Fransa və Avroittifaq "böyük planla" Gürcüstan üzərindən Ermənistana soxuldular - Fransa hərbi texnikası İrəvana yetişdi...
Fransanın açıq-aşkar Ermənistanı təxribatlara sövq etməsi, Emmanuel Makron hökümətinin Azərbaycan və Ermənistan arasında sülhün bağlanmasına qarşı addımlar atması artıq kuliminasiya nöqtəsinə çatıb. Üstəlik Fransa var gücü ilə Ermənistanı silahlandırmağa başlayıb. “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində Fransanın bu addımları barədə yazıb.
Politoloq yazısında qeyd edir ki, Ermənistanı sülh sazişi imzalamaqdan çəkindirən əsas qüvvənin Fransa hakimiyyəti olması qəti təsdiqlənir. A.Quliyev daha sonra yazır:
Nəhayət, Fransanın çoxdan söz- söhbəti gedən silah və hərbi texnikası Ermənistana göndərilməyə başladı. Həm də daşınma üçün tranzit olaraq Gürcüstanın ərazisi seçildi. Artıq bu anlarda fransız silahları və texnikası, əsasən də çoxhədəfli “Bastion" zirehli avtomobilləri Gürcüstan vasitəsi ilə Ermənistana daşınır. Bəlkə də hərbi karvan artıq Gürcüstan - Ermənistan sərhəddinə çatıb. Hesab etmək olar ki, bölgəmizdə sülh üçün açılmış zəif perspektivlər Paşinyan- Makron planları üzündən ciddi təhlükəyə soxulub. İlginc prosesin digər detalları da məlumdur Fransanın hansı şirkəti göndərir, hansı şirkət istehsal edir, nələr göndərilir, bunlar artıq məlumdur.
Ermənistanı sülh sazişi imzalamaqdan çəkindirən əsas qüvvənin Fransa hakimiyyəti olması qəti təsdiqlənir. Ermənistanı yeni müharibəyə hazırlaşdırmaq planı gün kimi aydındır. Plan əsasən Makron və Avropa İttifaqı tərəfindən yürüdülür.
Vətən müharibəsindən 1 il sonra Avropa Birliyinin mülki missiyasını, əslində isə istefada olan fransız kəşfiyyat zabitlərindən ibarət 200 nəfərlik dəstəni Ermənistana göndərmək bu planın tərkibi idi. Sonra onların sayını 400- ə çıxarmaq və yüngül silahlarla silahlandırmaq məsələsi ortaya gətirildi və Fransa bunu da etdi. Sonra Fransanın müdafiə naziri Yerevana gəldi və Ermənistanla hərbi yardım müqaviləsi imzalandı.Yüksək səviyyədə "Ermənistanın təhlükəsizliyi bizim qırmızı xəttimizdir" kimi bəyanat verildi. Fransa bütün dünya boyu Azərbaycana qarşı cəbhə açaraq hamını "guya ermənilərin Qarabağda etnik təmizlənməyə məruz qoyulduqları barədə" ağ yalana inandırmağa çalışdı. Elə bu günlərdə Paşinyan Paris sülh konfransına dəvət olundu və şou düzəltmək istədilər ki, guya bu regionda sülhü "canı- dildən" istəyən tək Ermənistan imiş. Ardınca isə ATƏT PA- nın 300 nümayəndəlik toplantısını Yerevanda keçirməyi qərara aldılar və bununla Ermənistanın təhlükə yox, təhlükəsizlik mənbəyi olduğunu dünyaya göstərmək istədilər.Təhlükəsizlik təşkilatı olan ATƏT - in PA toplantısının Yerevan kimi fitnə yuvasına təyin edilməsi ATƏT- in nə qədər deqradasiyaya uğradığını bir daha göstərdi. Hələ onu geniş demirik ki, adına həm də demokratik qurum deyilən ATƏT PA iclası baş nazirin bütün rəqiblərinin həbsə atıldığı bir ölkədə keçirilir. Avropa Birliyinin Xarici işlər nazirləri Şurasının toplantısı ərəfəsində isə diplomatik mənbələrdən belə bir məlumat sızdırıldı ki, "Avropa Birliyinin strategiyası Ermənistanınn müdafiəsini, məruz qaldığı təzyiqlər qarşısında onun müqavimətini artırmaqdır".Təzyiq dedikdə Azərbaycanın və Rusiyanın nəzərdə tutulduğuna heç bir şübhə yoxdur. Demək, əslində Ermənistan məhz Rusiyaya və Azərbaycana qarşı müharibə üçün silahlandırılır..Bunu Avropa İttifaqının və Fransanın Azərbaycana və Rusiyaya faktiki "müharibə elan etməsi " də adlandırmaq olar .
Dünyanın əksər geosiyasi əhəmiyyətli bölgələrindən qovulan Fransa bölgəmizin müharibəyə sürüklənməsi üzərində ciddi şəkildə işləyir.Bunu Ermənistanın əli ilə həyata keçirir.
Dost Gürcüstanın Fransa silahları üçün öz ərazisini tranzit olaraq təqdim etməsinin detalları hələ tam məlum deyil. Konkret fikirlər söyləmək çətindir .
Ancaq burada təhlillər üçün bəzi nüansları nəzərə almaq zorundayıq. Bir neçə gün əvvəl Avropa Komissiyası Avropa parlamenti qarşısında Gürcüstana Avropa İttifaqı üzvlüyünə namizəd statusu verilməsi təşəbbüsü ilə çıxış edib. Məlumdur ki , bu ilin əvvəllərində Ukraynaya Avroittifaq üzvlüyünə namizəd statusu verildiyi halda, Gürcüstan üçün bu statusu tanımaqdan imtina etdilər. .Bir çox təhlilçilər vəziyyəti təhlil edərək bildirirdi ki, yaxın illərdə də Gürcüstana belə şansın veriləcəyi inandırıcı gəlmir,çünki Gürcüstan Ukraynaya dəstək və Rusiya sanksiyalarına dəstək məsələsində Qərbin istəklərinə tam uyğunlaşa bilmədi.İndi bu günlərdə Avropa Komissiyasının Gürcüstan barədə məlum status təşəbbüsü ilə çıxış etməsi çox ilginc görsənir.Birdən- birə nə baş verdi ki, Avropa komissiyası Gürcüstana belə bir reverans etdi?!...Ola bilər ki, Gürcüstanın Fransa silahlarına tranzit imkanı verməkdən uzun müddət boyun qaçırmasının və indi buna razılaşmasının başqa səbəbləri var. Ancaq Ermənistana daşınan silahlar üçün tranzit imkanı verməyin müqabilində Gürcüstanın Avropa İttifaqına doğru yolunun xeyli qısala biləcəyini istisna etmək olmaz.
Bütün hallarda Fransa və Avropa İttifaqı bölgəmizə "böyük müharibə" planları ilə soxulur,plan ilk olaraq Rusiyaya, Azərbaycana və İrana qarşı çevrilib.
Fransanın Azərbaycandakı bütün iqtisadi qaynaqlarını kəsməyin vaxtı çatıb. Onun Azərbaycan üzərindən Parisə nüvə daşımaq planlarına isə heç bir halda imkan vermək olmaz. Fransa Azərbaycana artıq "düşmən dövlət" statusunu tam şəkildə əxz edib.
