AŞPA-nın Azərbaycan haqda qərarına qarşı etirazlar böyüyür...
Qulamhüseyn Əlibəyli: “Bütün bunlar qətnamənin ləğvi üçün kifayət qədər hüquqi əsaslar yarada bilər”
Azərbaycanla bağlı AŞPA-ya təzyiqlər artır. Macarıstan Milli Assambleyasının AŞPA-da nümayəndə heyətinin rəhbəri Jolt Nemet AŞPA-nın sədri Teodoros Rusopulosa qurumun qış sessiyası zamanı Azərbaycan nümayəndə heyətinin səlahiyyətlərinin ratifikasiya olunmamasına dair qəbul etdiyi 2527 (2004) saylı qətnamə ilə əlaqədar məktub ünvanlayıb.
Məktubda qeyd olunub ki, Azərbaycan nümayəndə heyətinin qurumda iştirakı məsələsi təcili qaydada həll olunmalıdır: “Biz əminik ki, aparılan son müzakirələr və Nazirlər Komitəsinin müvafiq qərarı da bu zərurəti əks etdirməkdədir”. Bundan başqa, QDİƏTPA-nın vitse-prezidenti və qurumdakı Türkiyə nümayəndə heyətinin rəhbəri Fatih Dönmez, vitse-prezident və Albaniya nümayəndə heyətinin rəhbəri Petro Koçi, vitse-prezident və Gürcüstan nümayəndə heyətinin rəhbəri Ramaz Nikolaşvili, Ukrayna nümayəndə heyətinin rəhbəri Anna Purtova və Yunanıstan nümayəndə heyətinin rəhbəri Konstantinos Vlasis AŞPA prezidenti Teodoros Rusopulosa QDİƏTPA-nın Beynəlxalq Katibliyi adından məktub ünvanlayıb analoji tələblə çıxış ediblər.
Görünən odur ki, AŞPA-nın Azərbaycan haqda qərarına qarşı etirazlar getdikcə böyüyür.
“Qərara etiraz edən deputatlarla iş aparmaq, təmasları daha da genişləndirmək lazımdır”
Məsələ ilə bağlı “Bakı-Xəbər”ə açıqlama verən sabiq millət vəkili, hüquqşünas Qulamhüseyn Əlibəyli ümumən bu yondə AŞPA-ya çağrışların edilməsinə müsbət yanaşdı: “Ümumiyyətlə, hesab edirəm ki, AŞPA-nın məlum qərarına etiraz edən parlament üzvlərinin, beynəlxalq təşkilatların sayının artması, müxtəlif dövlətləri əhatə etməsi müsbət hadisə kimi qiymətləndirilməlidir. Bu o deməkdir ki, AŞPA üzvlərinin heç də hamısı Azərbaycana qarşı qətnamənin qəbul olunmasında maraqlı olmayıb. Onlar artıq Azərbaycanın qətnamənin əsassız olmasını, siyasi mülahizələrdən irəli gəlməsini, lobbiçilik fəaliyyəti nəticəsi olduğunu qəbul edirlər. Həmçinin getdikcə buna etiraz edənlərin dairəsinin genişlənməsi qətnamənin ləğvi üçün kifayət qədər hüquqi əsaslar yarada bilər. Ancaq bir məsələni nəzərə almaq lazımdır ki, qətnamənin ləğv olunması, Azərbaycan nümayəndə heyətinin səlahiyyətlərinin bərpa olunması AŞPA-nın yaz sessiyasında baş tuta bilər. Sessiya da adətən aprelin sonunda keçirilir. Çünki AŞPA rəhbərliyi öz-özlüyündə qurumun qərarını ləğv etmək səlahiyyətinə malik deyil. Eyni zamanda o da inandırıcı görünmür ki, rəhbərlik AŞPA-nın qərarının ləğv edilməsi üçün öz təşəbbüsü ilə layihə irəli sürsün. Ona görə də hesab edirəm ki, AŞPA qərarına etiraz edən deputatlarla iş aparmaq, təmasları daha da genişləndirmək lazımdır. Nəticədə AŞPA-nın yaz sessiyası işə başlayan kimi, Azərbaycanla bağlı qətnamənin ləğvi istiqamətində işə başlanılsın. Deməyim odur ki, bununla bağlı qətnamə layihəsi hazırlanmalıdır. Sessiya başlamazdan əvvəl qətnamə layihəsi hazırlanmalıdır. Eyni zamanda, bununla bağlı AŞPA rəhbərliyinə müraciət etmək lazımdır”.
Vidadi ORDAHALLI
