Qərb Ermənistanda möhkəmlənir, Rusiya və İran qıcıqlanır, yeni geosiyasi qarşıdurma başlanır...
Birmənalı həqiqətdir ki, Azərbaycanın öz ərazi bütövlüyünü və suverenliyini təmin etməsi Ermənistana havadarlıq edən ölkələri, beynəlxalq dairələri ciddi narahat edir. Elə bunlardan irəli gəlir ki, həmin qüvvələr tərəfindən Ermənistanın silahlandırılmasına başlanılıb. İndi bu prosesdə Fransa öndə gedir.
Artıq Fransa istehsalı olan çoxsaylı hərbi texnikaların Ermənistana göndərilməsi ilə bağlı faktlar qeydə alınır. Görünən odur ki, Fransa Ermənistanı silahlandırmaqla Cənubi Qafqazda yenidən müharibəni alovlandırmaq məqsədi güdür. Bu prosesdə ümumuyyətlə Qərb ölkələrinin fəaliyyəti də hiss edilir. Artıq açıq formada müşahidə edilir ki, Qərb dünyası Ermənistanı yeni geosiyasi çəkişmə məkanına çevirir. O səbəbdən bura hərbi texnika ilə yanaşı, müşahidə missiyası adı altında hərbi qüvvələr də yerləşdirlir. Avropa İttifaqının Ermənistandakı müşahidə missiyasının tərkibinin və fəaliyyət sferasının genişləndirilməsi istiqaməti də buna dəlalət edir. Kanadadan sonra ABŞ-ın da bu missiyaya qoşulmaq istəyi, Avropa İttifaqının Sülh Fondunun Ermənistanda fəaliyyətə başlaması Qərbin Cənubi Qafqazda vəziyyəti gərginləşdirmək niyyətlərindən xəbər verir. Ermənistan xarici işlər nazirinin müavini Paruyr Hovhannisyan Avropa İttifaqının Xarici Əlaqələr Şurasının Ermənistanda yerləşdirilən sərhəd monitorinq missiyasını genişləndirmək qərarını şərh edərkən bildirib ki, ölkəsində Avropa İttifaqının Monitorinq Missiyasının üzvlərinin sayının artırılması ilə bağlı razılaşma var. Hovhannisyan vurğulayıb ki, Avropa İttifaqının Ermənistandakı missiyasının genişləndirilməsi uzun müddətdir müzakirə olunur: “Müşahidəçilərin sayının artırılması, onların potensialının gücləndirilməsi ilə bağlı qərar var ki, bu da monitorinqlə bağlı daha fəal iş aparmağa, Brüsselə və üzv dövlətlərə müvafiq hesabatlar təqdim etməyə imkan verəcək və sərhədlərimizdə sabitliyi daha da gücləndirəcək”.
Avropa İttifaqının xarici əlaqələr və təhlükəsizlik siyasəti üzrə ali nümayəndəsi Cozep Borrell də bu fonda qeyd edir ki, qurumun Ermənistanın Azərbaycanla sərhədində missiyası gücləndirilir. Onun sözlərinə görə, missiya sərhədin həssas bölgələrində patrulların sayını artıracaq. O, təxribatçı açıqlama da verib: “Biz Ermənistanda sabitliyi pozmağa yönəlmiş istənilən cəhdlərə qarşı xüsusilə ayıq olmalıyıq – istər daxildən, istərsə də xaricdən. Azərbaycana mesajım aydın idi: Ermənistanın ərazi bütövlüyünə xələl gətirmək cəhdləri qəbuledilməz olacaq və münasibətlərimizin keyfiyyəti üçün ağır nəticələr doğuracaq”. Azərbaycan Xarici İşlər Nazirliyi artıq buna cavab verib. Qurum qeyd edir ki, Borrell tərəfindən Azərbaycan əleyhinə səsləndirilmiş, regiondakı reallıqları qəsdən təhrif edən ittihamlar tamamilə qeyri-adekvat və qəbuledilməzdir. Bildirilib ki, Avropa İttifaqının 30 ilə yaxın müddətdə ölkəmizin suveren ərazilərinin Ermənistan tərəfindən hərbi təcavüzə məruz qalmasına biganə yanaşması, azərbaycanlılara qarşı etnik təmizləmə siyasəti və insanlıq əleyhinə cinayətləri, 1 milyondan çox azərbaycanlının məcburi köçkün və qaçqın vəziyyətinə düşməsi faktını qınamaqdan çəkinməsi fonunda Ermənistana ifadə olunan dəstək və Azərbaycana qarşı təhdid dolu ifadələr bu qurumun qərəzli siyasətinin və ikili standartlarının bariz nümunəsidir. Aİ Xarici Fəaliyyət Xidmətinin bu və digər bölgələrdə sərgilədiyi riyakar yanaşmalardan da göründüyü kimi, bu qurum yanlış addımların qurbanına çevrilib. Bununla yanaşı, Ermənistanı beynəlxalq hüququn norma və prinsiplərinə uyğun hərəkət etməyə təşviq etmək üçün heç bir addım atmayan Aİ-nin nümayəndəsinin səsləndirdiyi ittihamlar Azərbaycanın ərazi bütövlüyü və suverenliyinə qarşı təhdiddir: “Bir daha xatırladırıq ki, istər 44 günlük Vətən müharibəsi, istərsə də cari ilin sentyabr ayında 24 saatlıq antiterror tədbirləri ölkəmizin suveren ərazilərində həyata keçirilib. Azərbaycan beynəlxalq hüququn norma və prinsipləri çərçivəsində legitim üsullarla öz suverenliyini bərpa edib. Aİ üzv ölkələri aqressiv separatizm meyllərindən əziyyət çəkdiyi halda, Azərbaycanın öz suveren ərazilərində mövcud təhdidlərə qarşı haqlı mübarizəsinə münasibətdə Aİ-nin xarici siyasət qurumunun ölkəmizin ərazisində separatizmi qızışdırması cəhdləri ciddi narahatlıq mənbəyidir. Aİ tərəfinin Ermənistanı silahlandırmaq və bununla bölgəmizdə sülh və sabitliyə mane olan məkrli hərbiləşmə siyasətini dəstəkləmək səyləri, bölgəmizdə yeni qarşıdurmalara sürükləyən siyasətin təşviq olunmasıdır və bunun məsuliyyəti eyni zamanda Aİ-nin üzərinə düşür. Bu məqsədlə, digər sahələrlə yanaşı hərbi potensialın gücləndirilməsini nəzərdə tutan Avropa Sülh Təşəbbüsündən istifadə edilməsi planları bölgədə gərginliyin artmasına xidmət edir. Bir daha xatırladırıq ki, Azərbaycanla təhdid dili ilə danışmaq qəbuledilməzdir və hər hansı qeyri-dost hərəkət müsbət nəticələnməməklə yanaşı, adekvat şəkildə cavablandırılacaq”. Qərəzli mövqedə olan Aİ-nin Ermənistana hərbi texnika və qüvvə cəmləşdirməsi, şübhəsiz ki, sülhə xidmət etmir. Eyni zamanda bu hal Ermənistanı Rusiya və İranın da qəzəbinə tuş gətirir. Çünki belə vəziyyətdə Qərb qüvvələrinin Ermənistana cəmləşməsinə Rusiya və İran çətin ki, göz yumsun. Elə bu da Ermənistanın sürətlə yeni Ukraynaya çevrildiyini göstərir.
Nahid SALAYEV
