Repetitorlar qiymətləri azı 30 faiz qaldırdı - həm də ilin ortasında… Valideynlər şokda....
Fərdi repetitorluq fəaliyyətilə məşğul olan müəllimlər qiymətləri artırıblar. Abituriyentlərin sözlərinə görə, əvvəlki dövrlə müqayisədə bu xidmət 30 faiz bahalaşıb. Tədris ilinin ortasında bu cür qiymət artımı valideynlərin ciddi etirazına səbəb olub.
Bakı şəhərində bu gün 80 manata uşaq hazırlaşdıran repetitora rast gəlmək mümkün deyil. Məlumat üçün bildirək ki, bu gün repetitorlar riyaziyyat fənnini 100-120 manata, Azərbaycan dili və ədəbiyyat fənnini 160-180 manata, tarixi 100 manatdan başlayan qiymətlərə hazırlayır.
Onu da qeyd edək ki, repetitorlar bu işlə rəsmi şəkildə məşğul olmur, vergi vermir.
Bəs, belə olduğu halda repetitorlar nəyə əsasən qiyməti qaldırırlar?
Elçin Əfəndi: "Tədris ilinin ortasında belə bir qiymət artımı yolverilməzdir"
Təhsil eksperti Elçin Əfəndi hesab edir ki, artımın səbəbi bu sahəyə nəzarətsizliklə bağlıdır: "Repetitorların tədris qiymətlərini artırması bu sahəyə nəzarətin olmamasından irəli gəlir. Bu özbaşınalıqdır. Ona görə də repetitor müəllimlər istədikləri qiyməti təyin edə bilirlər. Təəssüf ki, təhsili bazara çevirmişik və təhsilimiz artıq bazar xarakteri daşıyır. Amma biz baxsaq, qiymətdə artım edən repetitorlar hansısa fərqli bir şey öyrətmir. Onlar da sadəcə təyin olunan proqramla dərs keçir. Pandemiya dövründə hazırlıq kurslarının fəaliyyətinin dayandırılması repetitorların bazarını qızışdırdı. Nəticə etibarı ilə bu gün hətta ibtidai siniflər üçün belə hazırlıq qrupları təşkil edərək, yüksək qiymətə dərslər keçilir. Tədris ilinin ortasında belə bir qiymət artımı yolverilməzdir. Çünki valideyn ilin əvvəli başqa qiymət, ilin ortasında isə başqa qiymət ödəyirsə, bu, nəzarət olmamasından irəli gəlir".
Aytəkin Kamranqızı: "Repetitorlar ancaq maddi imkanlarını yaxşılaşdırmaq, vəziyyətlərini düzətmək üçün təhsil haqlarını artırır"
Sosioloq Aytəkin Kamranqızı "Bakı-Xəbər"ə açıqlamasında bildirdi ki, məktəblərdə təhsilin keyfiyyətsiz aparılması vətəndaşı əlavə xərclərlə üzləşdirir, vətəndaş bir növ buna vadar edilir: "Dediyim kimi, repetitorluq könüllü olsa da, sadaladığımız məsələlərdən görünür ki, valideyn buna məcbur edilir. Ona görə də mən problemi repetitorluqda yox, orta ümumi təhsilin keyfiyyətsiz təşkilində görürəm. Repetitorlar ancaq maddi imkanlarını yaxşılaşdırmaq, vəziyyətlərini düzətmək üçün təhsil haqlarını artırırlar. Müəllim dərsin gedişində şagirdə bal-qaymaq yedizdirmir ki, onun da pulun alsın. Qiymət niyə artmalıdır?".
Günel CƏLİLOVA
