Paşinyan Avrasiya İttifaqını həm də hədələdi – “Aİİ dağılıb gedər”...
Qulamhüseyn Əlibəyli: "Paşinyan narahatdır ki, bir müddət sonra Aİİ siyasi bir quruma çevrilə bilər"
Yanvarın 1-dən Aİİ-yə sədrliyi təhvil alacaq Paşinyan qurumun İqtisadi Şurasının iclasında çıxışında onun siyasiləşməsini istəmədiyini və bu kimi meyllərdən narahatlığını dilə gətirib:
"Avrasiya İqtisadi İttifaqı (Aİİ) iqtisadi birlik olduğundan, onun siyasi və geosiyasi gündəmi olmamalıdır. Ermənistanın sədrliyinin Aİİ haqqında Müqavilənin imzalanmasının onuncu ildönümü ilə üst-üstə düşməsi simvolikdir. Bu da qurumun siyasi, daha çox geosiyasi gündəmi olmayan iqtisadi birlik olması prinsipinə əsaslanan postulatdır. Avrasiya inteqrasiyasını siyasiləşdirmək cəhdlərinin qarşısını almağa çalışaraq, bunu bu cür dərk etməyə və bu kontekstdə iqtisadi əməkdaşlığımız çərçivəsində qarşılıqlı əlaqəni inkişaf etdirməyə davam edirik".
Paşinyanın sözlərinə görə, əsas ticarət və inteqrasiya azadlıqları siyasi mülahizələrə görə məhdudlaşdırıla bilməz və məhdudlaşdırılmamalıdır:"Bu, mütləq birləşmənin fundamental prinsiplərinin korroziyasına gətirib çıxaracaq".
Maraqlıdır, Nikol Aİİ-nin siyasiləşməsindən niyə bu qədər narahatdır?
"Bu isə üzv ölkələrin üzərinə yeni öhdəliklərin qoyulması deməkdir"
Məsələ ilə bağlı "Bakı-Xəbər"ə açıqlama verən sabiq millət vəkili, hüquqşünas Qulamhüseyn Əlibəyli bunu bir sıra amillərlə əlaqələndirdi: "Adından göründüyü kimi, Aİİ qeyri-siyasi xarakterli təşkilatdır. Yəni iqtisadi məsələlərlə məşğul olan bir qurumdur. Bu baxımdan Paşinyan maksimum çalışır ki, bu qurumun iqtisadi dividendlərindən faydalansın. Həmçinin hesab edir ki, həmin təşkilatdan siyasi məqsədlər üçün istifadə etmək olmayacaq. Düzdür, başqa təşkilatlardan siyasi məqsədlər üçün istifadə etməyə dəfələrlə cəhd göstərilib. O cümlədən, beynəlxalq təşkilatlardan, KTMT-dən bu məqsədlə istifadəyə cəhdlər olub, amma nəyəsə nail olmayıblar. Ona görə də belə açıqlamalarla çıxış edir. Bu, əslində Aİİ-nin nizamnaməsinə, fəaliyyət istiqamətlərinə uyğun olan bəyanatdır. Lakin Ermənistan lazım gələndə bütün beynəlxalq təşkilatlardan, birliklərdən öz siyasi məqsədləri üçün istifadə etməyə çalışır. Çünki dəfələrlə bunun şahidi olmuşuq. Baxmayaraq ki, Paşinyanın çıxışında bu amillər inkar olunur. Aİİ-yə hansı ölkənin rəhbərlik etməsi çox məsələni həll etmir. Bir sıra məsələlərdə sədirlik formal xarakter daşıyır. Hamıya məlum olan həqiqət odur ki, Aİİ-də əsas söz sahibi Rusiyadır. Çünki bu təşkilatın yaradıcısıdır. 2014-cü ildə Aİİ yaradılanda təşkilatın adına iqtisadi sözünün daxil edilməsində Qazaxıstanın sabiq dövlət başçısı Nursultan Nazarbayevin müstəsna xidmətləri olub. Məhz onun təkidli səyi sayəsində qurum iqtisadi təşkilat kimi fəaliyyət göstərməyə başlayıb. Paşinyan narahatdır ki, bir müddət sonra Aİİ siyasi bir quruma çevrilə bilər. Bu isə üzv ölkələrin üzərinə yeni öhdəliklərin qoyulması deməkdir. Məhz bu səbəbdən indidən belə açıqlamalarla çıxış etməklə bunu önləmək istəyir".
Vidadi ORDAHALLI
