İqtisadçı ekspertlər Vergi Xidmət rəisi ilə nələri müzakirə ediblər...
İqtisadiyyat Nazirliyi yanında Dövlət Vergi Xidmətinin (DVX) rəisi Orxan Nəzərli iqtisadçı-ekspertlərlə görüş keçirib. Tədbirdə vergi qanunvericiliyində edilmiş son dəyişikliklər, vergi siyasətinin qarşısında duran əsas məsələlər, vergi inzibatçılığı sahəsində aktual mövzular müzakirə edilib.
DVX rəisi aparılan islahatlar, vergi siyasətində ortamüddətli dövrdə əsas istiqamətlər barədə məlumat verib. Dövlət Vergi Xidmətinin vəzifəli şəxslərinin iştirak etdiyi görüşdə ekspertləri maraqlandıran bir sıra məsələlər ətrafında geniş fikir mübadiləsi aparılıb, suallar cavablandırılıb. İştirakçılar tərəfindən səsləndirilən təkliflər qeydə alınıb.
Məlumdur ki, son günlər Vergi Məcəlləsinə edilən dəyişikliklər əsas müzakirə mövzularından biridir. Əsas problem kimi mikrosahibkarların vergi ilə bağlı çətinliklərlə üzləşəcəyi göstərilir.
Maraqlıdır, məlum qurumla iqtisadçı-ekspertlərin görüşündə hazırda aktual olan problemlə bağlı hansı nəticə əldə olunub?
Ruslan Atakişiyev: “Görüş zamanı mikro sahibkarların üzləşəcəyi çətinliklərlə bağlı fikirlər səsləndi, onlara nə kimi ziyanların dəyəcəyi ilə bağlı araşdırma aparılacaq”
Görüşdə iştirak edən iqtisadçı ekspert Ruslan Atakişiyev “Bakı-Xəbər”ə açıqlamasında bunları dedi: “Görüş çox maraqlı keçdi. Tərəflər dinlənildi. 2024-cu il yanvarın 1-də Vergi Məcəlləsinə edilən dəyişiklik müzakirə olundu. Bunun iş adamlarına, sahibkarlara təsiri ilə bağlı iqtisadçı ekspertlər öz fikrini bildirdi. Mikro sahibkarların üzləşəcəyi çətinliklərlə bağlı fikirlər səsləndi. Onlara nə kimi ziyanların dəyəcəyi ilə bağlı araşdırma aparılacaq. Dövlət Vergi Xidmətinin rəhbəri ilə belə qərara gəldik ki, bu tip görüşlər mütəmadi keçirilsin. Ehtimal edilir ki, fevral ayında da növbəti görüş təşkil olunacaq”.
Əkrəm Həsənov: “Bu görüşün mahiyyəti, uğuru odur ki, vergi orqanının ekspertlərlə müəyyən dialoqu baş tutdu və bundan sonra necə inkişaf edəcəyini görəcəyik”
Məlum görüşdə iştirak edən Əkrəm Həsənov “Bakı-Xəbər”ə açıqlamasında qeyd etdi ki, müzakirə iqtisadçı-ekspertlərlə Dövlət Vergi Xidmətinin əməkdaşlığının əsasının qoyulması üçün təşkil olunmuşdu: “O cümlədən də qanun layihələri olduqda öncədən bizim də məlumatımız olsun ki, vəziyyət son dəyişikliklər kimi alınmasın. Yəni ötən ilin sonunda Vergi Məcəlləsinə edilən dəyişikliklərdən çoxları narazıdır. Bu da başadüşüləndir. Çünki mikrosahibkarların vergi yükü birdən-birə 4 dəfə artıb. Əvvəllər 5 faiz ödəyirdisə, indi 20 faiz ödəyəcək. Mikrosahibkarlar əhalinin xeyli hissəsidir. Vergi orqanının rəhbəri Orxan Nəzərli bu məsələyə aydınlıq gətirdi. Bildirildi ki, mikrosahibkarların vergisinin aşağı olması iri sahibkarların bundan sui-istifadə etməsinə şərait yaradır. Yəni onlar sahibkarlardan istifadə edib və vergilərini azaldırlar. Doğrudan da belə hallar var. Ekspertlərin çoxu vergi orqanının diqqətinə çatdırdı ki, ola bilsin, kimsə qanundan sui-istifadə edir. Niyə buna görə hamının vergi yükü artırılmalıdır? Burada nəsə başqa yollar axtarmaq lazımdır. Son nəticədə belə razılığa gəlindi ki, bu il, yaxud növbəti il üçün Vergi Məcəlləsinə dəyişiklik edilərsə, bu məsələlər nəzərə alına bilər. Ümumiyyətlə, hansı dəyişikliklərin olacağı hələ ki, müzakirə olunmadı. Məlumat üçün bildirim ki, bu, ilk görüş idi. Bu görüşün mahiyyəti, uğuru odur ki, vergi orqanının ekspertlərlə müəyyən dialoqu baş tutdu və bundan sonra necə inkişaf edəcəyini görəcəyik”.
Günel CƏLİLOVA
