılması müzakirə edilir. Bu, Azərbaycanın İnsan hüquqları üzrə müvəkkilinin (ombudsmanın) 2023-cü il üzrə məruzəsində əksini tapıb.
Ombudsman cəza-icra qanunvericiliyində və digər qanunvericilik aktlarında xüsusi ictimai təhlükə törətməyən və az ağır cinayət törətmiş 18-24 yaş arası məhkumların fərqli rejimdə cəza çəkməsinə imkan verən dəyişikliklərin edilməsi və belə məhkumların cəzasını çəkməsi üçün xüsusi cəzaçəkmə müəssisəsinin yaradılmasını məqbul hesab edib.
Şəmsəddin Əliyev: "Gənclər üçün xüsusi cəzaçəkmə müəssisələrinin yaradılmasına ehtiyac yoxdur, çünki…"
Kriminalist Şəmsəddin Əliyev "Bakı-Xəbər"ə açıqlamasında qeyd etdi ki, hüquq və azadlıqların təmin olunması Azərbaycan dövlətinin ali məqsədidir: "18-24 yaş arası məhkumlar üçün xüsusi cəzaçəkmə müəssisəsinin yaradılması təklifi normaldır. Ancaq belə bir layihənin icrası dövlət büdcəsindən kifayət qədər vəsaitin sərf olunmasına səbəb olacaq. Nəzərə almaq lazımdır ki, hazırki cəzaçəkmə müəssisələri Avropa standartlarına uyğun səviyyədə hazırlanıb. Həmin cəzaçəkmə müəssisələrinin xüsusi gəzinti yeri, televizora baxmaq, kitab oxumaları üçün şərait yaradılıb. Belə olduğu halda gənclər üçün xüsusi cəzaçəkmə müəssisələrinin yaradılmasına ehtiyac yoxdur".
Həmsöhbətimiz hesab edir ki, əsas diqqət gənclərin islah olunmasına yönəlməlidir. Gələcəkdə təkrar cinayət əməli törətməyə meylli olmaması üçün onların islah olunmasına diqqət edilməlidir: "Hazırda cəzaçəkmə müəssisəsindən çıxan gənclərin islah olunub-olunmaması şübhə altındadır. Mən deyərdim ki, cəzaçəkmə müəssisəsindən çıxan gənclərin 99 faizi islah olunmur, 1 faizi isə islah olunur. Bu məsələyə xüsusi fikir verilməlidir".
Ş.Əliyev onu da əlavə etdi ki, az ağır cinayət törətmiş şəxslərin cəzası ağır olmur. Bu şəxslərə şərti və yüngül cəzalar verilir: "Ümumiyyətlə, cinayət törədən şəxsə cəza ona görə verilir ki, bu digərlərinə dərs olsun. Cəzanın vahiməsi insanlarda qorxu yaratmalıdır ki, cinayətə meyl azalsın".
Hüseyn Axundov: "Az ağır cinayət törədən gənclər üçün xüsusi cəzaçəkmə müəssisələri yaradıla bilər"
Hüquqşunas Hüseyn Axundov "Bakı-Xəbər"ə şərhində bildirdi ki, az ağır cinayət törədən gənclər üçün xüsusi cəzaçəkmə müəssisələri yaradıla bilər. Həmin cəzaçəkmə müəssisələrində cəza çəkəcək şəxslər daha çox kitab oxuyacaq, özlərini inkişaf etdirməyə çalışacalar: "Ağır cinayət törədən şəxslə az ağır və ya yüngül cinayət törədən eyni mühitdə olmamalıdır".
Günel CƏLİLOVA
