Moskva Bakının sülh sazişi layihəsini əsasən bəyəndi...
Elşad Həsənov: “Ermənistan öz təcavüzkar siyasətindən əl çəkməlidir, bunun üçün öz konstitusiyasında dəyişiklik etməlidir”
Rusiyanın Azərbaycandakı səfiri Mixail Yevdokimov müsahibəsində açıq şəkildə Azərbaycanı müdafiə edib, Ermənistanı isə qeyri-konstruktivlikdə ittiham edib:
“Qarabağ məsələsi bağlanıb. Bütün bu illər ərzində Rusiya Qarabağ problemini sülh yolu ilə həll etmək üçün səylər göstərib. Təəssüf ki, alınmadı: bu mövzu sentyabrda güc əməliyyatı ilə bağlandı. Rusiya hər zaman bu məsələdə çox mühüm rol oynayır. Rusiya tərəflər arasında sülh müqaviləsi üzrə danışıqlara maksimum dəstək verməyə hazırdır”.
Bakı ilə İrəvan arasında sülh müqaviləsi layihələrinin mübadiləsinin həyata keçirildiyini xatırladan səfir Azərbaycanın təklifinin “tamamilə əsaslandırılmış” olduğunu vurğulayıb:
“İndi Ermənistan və Azərbaycan bilavasitə sülh müqavilələri layihələrini mübadilə edirlər. Azərbaycan tərəfinin təklif etdiyi şey, məncə, tamamilə əsaslandırılmış, bir qayda olaraq, tərəflər arasında sülh müqavilələrində mövcud olan standart müddəa və maddələrdir. Prinsipcə, Bakının irəli sürdüyü təkliflərə əsasən, mənə elə gəlir ki, bu danışıqlar yetərincə tez başa çatdırıla bilər”.
Adətən biz Moskvanın balanslı bəyanatlarının şahidi olmuşuq. Moskvanın Ermənistanı açıq şəkildə qeyri-konstruktivlikdə ittiham etməsini necə başa düşmək olar?
Siyasi şərhçi Elşad Həsənov “Bakı-Xəbər”ə açıqlamasında bildirdi ki, doğrudan da Rusiyanın Azərbaycandakı səfirinin müsahibəsində bildirdikləri reallıqdır. Bu reallığı da Azərbaycan ordusu 44 günlük müharibəsi ilə qazandı. Eyni zamanda, keçən il sentyabrın 19 - dan 20 - nə keçən gecə bir günlük antiterror əməliyyatı ilə başa çatdırdı. Qarabağ məsələsi birdəfəlik həll oldu və qarşıda danışıqlarda sülh müqaviləsinin bağlanması, sərhədlərin delimitasiyası, demarkasiyası durur. Sərhədlərlə bağlı yanvarın 31 - də görüşlər baş tutdu və müvafiq razılıqlar əldə olundu. Sülh müqaviləsinin bağlanmasına, səfirin bildirdiyi kimi, Rusiya hər zaman hazırdı. Rusiya xarici işlər nazirinin müavini Qaluzin öz çıxışında Ermənistanın düzgün mövqedə olmadığı, son dövrlər sülh müqaviləsindən qaçdığı, Qərb tərəfdaşları ilə oyunlar qurduğu barədə bəyanatlar verdi. Ermənistanın bu gedişlə özünə problem yaradacağını açıq mətnlə bildirdi. Ona görə də, mən hesab etmirəm ki, Ermənistanı dəstəkləyən Fransa, Makron sülh müqaviləsini imzalamağa imkan verməyəcək. Sülh müqaviləsinin imzalanması uzanır, Paşinyan da bununla bağlı yeni ritorikalarla çıxış edir. Ermənistan mətbuatında nəşr olunmuş, İngiltərənin “Teleqraf “ nəşrinə verilən müsahibədəki müəyyən detallar açıqlanır. Guya Ermənistan hazırdır sülh müqaviləsi imzalamağa, ancaq Azərbaycan imtina edir. Yəni erməni xislətinə uyğun olaraq Paşinyan hər dəfə bir şey irəli sürür. Ancaq sülh müqaviləsinin imzalanmamasına birbaşa Ermənistan məsuliyyət daşıyır, günahkar onlardır. Ermənistan öz boynuna götürdüyü, qol çəkdiyi müqaviləni tam yerinə yetirməyib. Ona görə də, Azərbaycan Naxçıvana getmək üçün İran ərazisindən yeni bir yol çəkir və bu sahədə iş gedir. Bütün bunlar hamısı Ermənistanın apardığı qeyri - konstruktiv siyasətdir. Ermənistan müstəqil dövlət olmadığına görə Qərb havadarlarının, xüsusilə Fransanın, Amerikada olan erməni lobbisinin göstərişləri ilə siyasət aparır. Ona görə də, biz sonuncu dəfə bildirmişik ki, Ermənistan öz təcavüzkar siyasətindən əl çəkməlidir, bunun üçün öz konstitusiyasında dəyişiklik etməlidir. Çünki Ermənistan konstitusiyası birbaşa sülh müqaviləsinin bağlanmasının qarşısında əngəl olaraq qalır. Ancaq mən düşünürəm ki, beynəlxalq güclər də Ermənistanın beyin mərkəzinə təsir edir, onu təcavüzkar əməllərindən əl çəkməyə çağırırlar. Ona görə də son günlər Paşinyan Ermənistan ərazisinin SSRİ dövründə çəkilmiş xəritələr əsasında olmasını reallıq sayır, öz publikasına da başa salmağa çalışır ki, biz bu çərçivədən çıxış etməliyik, torpaqlarımızı qorumalıyıq. İngiltərənin “Teleqraf” nəşrinə verdiyi müsahibəsində də bu haqda geniş danışır. O bildirir ki, biz demokratik ölkə olaraq müəyyən beynəlxalq müqavilələrə qoşulmuşuq. Mən hesab edirəm ki, Rusiyanın vasitəçiliyinə Ermənistan heç vaxt razı olmayacaq. Gələcəkdə əgər sülh müqaviləsi bağlanacaqsa, Brüsseldə, ya da Vaşinqtonda olması daha məqsədəuyğun olacaq onlar üçün. Biz öz işlərimizlə məşğuluq”.
Məhəmmədəli QƏRİBLİ
