"Batmış kreditlər" rəqəmini şişirdən banklar hansı məqsədləri güdür...
Əkrəm Həsənov: “Batmış kredit bank üçün heç də yaxşı hal deyil, ümidsiz kredit bankın kapitalından çıxır”
Azərbaycanın bank sektorunun əsas problemlərindən biri də problemli kreditlərdir. Devalvasiyadan sonra sürətlə artan problemli kreditlər məsələsi hələ də aktual olaraq qalır.
Məlumat üçün bildirək ki, ötən ilin dekabr ayının 1-nə Azərbaycanda problemli kreditlərin həcmi 440.3 milyon manat olub. Problemli kreditlərlə yanaşı, ümidsiz kreditlər də var. Ümidsiz kredit o deməkdir ki, artıq həmin borc geri qaytarılmayacaq. Mərkəzi Bankın qaydasına əsasən, tam təminatlı aktivlər vaxtı 360 günü keçdikdə, qismən təminatlı aktivlər vaxtı 270 günü keçdikdə ümidsiz kimi təsnifləşdirilir. Bu səbəbdən də onlar batmış kredit sayılır. Hər bir bank ilin əvvlində batmış kreditin məbləğini açıqlayır. Bu günlərdə “Unibank KB” ASC kreditlərin 52.7 milyon manatının ümidsiz kredit olması ilə bağlı məlumat yayıb. Qeyd edək ki, bütün banklar batmış və problemli kreditlər haqqında məlumat yayır.
Ancaq ekspertlər bildirir ki, banklar ümidsiz kredit məbləğini bilərəkdən artırır. Maraqlıdır, bankların bu məsələdə nə kimi gizli və açıq maraqları var ki, batmış kredit rəqəmlərini artırırlar?
“Belə olan halda bankın kapitalı azalır, maliyyə göstəriciləri zəifləyir, reytinqi düşür…”
Bank sahəsi üzrə ekspert Əkrəm Həsənov “Bakı-Xəbər”ə açıqlamasında bildirdi ki, əvvəllər bəzi banklar ümidsiz kreditin məbləğini artırmaqda maraqlı idi: “Məlumdur ki, o zamanlar bank sahibləri özləri-özlərinə kredit verib, sonra da həmin vəsaiti batmış kredit kimi təqdim edirdilər. Ancaq indiki dövrdə bu hal mümkün deyil. Batmış kredit bank üçün heç də yaxşı hal deyil. Ümidsiz kredit bankın kapitalından çıxır. Belə olan halda bankın kapitalı düşür, maliyyə göstəriciləri zəifləyir. Bu hal bankın reytinqini aşağı salır”.
Həmsöhbətimiz onu da əlavə etdi ki, ümidsiz kredit problemli kredit sayəsində yaranır. Vətəndaş borcu qaytara bilmir. Bir sözlə, ümidsiz kredit geri qaytarılması demək olar mümkün olmayan kreditlərdir.
Günel CƏLİLOVA
