Hərbi qulluqçuların statusunda köklü islahat başlayır - anons rəsmidir...
İbrahim Rüstəmli: “...Prezident seçkilərindən sonra orduda daha böyük və daha əhəmiyyətli islahatlar aparılacaq”
"Hərbi qulluqçuların statusu haqqında" yeni qanun layihəsi hazırlanacaq. Trend xəbər verir ki, bunu Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərov deyib.
Z.Əsgərov qeyd edib ki, sessiya müddətində komitə sədri və üzvləri Dövlət quruculuğu, inzibati və hərbi qanunvericilik şöbəsi ilə birlikdə layihəni hazırlamalıdır.
Bu qanun layihəsinin hazırlanmasına ehtiyac vardımı? Orada hansı məsələlərin əks olunması vacib olardı? Köklü islahatlar, dəyişikliklər başlayır, buna münasibət necədir?
“Bütün sahələrdə, o cümlədən də orduda islahatlara ciddi ehtiyac var”
Hərbi ekspert İbrahim Rüstəmli “Bakı-Xəbər”ə şərhində bildirdi ki, bu layihənin hazırlanması olduqca vacib və əhəmiyyətli bir məsələdir. “Bəri başdan deyim ki, ordu elə bir qurumdur, orada fasiləsiz olaraq köklü islahatların aparılmasına ehtiyac duyulur. Məsələ burasındadır ki, son dövrlər ordu ilə bağlı neqativ xəbərlərin daha çox yayıldığı bir vaxta qayıtmışıq. Yəni bu məsələni müzakirə edirik. Müzakirələrin əsas mövzusu da orduda şəffaflıq, kadr islahatları, döyüş hazırlığının artırılması istiqamətində daha produktiv addımların atılmasından ibarətdir. Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərovun bu məsələ ilə bağlı mövqeyini ürəkdən dəstəkləyirəm. Fikrimcə, orduda elə bir şəffaf, elə bir ideal mühit yaranmalıdır ki, bu, Azərbaycanın ərazi bütövlüyü, müstəqilliyi və suverenliyi, təhlükəsizliyi üçün məsuliyyət daşıyan bir qurumu daha da irəliyə aparsın. Mən yeni qanun layihəsinin hazırlanması xəbərini çox müsbət qarşılayıram. Düşünürəm ki, xüsusən də Prezident seçkilərindən sonra orduda daha böyük və daha əhəmiyyətli islahatlar aparılacaq. Nəticədə bu islahatlar Azərbaycan ordusunu sözün həqiqi mənasında Səməd bəy Mehmandarovun dediyi kimi, həqiqi vətənpərvərlərin ocağına çevirəcək. Yəni Səməd bəy Mehmandarov bir vaxtlar deyirdi ki, ordu xeyriyyə təşkilatı deyil, bura vətəni, xalqı, dövləti sevən insanlar gəlməli və bu institut ətrafında birləşməlidir. Əlbəttə, buna çox müsbət baxıram. Ümumiyyətlə, islahatlar həmişə aparılmalıdır”-deyə qeyd edən İ.Rüstəmlinin fikrincə, islahatlar təkcə ordu quruculuğu sahəsində deyil, başqa sahələrdə də aparılmalıdır. “Bilirsiz ki, ordu quruculuğu sahəsini cənab Prezident prioritet bir məsələ elan edib və bu məsələni əsas prioritet olaraq son 20 ildir ki, fəaliyyətində də önə çəkib, qabardıb. Bütün sahələrdə islahatlar aparılmalıdır. Bütün sahələrdə, o cümlədən də orduda islahatlara ciddi ehtiyac var. Çünki zaman da, tələblər də dəyişir. Dəyişən zamanın, dəyişən tələbin ümumi fonunda islahatların aparılması da həm zəruridir, həm də dəyərlidir”-deyə İ.Rüstəmli vurğuladı.
İradə SARIYEVA
