Qriqoryan 12 fevral Zəngilan təxribatında Rusiyanı məsul tutdu...
Akif Nağı: “Rusiyanın bu şəkildə ittiham edilməsi Rusiya-Qərb qarşıdurmasını dərinləşdirməyə xidmət edir”
Ermənistanın Zəngilan istiqamətində törətdiyi hərbi təxribata görə məsuliyyət daşıdığını etiraf etmək əvəzinə, Ermənistan Təhlükəsizlik Şurasının katibi Armen Qriqoryan Rusiyanı son sərhəd hadisələrinə müdaxilə etməməkdə günahlandırıb.
"Aİ missiyasının buraya çıxışı yoxdur, ora yalnız Rusiyanın çıxışı var. Onlar bu hadisəyə müdaxilə etmədi idilər, lakin Rusiya bu insidentin qarşısını ala bilmədi”-deyə Qriqoryan bildirib.
Qriqoryan Rusiya Xarici İşlər Nazirliyinin rəsmi nümayəndəsi Mariya Zaxarovanın, Aİ missiyasının müşahidəçilərindən fərqli olaraq, KTMT-nin Cənubi Qafqazda stabilləşdirici rol oynamağa qadir olması fikri ilə razılaşmayıb. “Mən əminəm ki, reallıq başqadır. Aydındır ki, Aİ-nin mülki missiyası sabitləşdirici rol oynayır. Biz onların fəaliyyətini tam dəstəkləyirik və bundan sonra da dəstəkləyəcəyik”, - deyə Qriqoryan bildirib.
Xatırladaq ki, Ermənistanın sərhəddə törətdiyi son təxribata cavab olaraq Azərbaycan DSX "Qisas əməliyyatı" keçirmişdi, 4 erməni həmin əməliyyat zamanı ölüb.
“Hadisənin mahiyyətini dəyişmək istəyirlər...”
Ermənistanın Təhlükəsizlik Şurasının sədri A.Qriqoryanın sərhəd təxribatına görə Rusiyanı ittiham etməsinin səbəblərinə şərh verən Azad Vətən Partiyasının sədri Akif Nağı “Bakı-Xəbər”ə bildirdi ki, erməni tərəfi bu açıqlmada bir neçə məqsəd güdür: “Rusiyanı ittiham edirlər, bununla da onun regiondakı rolunu şübhə altına almaq istəyirlər, Rusiya ilə Ermənistan arasındakı qarşıdurmanı dərinləşdirirlər. Təbiidir ki, Ermənistan həmişə sifarişlə hərəkət edib, Qərbin, Avropa ölkələrinin, ABŞ-ın sifarişi ilə Rusiyaya qarşı bu əhval-ruhiyyə yaradılır. Bütün bunlar Rusiyanın regiondan çıxarılması üçündür. Sözsüz, Rusiya regiondan, Azərbaycandan çıxmalıdır. Bu birmənalıdır. Amma bu məsələdə, Qərb-Rusiya qarşıdurmasında Ermənistan alət olmaq istəyirsə bu onun öz işidir, özləri bilərlər. Onsuz da ermənilər həmişə alət rolundadırlar. Doğrudan da onlar Rusiyaya qarşı dayanmaq istəyirlərsə, birinci prosesə öz ərazilərindən başlamalıdırlar. Ermənistan ərazisində Rusiyanın hərbi bazaları yerləşir. Gümrü də, İrəvan da faktiki olaraq Rusiya hərbçilərinin nəzarəti altındadır, Ermənistanın sərhədlərini Rusiya hərbçiləri qoruyur. Ordan başlasınlar, Ermənistanla Azərbaycan sərhədində - Zəngilanda baş verən hadisələrdən istifadə etməsinlər. Hadisənin mahiyyətini dəyişmək istəyirlər, guya onlara Azərbaycan tərəfindən hansısa təcavüz olub, Azərbaycanı ədalətsiz mövqedə ittiham etməyə çalışırlar. Məsələnin bu tərəfi də var. Ona görə də həqiqət ortaya qoyulmalıdır ki, atəş ordan açılıb, Azərbaycan isə cavab atəşi ilə hərəkət edib. Nerkin And kəndinin adına gəlincə, bizdə də bu adı işlədirlər. Aşağı And kəndi Qafan rayonu ərazisində yerləşir. Onların iddialarına görə, bu kənd Azərbaycan hərbçilərinin vizual nəzarəti altındadır. Yəni erməni mətbuatında çoxlu gliey-güzar edirlər ki, guya kəndi Azərbaycan əsgərləri “qorxu içində” saxlayır və sair. Təbii ki, Azərbaycan bir neçə yüksəkliyi götürüb və həmin yüksəklikləri götürdüyünə görə Aşağı And kəndi də müəyyən mənada Azərbaycan hərbçilərinin nəzarəti altındadır. Amma bundan hansısa şou düzəltmək, Azərbaycana qarşı təbliğat kampaniyasında istifadə etmək yolverilməzdir”.
A.Nağının sözlərinə görə, Aİ missiyasının Ermənistan ərazisində olmasına heç bir ehtiyac da yox idi, onlar orada nəyi müşahidə edəcəkdilər? “İddia edirlər ki, Rusiya sülhməramlıları ora da müdaxilə edə bilərdilər, etmədilər. Rusiyanın bu şəkildə ittiham edilməsi Rusiya-Qərb qarşıdurmasını dərinləşdirməyə xidmət edir”-deyə qeyd edən A.Nağı əlavə etdi ki, biz öz nəticələrimizi çıxarmalıyıq və Ermənistanın sülh danışıqlarına sadiq olmadığını, sülh müqaviləsini imzalamaq istəmədiyini bilməliyik. “Ermənistan Qərbin Rusiyaya qarşı sifarişlərini yerinə yetirir. Rusiya ilə birgə Azərbaycanı da ittiham etməyə çalışır. Qriqoryan belə təsəvvür yaratmaq istəyir ki, guya Rusiya ilə Azərbaycan bir yerdədir. Deyir ki, Rusiya sülhməramlıları məsələyə müdaxilə etməli idi, amma etmədilər. Bunu Qərbin diqqətinə çatdırmaq istəyirlər ki, guya Azərbaycana Rusiya şərait yaradır. Əslində Azərbaycan müstəqil siyasət yürüdür, müstəqil, sərbəst şəkildə öz qərarlarını verir. Azərbaycana qarşı hər hansı bir təxribat törədilməsə, Azərbaycan da faktiki olaraq formalaşmış sülh şəraitinə əməl edir. Azərbaycan Prezidenti də bir neçə dəfə çıxışında bildirib ki, faktiki olaraq heç kimin vasitəçiliyi olmadan Azərbaycan və Ermənistan ərazisində sülh şəraiti bərqərar olunub. Bunu Azərbaycan rəhbərliyi razılıq hissi ilə qeyd edirdi. Amma görünür, ermənilərə bu sülh şəraiti sərf etmir, ona görə təxribat törədiblər” - deyə A.Nağı qeyd etdi.
İradə SARIYEVA
