Paris sülh konfransında Zəngəzur dəhlizinə qarşı təxribat...
![Image](/uploads/posts/2023-11/zengezur.webp)
Əhəd Məmmədli: “Dəhlizi Ermənistanın nəzarətində olan yol ilə əvəzləməyə çalışır”
Paşinyan Paris sülh forumunda çıxışı zamanı Azərbaycanla sülh üçün məlum 3 prinsipi - ərazi bütövlüyü, sərhədin Almatı bəyannaməsinə uyğun delimitasiyası və kommunikasiyanın yurisdikasiya çərçivəsində açılmasını (bununla dəhliz məntiqini arxa plana keçirir) - yenidən təkrarlayıb. Və əlavə edib ki, indi ən vacib nüans Bakının Brüsseldə artıq razılaşdırılmış və Mişelin bəyanatlarında yer alan məsələləri bir daha təsdiq edib-etməyəcəyidir.
Paşinyan niyə məhz bu üç məsələnin üzərində xüsusilə dayanır?
Politoloq Əhəd Məmmədli “Bakı-Xəbər”ə açıqlamasında bildirdi ki, bütün bunlar Ermənistanın ortaya atdığı bəhanədir: “Azərbaycan sülh sazişi ilə bağlı olan gündəmə sadiqdir. Ölkəmiz sülh müqaviləsinin imzalanmasında israrlıdır. Azərbaycanın sülh sazişi ilə bağlı təklifi bu gün də qüvvədədir. Hərtərəfli sülh sazişinin imzalanması ilə bağlı təklifi rəsmi Bakı 2021-ci ilin fevral ayında Ermənistan tərəfinə göndərib. Təəssüflər olsun ki, Ermənistan tərəfi təxminən bir il ərzində bu təklifə qarşılıq vermədi. Əlavə olaraq, Azərbaycan tərəfindən 2022-ci ilin fevral ayında ilk dəfə olaraq qeyd olunan sülh sazişinin beş təməl prinsipi barədə Ermənistan tərəfinə təklif göndərilib. Ancaq 2022-ci ilin avqust ayında Brüssel görüşündən sonra rəsmi İrəvan Azərbaycan ilə gələcək sülh sazişinin şərtləri üzərində müzakirələrin başlanması ilə bağlı qərar verib. Azərbaycan sülh sazişi imzalanmasında qərarlıdır və Azərbaycanın Qarabağ üzərində suverenliyini bərpa etməsindən sonra bunun daha asan olması gözlənilir. Azərbaycanın sülh sazişi ilə bağlı təklifi bu gün də qüvvədədir. Ona görə də bundan sonrakı addımlar daha çox Ermənistan tərəfindən atılmalıdır. Bugünə kimi sülh sazişinin əksər bəndləri tərəflər arasında razılaşdırılıb. Azərbaycan dövləti Qarabağda, ümumilikdə beynəlxalq səviyyədə tanınmış əraziləri üzərində suverenliyini tam bərpa etdikdən sonra sülh müqaviləsinin imzalanması daha rahatdır, asandır və imzalanma ehtimalı da yüksək olmalıdır. Paşinyanın səsləndirdiyi 3 prinsiplə bağlı da tərəflərin razılığa gəlməsi mümkündür. Hiss edilir ki, onun əsas bəhanəsi Zəngəzurla bağlıdır. O, üzərinə götürdüyü dəhliz statusu ilə bağlı öhdəlikdən yayınmaq istəyir. Dəhlizi Ermənistanın nəzarətində olan yol ilə əvəzləməyə çalışır. Çünki üçtərəfli bəyanatın şərtinə görə dəhlizə nəzarəti Rusiya etməliydi. Paşinyan isə bunu qəbul etmir. Bu da o anlama gəlir ki, Zəngəzurla bağlı razılıqdan məqsədli yayınır”.
Məhəmmədəli QƏRİBLİ