Həzrəti Əliyə ad günü tortu imamın xatirəsini adiləşdirmək cəhdi deyilmi...
Cəmşid Əliyev: “Həzrəti Əlinin ad gününün bu cür keçirilməsi xurafat, cəhalət, dini bilgisizliyin acı nəticəsidir”
Məlum olduğu kimi, meyxanaçı Orxan Lökbatanlı və Vasif Əzimovun sosial şəbəkələrdə yayılan tort videoları müzakirə yaradıb.
Belə ki, O.Lökbatanlı və V.Əzimov Həzrəti Əlinin ad gününün qeyd olunduğu məclisdə səhnə alıblar. Onlar imamın ad günü üçün xüsusi dekorlu tort hazırlatdırıblar.
Söz ustadlarının bu addımı sosial şəbəkə istifadəçiləri tərəfindən qınanıb.
“Bu kimi halların yaşanmasında insanların dini savadının o qədər yüksək olmamasının da müəyyən qədər rolu var”
İlahiyyatçı Cəmşid Əliyev “Bakı-Xəbər”ə açıqlamasında qeyd etdi ki, bu kimi halların yaşanmasında insanların dini savadının o qədər yüksək olmamasının da müəyyən qədər rolu var: “Ancaq bir sıra məsələlər var ki, ona elə bir ciddi dini savad tələb olunmur. Bunları kitabdan öyrənmək məcbur deyil. Mən kimisə qınamaq istəmirəm. Bəlkə də onlar sevgilərini ifadə etməyə çalışıb. Bunun məqsədli şəkildə, pis niyyətlə edilməsinə inanmıram. Dini tədbirlər bir qədər ağır keçirilməlidir. Şənlənməyin əleyhinə deyilik, ancaq kənardan gülünc görünən, insanlarda aşağılayıcı gülüş yaradacaq hərəkətlərə yol vermək olmaz. Həzrəti Əlinin ad gününün bu cür keçirilməsi xurafat, cəhalət, dini bilgisizliyin acı nəticəsidir. Biz dünyəvi ölkə olsaq da, mənəvi dini dəyərlərimizin təəssübkeşi Azərbaycan dövlətidir. Azərbaycan xalqı da mübarək isim sahibləri, sevgili peyğəmbərimiz və onun ev xalqına sevgi və sayğı ilə yanaşıb. Çox istərdim ki, Həzrəti Əlinin doğum günü qeyd olunduğu günlərdə Vətən müharibəsi zamanı şəhid olan bütün şəhidlərimizin mübarək ruhları da anılsın. Həzrəti peyğəmbərimiz öz dövründə ümmətinin cəhalətindən əzab keçirirdi. Bu gün mənəviyyat adamı kimi Həzrəti Əliyə bu cür doğum günü keçirən insanların əməllərindən utanıram. Ola bilər ki, o şəxslər arasında Həzrəti Əlini könüldən sevənlər var, amma onlar İslamı maarifləndirməni düzgün anlamadıqlarından, dini bilgisizlikdən, xurafatın qurbanı olduqlarından bunu yol veriblər. Odur ki, bu addımı dini və milli kimliyimizə qəsd kimi qiymətləndirirəm”.
Günel CƏLİLOVA
