Magistraturaya 50 manatlıq qəbul - narazılıq nədəndir?..
![Image](/uploads/posts/2024-02/magistr-jur.webp)
Kamran Əsədov: “Bir imtahanın qiymətinin formalaşmasına xidmətlər cəmi təsir göstərir”
Son illər magistratura təhsilinə maraq azalıb. Magistr olmaq istəyənlərin bir qismi qeydiyyat üçün tələb olunan 50 manatın çox olmasını əsas gətirərək bu istəyindən daşınır.
Məlumat üçün bildirək ki, 2005-2016-cı illər aralığında magistraturaya qəbul olmaq üçün imtahanın qiyməti 2 manat 50 qəpik, sonrakı dövrlərdə isə 3 manat olub. 2016-cı ildən sonra bu qiymətlər 20, 30, 40 və nəhayət 50 manat oldu. Araşdırmalar zamanı müəyyən olub ki, magistraturaya qəbul üçün tələb olunan məbləğin 50 manat olması magistr olmaq istəyənlərin sayının azalmasına səbəb olub.
“Qiymətlərin baha olması təhsilə əlçatanlığa mənfi təsir göstərir, sosial vəziyyəti aşağı olan şəxslər imtahanlarda iştirak edə bilmir”
Təhsil eksperti Kamran Əsədov “Bakı-Xəbər”ə açıqlamasında bildirdi ki, magistratura səviyyəsində qəbul imtahanları 50 manat, sınaq imtahanları isə 30 manatdır: “Ancaq magistratura pilləsində sınaq imtahanlarında iştirak zamanı sual kitabçaları verilmir. Əgər vəsaitin bütün xərclərini ödəmişəmsə, deməli, sual kitabçası da məndə qalmalıdır. Yəni belə çıxır ki, siz bir məhsulu satışa çıxarırsınız, pulunu verirəm, ancaq siz həmin məhsulu mənə vermirsiniz. Dövlət İmtahan Mərkəzinin müəyyən etdiyi imtahan qiymətləri hər kəsin büdcəsinə görə deyil. Abituriyent 1 dəfə imtahanda iştiraka görə - kollecə qəbul üçün 20 manat, bakalavr pilləsinə qəbul üçün 40 manat, magistratura pilləsinə qəbul üçün 50 manat, rezidenturaya qəbul üçün 100 manat pul ödəməlidir.
Magistraturaya qəbuldan danışırıqsa, bəllidir ki, ilk olaraq qeydiyyat üçün 50 manat ödənilməlidir. Ancaq bu qiymət kifayət qədər bahadır. Bir imtahanın qiymətinin formalaşmasına xidmətlər cəmi təsir göstərir. Məsələn, sual kitabçasındakı sualların sayı, imtahan nəzarətçisi, çap materialları, kağız daşıyıcılar… Bunların hamısının qiyməti maksimum 15-16 manat olar. Onu da deyim ki, qiymətin bahalaşması magistr olmaq istəyənlərin sayına təsir edib. Qiymətlərin baha olması həm də təhsilə əlçatanlığa mənfi təsir göstərir, sosial vəziyyəti aşağı olan şəxslər imtahanlarda iştirak edə bilmir”.
Günel CƏLİLOVA