Zəngəzur dəhlizi ilə bağlı Moskva-İrəvan gərginliyi böyüyür - Ermənistan XİN Paşinyanın imzasını heçə saydı...
"İrəvanın təşəbbüsü son illər Rusiya, Azərbaycan və Ermənistan baş nazirlərinin müavinlərinin həmsədrlik etdiyi üçtərəfli işçi qrupu çərçivəsində müzakirə olunan layihələrlə bir çox cəhətdən uzlaşır". Bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinqdə deyib.
Onun sözlərinə görə, üçtərəfli işçi qrupu regionda iqtisadi və nəqliyyat kommunikasiyalarının açılması ilə məşğuldur. Rusiya hesab edir ki, bu proses İrəvanla Bakı arasında münasibətlərin normallaşdırılmasında mühüm rol oynayır, sabitliyə, həmçinin Cənubi Qafqazın tranzit və logistika potensialının açılmasına töhfə verir.
Zaxarova xatırladıb ki, üç ölkənin liderləri 2020-ci ilin payızında Qarabağda hərbi əməliyyatların başa çatmasından cəmi bir neçə ay sonra birgə işçi qrup yaratmaq barədə qərar qəbul ediblər: "Artıq bu qrupun 12 iclası keçirilib, regional logistika infrastrukturunun hazırkı vəziyyətinin qiymətləndirilməsi, dəmir yolu və avtomobil kommunikasiyaları üçün optimal layihələrin seçilməsi daxil olmaqla, böyük həcmdə işlər görülüb. Tərəflər üçün faydalı olacaq paket həllinə çox yaxınlaşmağa nail olunub".
Zaxarova təəssüflə qeyd edib ki, hələlik bu məsələləri başa çatdırmaq mümkün olmayıb. Onun sözlərinə görə, kimlərdəsə bunu etməyə, sadəcə, siyasi iradə çatmır və bu, Rusiya deyil. Rusiya XİN nümayəndəsi Moskvanın Rusiya, Azərbaycan və Ermənistan liderləri arasında imzalanmış Üçtərəfli bəyanatlara əsasən regionda nəqliyyat kommunikasiyaların açılması proseslərinə bütün lazımi yardımı göstərməyə hazır olduğunu təsdiqləyib.
Kommunikasiyaların mühafizəsi ilə bağlı Ermənistan Milli Təhlükəsizlik Xidmətinin strukturunda xüsusi bölmənin yaradılmasına gəlincə, Zaxarova deyib ki, adıçəkilən üçtərəfli sazişlərə müvafiq olaraq, Azərbaycan və Naxçıvan Muxtar Respublikası arasında nəqliyyat əlaqəsinə nəzarət Rusiya Federal Təhlükəsizlik Xidmətinin sərhəd xidməti tərəfindən həyata keçirilməlidir.
Zaxarovanın bəyanatına münasibət bildirən Ermənistan Xarici İşlər Nazirliyinin mətbuat katibi Ani Badalyan isə bildirib ki, Ermənistan hökuməti bu yaxınlarda "Dünyanın kəsişməsi" layihəsini ictimailəşdirib.
Layihədə göstərilir ki, regional kommunikasiyalar açılacağı təqdirdə Ermənistan Respublikası sərhəd və gömrük nəzarətini Ermənistanın dövlət qurumları həyata keçirməlidir. Bu məqsədlə Ermənistan Respublikasının Milli Təhlükəsizlik Xidmətində xüsusi şöbə yaradılıb.
Ermənistan Respublikası heç vaxt heç bir sənəddə öz suverenliyinə hər hansı məhdudiyyətlə razılaşmayıb və onun suveren ərazisinin heç bir hissəsində üçüncü ölkənin nəzarəti yaradıla bilməz.
TAHİR
