Paşinyan sərhədlərdən “güzgülü çəkilməni” əsas danışıq mövzusuna çevirmək istəyir...
İbrahim Rüstəmli: “Güzgü prinsipini ortaya atmaq sülh prosesini süni şəkildə tormozlamaq deməkdir”
“Qoşunların güzgü prinsipi ilə geri çəkilməsi Ermənistan-Azərbaycan sərhədində insidentlərin qarşısını almağa imkan verəcək”. Bunu Ermənistan Təhlükəsizlik Şurasının katibi Armen Qriqoryan yerli mediaya açıqlamasına deyib.
O, Azərbaycan qoşunlarının çıxarılmasının Ermənistanın gündəliyində olduğunu deyib: “Biz bu məsələdə Azərbaycanla razılığa gəlməyə çalışacağıq, çünki bu, hər iki tərəfin razılaşdığı məsələdir. Ermənistan tamamilə əmindir ki, qoşunların güzgü prinsipi ilə çıxarılması insidentlərin qarşısını almaq üçün ən yaxşı vasitələrdən biridir. Silahlı Qüvvələr müəyyən məsafədə yerləşərsə və sərhəd qoşunları bütün sərhəd boyu yerləşdirilərsə, təbii ki, bu, sabitlik amili olar”.
Lakin Qriqoryan rəsmi Bakının qoşunların güzgü prinsipi ilə çəkilməsinə qarşı olmasının səbəbini izah etməkdə çətinlik çəkib.
Maraqlıdır, Ermənistan güzgü qaydasında sərhəddən qoşunların çəkilməsinə niyə belə önəm verir və niyə Azərbaycan bunu edə bilməz?
“Bu o deməkdir ki, Silahlı Qüvvələrimiz tutduqları strateji mövqelərdən geri çəkilməlidilər”
Məsələ ilə bağlı “Bakı-Xəbər”ə açıqlama verən hərbi ekspert İbrahim Rüstəmli Ermənistanın güzgü prinsipində belə israr etməsini bir sıra amillərlə əlaqələndirdi: “Ermənistanın güzgü prinsipində israr etməsi tək bu ölkə ilə bağlı olan məsələ deyil. Məsələ ondadır ki, Ermənistanın bir sıra havadarları, xüsusən də Fransa güzgü prinsipinə xüsusi önəm verir və rəsmi İrəvanı buna təhrik edirlər. Bu traktovka əsasən Makron hökuməti tərəfindən formalaşdırılıb. Çünki bu, daim regionda gərginliyi saxlamağa və bundan da Fransanın öz maraqları üçün istifadə etməsinə zəmin yaradır. Ermənistan yaxşı bilir ki, Azərbaycan güzgü prinsipi ilə razılaşmayacaq. Bu o deməkdir ki, Silahlı Qüvvələrimiz tutduqları strateji mövqelərdən geri çəkilməlidilər. Fransa yaxşı bilir ki, Azərbaycan buna getməyəcək. Nəticədə gərginliyi saxlamaq və bu minvalla da Ermənistanı idarə etmək mümkün olacaq. Biz nəzərə almalıyıq ki, Ermənistan marionet dövlətdir. Uzun illər Ermənistan Rusiyanın qucağında olub. İndi də Fransanın qucağına keçməkdən ötrü min hoqqadan çıxırlar. Bir ildir Avroittifaqın Müşahidə Missiyası Ermənistanda fəaliyyət göstərir. Əslində onların Fransa tərəfindən idarə olunması hamıya bəllidir. Çünki Ermənistan müstəqil dövlət deyil. Bir sıra dövlətlərin əlində təzyiq alətidir. Ermənistanda gedən bu oyunların fəlsəfəsi həm də Rusiyanı oradan çıxarmaqdır. Güzgü prinsipini ortaya atmaq sülh prosesini süni şəkildə tormozlamaq deməkdir. Bir gün bu məsələ bitəcək və ertəsi gün başqa bəhanə uyduracaqlar. Çünki Fransa və Ermənistanın havadarı olan müəyyən dairələr Qarabağ məsələsinin birdəfəlik bağlanmasını həzm edə bilmirlər. Fransanın niyyəti o idi ki, beynəlxalq qüvvələr adı altında Qərbi təmsil edən sülhməramlılar Qarabağa yerləşsin. Əgər bu baş versəydi, sonra onları top-tüfənglə də çıxara bilməzdik. Prezident İlham Əliyevin böyük siyasi ustalığı sayəsində bu plan fiaskoya uğradı. Bir sözlə, bütün bu oyunlarda məqsəd regionda gərginliyi körükləməkdir”.
Vidadi ORDAHALLI
