Paşinyan - Baş nazir, ya "Ermənistanın rəisi"?..
![Image](/uploads/posts/2023-12/1703939373_pasinyan2.webp)
Samir Adıgözəlli: “Sarkisyanın gücü yalnız Paşinyana kənardan atmaca göndərməyə çatır”
Ermənistanın sabiq prezidenti Serj Sarkisyan həmin ölkənin Baş naziri olan Nikol Paşinyana “Ermənistanın rəisi” deyərək xitab edir. Təbiidir ki, Sarkisyan bunu təsadüfən etmir.
Ermənistanın üçüncü prezidenti Serj Sarkisyan uzun müddətdir qoruduğu sükutu, nəhayət ki, pozdu. O, çoxdandı ölkənin baş naziri Nikol Paşinyana ittiham yağdıranların cərgəsində yer almırdı.
Məlum olduğu kimi, N.Paşinyan, bir qayda olaraq, Qarabağdan danışanda bölgənin itirilməsinin qaçılmazlığı üzərində dayanır. Eyni zamanda, mövcud xüsusda özündən əvvəlki hakimiyyəti günahlandırmaq yolunu tutur. Nikol bir neçə həftə əvvəl ölkənin İctimai televiziyasında sualları cavablandırarkən də həmin fikirləri təkrarlaması ilə yadda qaldı. Bildirdi ki, 2016-cı ildən sonra Qarabağın əldən çıxması qaçılmaz idi.
Belə olan təqdirdə, Paşinyanı məhz “Ermənistanın rəisi” kimi təqdim etməklə Sarkisyan nə demək istəyir?
İctimai Siyasi Proseslər Beynəlxalq Araşdırmalar Mərkəzinin rəhbəri Samir Adıgözəlli “Bakı-Xəbər”ə açıqlamasında bildirdi ki, Ermənistanın eks-prezidenti Serj Sarkisyan hökumətin hazırki siyasətini tənqid edib: “Eks prezident öz hökumətinin kursu ilə baş nazir Nikol Paşinyanın komandasının bu gün atdığı addımlar arasında ortaq heç nə görmür. O, Paşinyanın Qarabağ məsələsinin xarici qüvvələr tərəfindən İrəvana təzyiq rıçaqı kimi istifadə edilməsi ilə bağlı rezonans doğuran bəyanatına da münasibət bildirib. Sarkisyanın nöqteyi-nəzərindən bu bəyanat hazırkı baş nazirin Qarabağı bilərəkdən qurban verməsi faktının etirafı idi. Keçmiş dövlət başçısı Paşinyanın Ermənistan Respublikasının resurslarının böyük hissəsinin “Dağlıq Qarabağ”a yönəldilməsi ilə bağlı dediklərini də təkzib edib. Sarkisyanın sözlərinə görə, Ermənistan Respublikasının büdcəsinin cüzi bir hissəsi Qarabağa ötürülüb. Siyasi meydanda olan Robert Köçəryanın tərəfdarları ən çox və müntəzəm olaraq Serj Sarkisyanı tənqid edirlər. Onlar açıq şəkildə Serj Sarkisyanı “Nikol Paşinyanı hakimiyyətə gətirmək”də ittiham edirlər. Bu vəziyyəti nəzərə alsaq, əslində belə çıxır ki, Serj Sarkisyan Robert Köçəryanın tərəfdarlarını ona qarşı ittihamlarla “hakimiyyətin dəyirmanına su tökməməyə” çağırır.
Başqa sözlə, Köçəryanın tərəfdarları Sarkisyanı 2018-ci ili “planlaşdırmaq”da ittiham edirlərsə, Sarkisyan Köçəryana və onun ətrafına eyham vurur ki, bu gün onlar Nikol Paşinyanın hakimiyyətini saxlayırlar, həmin hakimiyyətin mövqelərinin qorunub saxlanmasına töhfə verirlər. Faktiki olaraq, Serj Sarkisyanı devirən Paşinyan olub. Şərti adı “Qarabağ klanı” olan bu adamlar nəyin bahasına olursa-olsun, onu hakimiyyətdən salmaq istəyir. Ancaq gücləri çatmır. Hətta müharibəni uduzsa belə, xalq yenə onu hakimiyyətə gətirdi. Sarkisyanın gücü yalnız Paşinyana kənardan atmaca göndərməyə çatır. Buna görə də onu öz vəzifəsinin adı ilə deyil, “rəis” deyə çağırır”.
Xatırladaq ki, Ermənistanın baş naziri Nikol Paşinyan 2023-cü ilin noyabrında parlamentdə Qarabağ məsələsinin Ermənistan dövlətçiliyinin möhkəmlənməsinə qarşı alət kimi istifadə edildiyini bildirmişdi. Onun sözlərinə görə, müəyyən qüvvələr (baş nazir kimdən danışdığını dəqiqləşdirmədi) Qarabağ məsələsindən erməni dövlətçiliyinin inkişafına mane olmaq üçün müstəqil Ermənistan Respublikasının mövcudluğunun faktiki və ya de-yure dayandırılması anına qədər bir rıçaq kimi istifadə ediblər.
Məhəmmədəli QƏRİBLİ