"Bakının irəli sürdüyü təkliflərlə İrəvanla danışıqlar tez başa çatdırıla bilər” - Rusiya səfiri
Rusiyanın Azərbaycandakı səfiri Mixail Yevdokimov Bakının İrəvanla sülh danışıqlarında atdığı addımları tamamilə əsaslandırılmış hesab edir ki, bu da bu danışıqları kifayət qədər tez başa çatdırmağa imkan verir.
"Qarabağ məsələsi bağlanıb. (...) Rusiya iki tərəf arasında sülh müqaviləsi üzrə danışıqlarda maksimum dəstək verməyə hazırdır. İndi Ermənistan və Azərbaycan bilavasitə sülh müqavilələri layihələrini mübadilə edirlər. Azərbaycan tərəfinin təklif etdiyi, fikrimcə, tamamilə əsaslandırılmış, bir qayda olaraq, tərəflər arasında sülh müqavilələrində mövcud olan standart müddəa və maddələrdir. Prinsipcə Bakının irəli sürdüyü təkliflərə əsasən, mənə elə gəlir ki, bu danışıqlar yetərincə tez başa çatdırıla bilər", - deyə səfir "İzvestiya" qəzetinə müsahibəsində bildirib.
Onun sözlərinə görə, Rusiya Moskva platformasını təqdim etməyə hazırdır. "Biz lazım gələrsə, ekspertizamızı, mətnlə bağlı məsləhətlərimizi verməyə hazırıq. Azərbaycanlı həmkarlarımızla çox yaxşı qarşılıqlı əlaqələrimiz var", - deyə diplomat qeyd edib.
"Mən görürəm ki, Azərbaycan sülh müqaviləsinin imzalanması ilə bağlı danışıqları çox tez başa çatdırmaq əzmindədir. Lakin danışıqları başa çatdırmaq üçün hər iki tərəfdə belə bir istək olmalıdır", - deyə Yevdokimov vurğulayıb.
Bölgədəki vəziyyətə toxunan səfir əlavə edib ki, Rusiya tərəfi hazırda sülhməramlı kontingentlə bağlı Moskva və Bakı arasında danışıqların növbəti raundunun tarixlərini Azərbaycan Xarici İşlər Nazirliyi ilə razılaşdırır. O, sülhməramlıların Qarabağda qalma müddətinin 2025-ci ildə başa çatacağını xatırladıb.
ZÜMRÜD
