“MDB və KTMT-dən yumşaq çıxacağıq” - Paşinyan söz qaçırdı...
Əli Orucov: “Ona görə bu təşkilatlardan rəsmən çıxmaq barədə qərar vermir ki, bunun üçün hələ tam zəmin formalaşmayıb”
Ermənistanın “Past” nəşrinin yazdığına görə, Nikol Paşinyan bəzi ekspertlərin və media nümayəndələrinin iştirakı ilə ötən ayın əvvəlində keçirilən qapalı görüş zamanı qeyd edib ki, hər kəsin şahidi olduğu kimi, xarici siyasət vektorunda dəyişikliklər var.
Baş nazir onu da bildirib ki, dəyişiklik rəsmi şəkildə elan olunmayacaq, çünki bir sıra xarici tərəfdaşlar, xüsusən də İran (Paşinyanın xüsusilə vurğuladığı kimi) ölkə siyasətində bu dönüşün əleyhinədir. O, həmçinin əlavə edib ki, xarici siyasətdə dəyişiklik prosesi artıq başlayıb, davam edir, sakit və “yumşaq” şəkildə baş verəcək. Paşinyan bundan sonra Kollektiv Təhlükəsizlik Müqaviləsi Təşkilatının (KTMT) və Müstəqil Dövlətlər Birliyinin (MDB) fəaliyyətində iştirak etməyəcəyini bildirib. Həmçinin onun sözlərinə görə, hökumət artıq bu strukturların əvəzləyicilərini axtarır və əmin olduğunu bildirib ki, tezliklə tapılacaq.
“Paşinyan hakimiyyətə gələndən sonra Ermənistanın MDB, KTMT və Aİİ-də təmsilçiliyi məzmunca formal xarakterlidir”
Sözügedən məsələni “Bakı-Xəbər”ə şərh edən AMİP funksioneri Əli Orucov hesab edir ki, bütün bunlar gözlənilən idi: “Məsələ ondadır ki, Paşinyan hakimiyyətə gələndən sonra Ermənistanın MDB, KTMT və Avrasiya İqtisadi İttifaqında təmsilçiliyi məzmunca formal xarakterlidir. Rəsmi İravanın atdığı çoxsaylı addımlar bu qənaətə gəlməyə əsas verir. Məsələn, MDB neçə illərdir amorf bir təşkilata çevrilib. Varlığı ilə yoxluğu bilinmir. Ermənistan bu təşkilatdan çıxsa nə olar, çıxmasa nə olar. KTMT-yə gəldikdə isə hər şey göz qabağındadır. Ermənistan onsuz da davamlı olaraq bu təşkilatın tədbirlərində iştirak etmir, keçirdiyi hərbi təlimlərə qoşulmur. Faktiki olaraq KTMT Ermənistan üçün yox kimi bir şeydir. Bu qurumda təmsil olunmağını nəzərə almadan Fransadan silah alır. Az-çox Ermənistanın faydalandığı Aİİ-dir ki, bu da iqtisadi faktorlarla bağlıdır. Ancaq burada problem odur ki, Ermənistanın Aİİ ilə birbaşa quru sərhədi yoxdur. Paşinyan hələlik ona görə bu təşkilatlardan rəsmən çıxmaq barədə qərar vermir ki, bunun üçün hələ tam zəmin formalaşmayıb. Xüsusən də buna görə Rusiya ilə konfrontasiyaya getmək istəmir. Başqa bir tərəfdən, İrəvanla Qərb, xüsusən də ABŞ arasında artan əməkdaşlıq fonunda Ermənistan get-gedə onsuz da Rusiyadan uzaqlaşır. Bəlli məsələdir ki, bu, Qərbin strategiyasıdır və öhdəlik olaraq Paşinyanın qarşısında qoyulub. Məqsəd Rusiyanın Cənubi Qafqazda, əsasən də Ermənistanda təsirini minimuma endirməkdir. Ümumiyyətlə, Paşinyan hakimiyyətə gəldikdə belə proseslərin gedəcəyi təxmin olunurdu. Sadəcə, Ermənistanın iqtisadi nöqteyi-nəzərdən Rusiyadan asılılığı böyük olduğu üçün bir sıra məsələlər ləng gedir. Ona görə də güman edilir ki, Ermənistanın Rusiyadan uzaqlaşması davam edəcək. Unutmaq olmaz ki, bütün bunlar Cənubi Qafqazda gedən geosiyasi mübarizənin tərkib hissəsidir”.
Vidadi ORDAHALLI
