Gerb şəkli olan qəpiklər 100 manata satılır - nədir bu?..
Azərbaycanda üzərində gerb olan qəpiklər dəyərindən 10 dəfə baha qiymətə satılır. Üzərində gerb olan10 qəpik 10, bəzən isə 20-30 manat arası, 20 qəpik isə 30-40 manat arası qiymətə təklif olunur. Ən baha qiymətə isə üzərində gerb olan 50 qəpik satılır, bu qəpik 50 - 100 manat arası təklif olunur.
Üzərində gerb olan qəpikləri satan şəxslər bildirir ki, məhdud sayda buraxılmış qəpiklər olduğu üçün kolleksiyaçılar tərəfindən marağa səbəb olur və alınır: "Bu qəpiklər çox sayda buraxılmadığı üçün hazırda hər kəsdə yoxdur. Məndə üzərində gerb olan 20 qəpiklərdən 5 ədəd var, başqa qəpiklər də var. Mən dəyərindən daha aşağı qiymətə satıram. Elanlarda həmin 20 qəpiyin 50 manata satıldığını görmüşəm. Amma mən üstündə gerbimiz olan 20 qəpiyi 30 manata satıram".
Məsələ ilə bağkı Mərkəzi Bankin yaydığı məlumatda qeyd edilir ki, 10, 20 və 50 qəpiklik metal pul nişanlarının dizaynına Dövlət Gerbi və istehsal ili əlavə olunaraq yenilənməsi həyata keçirilib. Yenilənmiş 20 qəpiklik metal pul nişanının ötən ilin dekabr ayından tədavülə buraxılması təmin edilib. AMB yenilənmiş 10 və 50 qəpiklik metal pul nişanlarının isə ötən həftədən tədavülə buraxılmasını elan edib.
Eldəniz Əmirov: "Qəpiklər dövriyyədən çıxdıqdan sonra üzərində gerb olan qəpiklər saxlanılır və kolleksionerlər tərəfindən yığılaraq daha sonra satışa buraxılır"
Mövzu ilə bağlı fikir bildirən iqtisadçı ekspert Eldəniz Əmirov qeyd etdi ki, qəpiklər hazırlanan zaman bir neçə versiya hazırlanır və həmin versiyalar arasında seçimlər aparılır. Qəpiklər dövriyyədən çıxdıqdan sonra üzərində gerb olan qəpiklər saxlanılır və kolleksionerlər tərəfindən yığılaraq daha sonra satışa buraxılır: "Gerblər ölkənin atributu olduğu üçün daha cəlbedici olur. Bu səbəbdən də üzərində gerb olan qəpiklərə maraq var. Kolleksionerlər müəyyən müddət sonra həmin qəpiklərin satışını həyata keçirir.
Kamran Məmmədli: "Dəmir pulların baha satılması üçün heç bir əsaslı səbəb yoxdur"
Iqtisadçı Kamran Məmmədli bildirdi ki, bu üsul saxtakarlığın bir növüdür: "İstənilən valyutanın və yaxud nominal pul vahidinin üzərində olan dəyəri var. Bununla da iş bitir. Bir qəpik bir qəpikdir, iki qəpik də iki qəpik. Dəmir pulların baha satılması üçün heç bir əsaslı səbəb yoxdur. Bir qrup dələduz kolleksiya yığan insanların marağından istifadə edib, bu cür işlə məşğul olur".
Günel CƏLİLOVA
