Xankəndi və Xocalı sakinləri Prezidentin bu sözlərini necə qarşıladı...
“2024-cü ildə bir neçə yaşayış məntəqəsinə keçmiş köçkünlər, qaçqınlar qayıdacaqlar. İl ərzində Kərkicahan, Malıbəyli, Turşsu kəndləri tam bərpa edilib keçmiş köçkünlərin sərəncamına veriləcək. Eyni zamanda, il ərzində Xocalı və Xankəndi sakinləri də öz evlərinə qayıdacaqlar”.
Bu fikirləri Prezident İlham Əliyev Dünya Azərbaycanlılarının Həmrəyliyi Günü və Yeni il münasibətilə müraciətində deyib.
Dövlət başçısının bu fikirləri Xocalı və Xankəndi sakinlərinin sevincinə səbəb olub.
Fəxrəddin Manafov: “Müstəqil Azərbaycan sakini kimi ölkəmizin hər bir qarış torpağı bizim üçün dəyərlidir”
Xankəndidə anadan olan Xalq artisti Fəxrəddin Manafov “Bakı-Xəbər”ə açıqlamasında qeyd etdi ki, Allah şəhidlərimizə rəhmət eləsin, qazilərimizə can sağlığı versin: “Bu duyğuları bizə yaşatdığına görə Müzəffər Ali Baş Komandanımız İlham Əliyevə təşəkkür edirəm. Müstəqil Azərbaycan sakini kimi ölkəmizin hər bir qarış torpağı bizim üçün dəyərlidir”.
Mahir Rəsuloğlu: “32 ildən sonra əsl sahibləri əzəli torpaqlarına əbədi qayıdacaq və Xocalı göylərində dolaşan şəhid ruhları da əbədi rahatlığa qovuşacaq”
Xocalı rayon sakini, yazıçı-jurnalist Mahir Rəsuloğlu “Bakı-Xəbər”ə şərhində bunları dedi: “Böyük ümidlərlə qarşıladığımız 2023-cü ili xoş əhval-ruhiyyə ilə, onillərdir ürəyimizin qaysaq bağlamayan yarasına məlhəm olan Xocalıya, Xankəndiyə qayıdış müjdəsi ilə yola saldıq. Prezident İlham Əliyevin Dünya Azərbaycanlılarının Həmrəyliyi Günü və Yeni il münasibətilə xalqa müraciətində verdiyi bu xəbər dünyanın harasında yaşamasından asılı olmayaraq bütün soydaşlarımız, xüsusilə də biz qarabağlılar üçün ən böyük hədiyyə oldu. Mən Xocalı rayonundan olan keçmiş məcburi köçkün yazıçı və jurnalist kimi bizə bu xoşbəxtliyi yaşamağı nəsib edən Müzəffər Ali Baş Komandanımıza minnətdarlığımı bildirmək istəyirəm. Tariximizə şanlı zəfər səhifələrinin yazılması, Azərbaycanın ərazi bötüvlüyünün, suverenliyinin bərpa edilməsi, müqəddəs torpaqlarımızda separatizmin kökünün kəsilməsi, doğma yurd həsrətimizin bitməsi, ata-baba yurdlarına yenidən həyatın qayıtması dövlət başçımızın əvəzsiz xidmətlərinin, qətiyyətinin, sarsılmaz iradəsinin və Vətən sevgisinin nəticəsidir.
Şükürlər olsun ki, xəyallarımız, arzularımız reallığa çevrilir. Bu il artıq həsrəti bitənlərin köç karvanları Xocalıya, Xankəndiyə istiqamət götürəcək, 32 ildən sonra əsl sahibləri əzəli torpaqlarına əbədi qayıdacaq və Xocalı göylərində dolaşan şəhid ruhları da əbədi rahatlığa qovuşacaq!
Allah Prezidentimizi qorusun! Tanrıdan məqamı uca şəhidlərimizə rəhmət, qazilərimizə can sağlığı diləyirəm! Müzəffər Ordumuz var olsun!”.
Hikmət Xudiyev: “Soydaşlarımız Xankəndiyə qayıdaraq dədə-baba yurdlarımızın çiçəklənməsinə öz töhfələrini verəcək”
Xankəndi Pedaqoji İnstitutunun məzunu, Əməkdar jurnalist, tarix üzrə fəlsəfə doktoru, istefada olan polkovnik Hikmət Xudiyev “Bakı-Xəbər”ə açıqlamasında bildirdi ki, ötən ilin sentyabr ayında antiterror tədbirləri nəticəsində Xankəndinin işğaldan azad olunması ilə müzəffər Ali Baş Komandan İlham Əliyev özünün “şah əsəri”ni tarixə təqdim etdi. Azərbaycan Ordusu öz qüdrətini bir daha dünyaya nümayiş etdirdi: “Möhtərəm Prezidentimizin Dünya Azərbaycanlılarının Həmrəyliyi Günü və Yeni il münasibətilə müraciətində 2024-cü ildə bir neçə yaşayış məntəqəsinə keçmiş köçkünlərin, qaçqınlar qayıtması, Kərkicahan, Malıbəyli, Turşsu kəndləri tam bərpa edilib keçmiş köçkünlərin sərəncamına verilməsi, il ərzində Xocalı və Xankəndi sakinlərinin də öz evlərinə qayıtmaları ilə bağlı bağlı müjdə verməsini isə bir Xankəndi sakini kimi məni də sevindirir və bütün bunları İlahi ədalətin təzahürü hesab edirəm. Əminəm ki, soydaşlarımız Xankəndiyə qayıdaraq dədə-baba yurdlarımızın çiçəklənməsinə öz töhfələrini verəcək, Azərbaycan xalqının mənfur düşmənimizdən fərqli olaraq qurucu və sülhsehər olduğunu bir daha dünya ictimaiyyətinə nümayiş etdirəcək, yenidən tarixi yurd yerlərimizdə yaşamaqla işğaldan azad edilmiş bütün ərazilərdə Azərbaycanın dövlət suverenleyinin qorunmasında milli məfkurələri ilə yaxından iştirak edəcəklər”.
Günel CƏLİLOVA
