7 fevral seçkisinin taleyini əsasən bu hadisələr həll etdi...
Qabil Hüseynli: “Qarabağ müharibələrinin nəticələri, əldə edilən bütün uğurlar ölkə prezidenti üçün reytinqi təmin etmişdi”
Mərkəzi Seçki Komissiyasının (MSK) sədri Məzahir Pənahov MSK-nın Seçkilər İnformasiya Mərkəzində keçirdiyi mətbuat konfransında deyib ki, seçki çox yüksək səviyyədə keçirilib:
“Azərbaycan xalqı öz konstitusion hüquqlarını yerinə yetirərək 7 nəfər prezidentliyə namizəd arasından öz namizədini seçib”.
O bildirib ki, nəticələrə əsasən deyə bilərik ki, artıq İlham Əliyev Azərbaycan xalqı tərəfindən prezident seçilib:
“Azərbaycan xalqı öz Prezidentini seçmək üçün səs verdi və ilkin nəticələrə əsasən, böyük səs çoxluğu ilə İlham Əliyevin lider olması şübhə doğurmur. Bundan sonrakı açılacaq bülletenlər nəticələrə təsir etməyəcək.
Sabahdan (8 fevral-red) biz Dairə Seçki Komissiyalarından protokolları qəbul edəcəyik və bu protokollar üzrə qalib namizədin səslərini müəyyən edəcəyik. Fevralın 9-da artıq lider olan namizədi və digər səsləri ictimaiyyətə təqdim edəcəyik”.
Seçkinin nəticələrinə ən həlledici təsir göstərən hadisələr və proseslər hansılardı?
Politoloq Qabil Hüseynli “Bakı-Xəbər”ə açıqlamasında bildirdi ki, seçkiyə müsbət təsir edən birinci amil ondan ibarətdir ki, Azərbaycan xalqı öz prezidentinin ətrafında sıx birləşdi, yeni ordu qurdu və erməni işğalçılarını süpürüb ərazilərimizdən çıxardı. “Dağlıq Qarabağ” ərazilərində də Azərbaycan ordusunun ildırım sürətli əməliyyatı bunun digər bir tərkib hissəsi idi. Azərbaycan son iki il ərzində misli görünməmiş bir qələbəyə imza atdı və Şimali Azərbaycanda öz ərazi bütövlüyünü təmin etdi. Bu qələbənin əldə edilməsinin əsas səbəbkarı Prezidentimiz İlham Əliyev idi. Bu səbəbdən də vaxtından əvvəl keçirilən prezident seçkilərində reytinqinin ən pik nöqtəsində idi. Heç kimdə, xarici ölkələrdə belə şübhə yox idi ki, İlham Əliyevə kimsə rəqib ola bilər, ona qarşı rəqabətdə ola bilər. İlham Əliyevdən başqa 6 nəfər namizəd var idi. Onlardan heç biri seçki platformaları ilə fərqlənə, seçicilərin diqqətini çəkə bilmədi. Ölkənin qalib prezidenti haqlı olaraq bu vəzifəyə çox yüksək səs çoxluğu ilə seçildi. Güman edirəm ki, nəticələr belə də olmalı idi. Çünki Qarabağ müharibələrinin nəticələri, əldə edilən bütün uğurlar ölkə prezidenti üçün reytingi təmin etmişdi”.
Mərkəzi Seçki Komissiyasının Azərbaycanda keçirilən növbədənkənar prezident seçkilərinin ilkin nəticələri ilə bağlı açıqladığı vəziyyət belədir ki, İlham Əliyev liderdir. O, seçicilərin 92.10 faiz səsini qazanıb. İlkin nəticələrə görə, 2 milyon 497 min 542 nəfər İlham Əliyevə səs verib.
Namizədliyi özü tərəfindən irəli sürülən Zahid Oruc - 2,20 faiz (59 719 səs);
Böyük Quruluş Partiyasının prezidentliyə namizədi Fazil Mustafa - 1,99 faiz (53 986 səs) ;
Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev - 1,78 faiz (48 315 səs); Milli Cəbhə Partiyasının prezidentliyə namizədi Razi Nurullayev - 0,79 (21 406 səs); Böyük Azərbaycan Partiyasının prezidentliyə namizədi Elşad Musayev - 0,66 (17 855 səs); namizədliyi özü tərəfindən irəli sürülən Fuad Əliyev - 0,8 faiz (12 981 səs) yığa bilib.
MSK sədri Məzahir Pənahovun sözlərinə görə, bu nəticələr 3531 məntəqədən daxil olub. Bu məntəqələrdə etibarlı hesab edilmiş səslərin sayı 2 milyon 711 min 804-ə bərabərdir.
Məhəmmədəli QƏRİBLİ
