“Azparkinq”in yeni qaydaları pulsuz parklanmaya imkan verirmi - cəmiyyətin sualı...
Aslan Əsədov: "Qanunverilikdə pulsuz parkinq nəzərdə tutulub"
Məlum olduğu kimi, ötən il avqustun 7-dən etibarən nəqliyyat vasitələrinin parklanmasına görə nəzərdə tutulan qaydalar dəyişib. Yeni qaydalara görə, Bakı şəhərinin mərkəzində parklanmanın 1 saatı 1 manat, digər zonalarda müvafiq olaraq 1 saatı 70, 40, 30 qəpik məbləğində müəyyən edilib.
Yeni təsdiqlənmiş qərara görə, ödənişli parklanma yerlərində nəqliyyat vasitələrinin 15 dəqiqəyədək parklanması üçün ödəniş tələb olunmur. Nəqliyyat vasitəsi 15 dəqiqədən artıq parklandıqda ödəniş tam məbləğdə hesablanır. Nəqliyyat vasitələrinin parklanması üçün saat 22:00-dan saat 07:00-dək, eləcə də həftənin bazar günləri ödəniş tələb olunmur.
Bakıda binaların hardasa 80 faizinin yanındakı parkinqlərdə vəziyyət belədir. O cümlədən, mərkəzi yollarda da analoji vəziyyət hökm sürür. Əksər binaların yeraltı qarajı yoxdur. Böyük binaların yanında da uzaqbaşı 30 avtomobil park edilə bilər, başqa yer yoxdur. Bakıda sakinlər üçün yaşayış yerləri ərazisində pulsuz parklanma yerləri yoxdurmu, olmayacaqmı? Bu problemin həlli ümumiyyətlə necə nəzərdən keçirilir? Bazar günü xaric, şəhərdə pulsuz parklanma yeri varmı, belə bir yer nəzərdə tutulubmu? Pulsuz parklanma yerləri qanunvericilikdə necə nəzərdə tutulub?
"Problem həm də ondadır ki, Bakı şəhərində pulsuz parkinq üçün ərazi yoxdur"
Sözügedən məsələlərə aydınlıq gətirən nəqliyyat məsələləri üzrə ekspert Aslan Əsədov "Bakı-Xəbər"ə açıqlamasında bununla bağlı bir sıra məqamlara toxundu: "Avtomobillərin park edilməsi ilə bağlı məsələlər artıq demək olar ki, mütəmadi gündəm halını alıb. Bunun başlıca səbəbi sovet vaxtı inşa edilən yaşayış binalarının parkinq xidmətinə uyğun olmaması ilə bağlıdır. Çoxmənzilli yaşayış binalarının əksəriyyətində çoxsaylı əhali üçün parkinq xidməti nəzərdə tutulmayıb. Yəni bu binalar birbaşa parkinqsiz idi. Burada yaşayan əhalinin parkinqə çıxışı yox səviyyədə idi. Düzdür, həmin binaların həyətlərində qarajlar var idi, amma onların sayı elə də çox olmurdu. Həyətlərdə müəyyən sayda avtomobillər qala bilərdi, amma binaların daxilində bir dənə də olsun parkinq sistemi yox idi. Daha sonra müxtəlif səbəblərdən Bakıya güclü köç prosesi başladı. Nəticədə necə gəldi binalar tikildi. Binalar arasında məsafə gözlənilmədi, qanunvericilikdə boşluqlar və digər problemlər parkinqlə bağlı problemlərin yaranmasına səbəb oldu. İndi əsas məsələ parkinq qiymətlərinin aşağı-yuxarı olması ilə bağlı deyil. Problem ondadır ki, şəhərin mərkəzi hissələrində torpaq həddən ziyadə bahadır. Bu da özündə onu ehtiva edir ki, hər hansı bir ərazini heç bir sahibkar və yaxud da fiziki, hüquqi şəxs alıb parkinq etməz. Heç buna maraqlı da deyillər. Parkinq probleminin həll yolu ancaq tənzimləmələrdən keçir. Burada da söhbət dövlət tənzimləməsindən gedir. Yəni dövlət pulsuz parkinq üçün ərazi ayıra bilər. Problem həm də ondadır ki, Bakı şəhərində pulsuz parkinq üçün ərazi yoxdur. Söhbət şəhərin mərkəzi rayon ərazilərindən gedir. Ancaq Bakıətrafı kənd və qəsəbələrdə belə ərazilər ola bilər. Digər tərəfdən, son pilot layihə olaraq inşa edilən binalarda mütləqdir ki, Dövlət Şəhərsalma və Arxitektura Komitəsi şərt qoysun. Yəni bina tikən sahibkarlar qarşısında şərt qoymalıdır ki, binanın 2-3 mətəbəsi parkinq olsun. Ən azından bina sakinləri öz şəxsi avtomobillərini park edə bilsinlər. Belə olan halda problemi əsasən həll etmək olar. Başqa bir tərəfdən, şəhərin mərkəzində qiymətlər hər zaman baha olur. Bu da kapitalizm qaydalarından irəli gəlir. Ancaq qanunverilikdə birbaşa yol hərəkəti haqqında hissədə pulsuz parkinq nəzərdə tutulub. Bunun üçün Bakı şəhərində parklanmanın 4 regionu yaradılıb. Lakin məsələ ondadır ki, pulsuz parkinq oturuşmayıb və hələlik qanunla kütləvi tətbiq olunmur".
Vidadi ORDAHALLI
