İsrail-HƏMAS savaşı İslam ölkələrini parçaladı - 4 ərəb ölkəsi İsrailə embarqo qərarına imkan vermədi...
İslam ölkələri İsrailin hücumlarını dayandırmaq üçün Səudiyyə Ərəbistanının paytaxtı Ər-Riyadda bir araya gəlib. Qəzzada İsrail-HƏMAS qarşıdurması fonunda toplaşan İslam Əməkdaşlıq Təşkilatı (İƏT) zəif bəyanat və qınaqlardan o yana gedə bilməyib. Qəzza üzrə sammitdə ərəb ölkələri 1967-ci ildə olduğu kimi İsrailə qarşı geniş embarqo tələbi ilə bağlı razılığa gələ bilməyiblər.
Belə ki, Zirvə toplantısında İƏT İsrailə qarşı 5 maddədən ibarət embarqonun tətbiqi müzakirəyə çıxarılıb. Lakin 4 ərəb ölkəsi bu qərara veto qoyub.
Qeyd edək ki, itkiləri dayandırmaq və bölgədə iki dövlətli həll üçün hərəkətə keçmək istəyən 11 ərəb ölkəsi İsrailə təzyiq göstərmək üçün 5 fərqli maddə təklif edib.
1967-ci ildə ərəb ölkələrinin İsrailə tətbiq etdiyi embarqonun bənzəri olan təklifdə aşağıdakı maddələr yer alıb:
1. Amerika hərbi bazalarının İsrailə silah-sursat tədarükü üçün istifadəsinin qarşısının alınması.
2. Diplomatik və iqtisadi əlaqələrin dondurulması
3. Neftdən istifadə ilə bağlı hədələmək
4. Ərəb hava məkanında İsrail mülki aviasiyasının bloklanması
5. Qəzzaya hücumun dayandırılması tələbini çatdırmaq üçün ərəb nazirlərindən ibarət komitənin yaradılması
Ancaq qeyd etdiyimiz kimi 4 ərəb ölkəsi embarqo təklifini rədd edib. İsrailə təzyiq üçün təklif edilən 5 maddə Birləşmiş Ərəb Əmirlikləri (BƏƏ), Səudiyyə Ərəbistanı, Mərakeş və Bəhreyn tərəfindən rədd edilib.
TAHİR
