“Dünyanın ən məşhur şəxsiyyətləri Qarabağ ermənilərindən doğulub”muş - absurda baxın...
Qasım Hacıyev: “Erməni mətbuatı ortaya yalan-yanlış siyahılar qoymaqla...”
Azərbaycana qarşı əsassız hücumlarından qalmayan erməni mətbuatı yenə də yalan dağarcığının ağzını açıb. Ermənistanın faşizmi bütləşdirməsindən utanmayan ermənilər Azərbaycanı İkinci Dünya müharibəsində iştirak etmiş şəxslərin “abidələrini dağıtmaqda” ittiham edirlər.
Bu azmış kimi, iddia edirlər ki, guya Sovet ordusunun bir çox yüksək rütbəli şəxsləri, dünyanın tanınmış şəxsiyyətlərinin çoxu Qarabağdakı erməni ailələrindən çıxıb. Guya Azərbaycanda erməni Sovet İttifaqı Qəhrəmanlarının “çoxsaylı abidələri dağıdılıb”. Onlar unudurlar ki, bu abidələri azərbaycanlıları şərləmək üçün elə ermənilər özləri dağıdıblar. İddia edirlər ki, guya “Qarabağ məşhur erməni marşal və generallarının əksəriyyətinin doğulduğu yer olub”. Guya M.T. Loris-Melikov, V.G. Mədətov, V.O. Bebutov, A.A. Ter-Qukasov kimi generallar, İ.X.Baqramyan, S.A. Xudyakov (Armenak Xanferyants), A.X. Babacanyan, S.X. Ağanov, İ.S. İsakov Qarabağdan çıxıb (?).
“Qolos Armenii”nin irəli sürdüyü bu iddia yalnız gülüş doğurur. Məlumdur ki, Azərbaycanda heç bir xalqa məxsus abidə dağıdılmır, bizim ərazidə abdələrin, heykəllərin dağıdılması prosesi ermənilərin adları, fəaliyyətləri ilə bağlıdır.
“Onlar dünyanın ən tanınmış insanlarından çoxunu saxtakarcasına “erməni” kimi qələmə veriblər”
Qafqazşünaslıq İnstitutunun Qafqaz Tarixi şöbəsinin müdiri, professor Qasım Hacıyev “Bakı-Xəbər”ə şərhində bildirdi ki, ermənilər yenə də öz yalan və məkrli düşüncələrini ortaya qoyublar. “Ermənilər hansısa bir məsələni qaldıranda orda mütləq mənada bir mənafe güdür. Azərbaycan xalqının qələbəsinə kölgə salmaq üçün müxtəlif uydurmalara əl atırlar, köhnə məsələləri qaldırıb ona yeni məna verməyə çalışırlar. Əvvəla. bunlar yaxın illərdə Qarabağı “Arsax” adlandırıblar. Sovet dövründə nə “Arsax” vardı, nə “Arsax xalqı” vardı. Bunlar Azərbaycanın Qarabağ bölgəsində yaşayan ermənilər olub. Adlara baxsanız onların çoxunun Qarabağda yaşamadığını görərsiz. Onlar siyahı tutanda sayları şişirdirlər, saxtalaşdırırlar. Bir sözlə, məqsədli şəkildə uydurmalar yaradırlar. İkinci Dünya müharibəsində bütün xalqlar iştirak edirdi, ermənilər də həmçinin. Kimsə müəyyən üstünlüklər əldə edib, ad alıb. Bilirsiz ki, general, marşal adları alan ermənilər arasında bunu müxtəlif vasitələrlə ələ keçirənlər də olub. Ermənilərdən bu rütbələri saxta yollarla alanlar da az olmayıb. Bunu bilirik.
Bəzi məşhur şəxslərin Qarabağda doğulması barədə məlumatı yaymaqa nə demək istəyirlər? Buna heç cür məna vermək olmur. Qarabağ Azərbaycanın dilbər guşələrindən biridir. Azərbaycan tolerant, multikultural, milli, dini ayrıseçkiliyin olmadığı ölkədir. Bizim ölkəmizin hər yerində qabiliyyətli, bacarıqlı insanlar yetişib.
Bu yaxınlarda “Qarabağlı hərbiçilər” adlı kitab çap etdirmişəm, orada 30-dan çox yüksək rütbəli zabit yetişib. Onlar arasında vaxtilə xanlıq dövründə, ən çox da Çar Rusiyası və AXC dönəmində xidmət edən dünya şöhrətli sərkərdələr də var. Bizim sərkərdələr ermənilərdən daha yüksək səviyyədə tanınan qabiliyyətli sərkərdələr olub”.
Q.Hacıyev qeyd etdi ki, ermənilər alban əsilli şəxsləri də öz adlarına çıxırlar və bununla da öz siyahılarını “zənginləşdirirlər”. Tarixən ermənilərin böyük sərkərdələri olmadığını, daşnak Andranikin, İ.Baqramyanın və başqalarının o rütbələrə hansı dolanbac yollarla çatdıqları məlumdur. Q.Hacıyev qeyd etdi ki, ermənilər daşnaklıqları ilə fəxr edir, biz isə şanlı türkük. Dünya hərb tarixinə Əli Ağa Şıxlınski, Səməd bəy Mehmandarov kimi nəhənglər verdiyimizi qeyd edən Q.Hacıyev bildirdi ki, Rusiya hərb tarixində səs salan Kutuzov, Suvorov kimi nəhəng sərkərdələr də türk soyludurlar. “Erməni mətbuatı ortaya yalan-yanlış siyahılar qoymaqla guya Qarabağın yerli əhalisinin ermənilər olduğunu göstərmək istəyir, amma yanılırlar. Onlar dünyanın ən tanınmış insanlarından çoxunu saxtakarcasına “erməni” kimi qələmə veriblər. Adəmdən tutmuş Nuh Peyğəmbərə qədər çoxları onlar üçün “ermənidir”.
Bu baxımdan onların yazdıqları tamamilə yalandır. Ermənilər Qarabağa XIX əsrdə köçüb gəliblər. Onlar bura gəldikdən sonra övladları bizim torpaqda böyüyüblər, Azərbaycanın çörəyini yeyiblər. Amma burada hansısa bir erməni zabiti doğulubsa, bu o demək deyil ki, Qarabağ erməni torpağıdır. Ermənilər nə yazırlar yazsınlar, tarixi dəyişə bilməzlər, onları bizim əraziyə Çar Rusiyası köçürüb gətirib” - deyə Q.Hacıyev bildirdi.
İradə SARIYEVA
