Dünyada COVİD-in çox təhlükəli ştammı yayılır - tətil günlərində bunu unutmayın...
Adil Qeybulla: “Mutasiya ştammlarının müəyyən epidemik ocaqlar yaratdığı göz qabağındadır”
Dünya ölkələrində COVID-19 virusunun "JN.1" ştammı yayılıb. Bu barədə Ümumdünya Səhiyyə Təşkilatı (ÜST) məlumat yayıb. Bildirilib ki, bu ştamm diqqətə alınması vacib virusdur. Hələ ki, bu virus əhalisi çox olan ölkələrdə - Hindistan, Çin və ABŞ-da aşkar edilib. "JN.1" ştammının yayıldığı ABŞ-da xəstə sayının artması qaçılmazdır.
İngiltərənin Səhiyyə Təhlükəsizliyi Agentliyi bu virusun koronavirusa yoluxanların bəzilərində aşkarlandığını bildirib. "JN.1"in koronavirusun başqa ştammlarına nisbətən daha təhlükəli olub-olmadığı hələ ki, araşdırılmayıb.
Qeyd etdiyimiz kimi, xarici ölkələrdə adıçəkilən virus sürətlə yayılır. Görəsən, bu xəstəliyin ölkəmizdə də yayılma ehtimalı varmı? Nəzərə almaq lazımdır ki, bir neçə gündən sonra ölkəmizdə bayram tətili başlayacaq. Belə olan halda kütləvi istirahətlərə gediləcək, rayonlara, otellərə üz tutanlar çox olacaq.
Maraqlıdır, yeni ştammdan qorunmaq üçün nə edilməlidir? Yenidən vaksinləşməyə ehtiyac varmı?
“JN.1” ştammının ölkəmizdə də yayılması realdır, ancaq bu vurusun elə də böyük formada olacağı gözlənilmir”
Professor, tibbi ekspert Adil Qeybulla “Bakı-Xəbər”ə açıqlamasında qeyd etdi ki, COVİD-19 pandemiyası artıq bitib. Bu pandemiyanın yenidən baş verməsi mümkün deyil. Çünki infeksiya zənciri qırılıb, xeyli insan vaksin olunub və yoluxduğu üçün immunitet yaranıb. Ancaq mutasiya davam edir: “Mutasiya ştammlarının müəyyən epidemik ocaqlar yaratdığı göz qabağındadır. Bu səbəbdən də mümkün qədər qorunmaq tələb olunur. Karantin qaydalarına əməl olunmalıdır. Insanların kütləvi toplaşdığı yerlərdə maska taxılması məsləhətdir. Xəstə şəxslərin insanların sıx toplaşdığı yerdə olmaması daha uyğundur. Bundan əlavə, insanlar gigiyenik qaydalara əməl etməlidir”.
Həmsöhbətimiz hesab edir ki, yeni "JN.1" ştammının ölkəmizdə də yayılması realdır. Ancaq bu vurusun elə də böyük formada olacağı gözlənilmir: “Hazırda Azərbaycanda JN.1 adlı virusa tutulan yoxdur. Bununla bağlı Səhiyyə Nazirliyi tərəfindən məlumat verilməyib. Bele bir stiuasiya yaranarsa, mütləq xaricdən gələnlər yoxlanmalıdır. Əvvəlki kimi vaksinasiyaya ehtiyyac yaranacaq. Burda da hər infeksiyadan necə qorunurduqsa, həmin təlimatlara əməl etməliyik. Məsələn, maskadan istifadə etmək, məsafə gözləmək, əllərimizi təmiz saxlayaraq tez-tez yumaq və s. Böyük narahatlığa isə əsas yoxdur".
Günel CƏLİLOVA
