Könüllü hərəkat iştirakçılığı və gənclərin mənəvi inkişaf yolu...
Azərbaycanda geniş vüsət almış könüllülər hərəkatının aparıcı gücü məhz gənclərdir. Prezident İlham Əliyevin əsas fəaliyyət istiqamətlərindən biri də potensiallı, bacarıqlı, savadlı və istedadlı gənclərin aşkar edilməsidir.
Gənclərə daim dəyər verib, dəstək olan cənab Prezidentimiz sadaladığım keyfiyyətlərə malik gənclərin müəyyənləşdirilməsi üçün “ASAN” könüllüləri hərəkatını başladıb. İstisna deyil ki, Prezidentin fərmanından öncə də bəzi özəl müəssisələrdə gənclərin bacarıq səviyyələrini müəyyənləşdirmək, şəxsi keyfiyyətlərini təkmilləşdirmək məqsədi ilə könüllülük fəaliyyəti həyata keçirilirdi, lakin könüllülük fəaliyyətinin geniş hərəkat formasında vüsət alması cənab Prezidentin başlatdığı Könüllülər hərəkatı ilə bağlıdır. Cənab Prezidentin fərmanına əsasən 2013-cü ildə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin (ASAN Xidmət) yanında aktiv və konstant könüllü təşkilat olan “ASAN” Könüllüləri Təşkilatı (AKT) yaradıldı. Gənclər müvafiq mərkəzlərdə könüllülüklə bağlı müsahibədən keçirlər məqbul hesab edilən şəxslər könüllü olaraq ilkin təlimdən keçərək fəaliyyətə başlayırlar. Əlavə olaraq bu fəaliyyət üçün gənc könüllü ilə “ASAN” könüllülər təşkilatı arasında qarşılıqlı öhdəliklərin qeyd edildiyi müqavilə imzalanır. Fəaliyyəti dövründə könüllülər rəhbər şəxslərlə subordinasiya qaydalarına riayət etməyi, işgüzar geyim qaydasını, düzgün ünsiyyət formasını öyrənib, təkmilləşdirillər.
Ölkəmizin sürətli inkişafına böyük təsir göstərib…
“ASAN xidmət” könüllüləri təşkilatının sədri olmuş Səbinə Cabbarova hesab edir ki, ölkəmizdə gəncliyin inkişafı, gənclərin dünya birliyinə inteqrasiyası və bu istiqamətdə əhəmiyyətli tədbirlərin keçirilməsi dövlət siyasətinin prioritetlərindəndir: “Ölkə başçısının gəncləri düzgün yola istiqamətləndirməsi, gəncliyə xüsusi diqqət və qayğı göstərməsi ölkəmizin sürətli inkişafına böyük təsir göstərib. Eyni zamanda, gənclər siyasəti gənclərin yeni inkişaf modeli kimi təqdim edilən könüllülük hərəkatının geniş vüsət almasına şərait yaradıb. Ölkəmizdə keçirilən mühüm beynəlxalq tədbirlərdə könüllülər öz vəzifələrini layiqincə yerinə yetirirlər. Gənclər siyasətinin düzgün həyata keçirilməsi dövlətin cəmiyyətdəki dayaqlarını möhkəmləndirməklə yanaşı, onun həyata keçirməyə çalışdığı siyasətin dəstəklənməsinə və müvəffəqiyyətlə reallaşmasına gətirib çıxarır. Çünki gənclər dövlətin gələcək idarəçiləridir. Azərbaycan Prezidenti İlham Əliyev gənclərin potensialından tam və düzgün istifadə olunması, onların faydalı məşğulluğunun, dövlət idarəçiliyi sistemində iştirakının təmin edilməsi məqsədilə mütəmadi olaraq Fərman və sərəncamlar imzalayır. Gənclərin sosial müdafiəsi, məşğulluğunun təmin edilməsi, yaradıcılıq axtarışlarının stimullaşdırılması, milli ruhda təlim-tərbiyəsi, hərbi-vətənpərvərlik tərbiyəsinin gücləndirilməsi, sağlam həyat tərzinin təbliği istiqamətində çoxsaylı tədbirlər həyata keçirilib”.
Heç şübhəsiz, bütün növ tədbirlərin həyata keçirilməsində könüllülər əsas qüvvədir
Prezident İlham Əliyev bildirib ki, könüllülər hərəkatı Azərbaycanda artıq genişlənir və bu hərəkat bizdə “ASAN xidmət” mərkəzlərində başlayıb: “Bütövlükdə “ASAN xidmət” yarandıqdan bugünə qədər bəlkə də on minlərlə könüllü bu mərkəzlərdə çalışıb və sonradan onların bir çoxu həyatda özünü təsdiqləyib. Könüllülük də digər ənənəvi davranış qaydalarının yeni bir təzahürüdür. Ona görə mən bu hərəkata çox müsbət baxıram, gənclərin təşkilatlanması, bir amal uğrunda birləşməsi, cəmiyyətin saflaşması və kadr potensialının hazırlanması nöqteyi-nəzərdən. Ona görə əminəm ki, Azərbaycanda bu hərəkatın çox gözəl gələcəyi var”.
İllər keçir, zaman ötür, cox şeylər dəyişir. Amma "Gənclər bizim gələcəyimizdir” şüarı həmişə dəyişməz və aktual olaraq qalır. Çünki hər bir dövlətin gələcəyi yetişməkdə olan gənc nəsildən, onun fiziki və mənəvi sağlamlığından, Vətəninə bağlılığından asılıdır. Bununla bağlı ölkəmizdə uşaq və gənclərin həyatını dəyişən, onlara hərtərəfli inkişafına stimul verən siyasət mövcuddur.
Gənclərin mənəvi-fiziki inkişafı ilə bağlı indiyə qədər bir sıra sənədlər qəbul edilib. Prezident İlham Əliyevin bu sahəyə olan diqqəti özünü 2007-ci ilin "Gənclər ili" elan edilməsində də göstərdi. Gənclərin hərtərəfli inkişafını, cəmiyyətin həyatında fəal iştirakını bir qədər də stimullaşdırmaq məqsədilə dövlət başçısı 2009-cu ilin iyun ayında "Könüllü fəaliyyət haqqında” qanunu imzaladı və bununla da könüllü – öz istəyi əsasında əvəzi ödənilməyən ictimai-faydalı fəaliyyətlə məşğul olmaq istəyən gəncləri özundə cəmləşdirən, dövlət büdcəsindən maliyyələşən cəmiyyət və təşkilatlar yaradıldı. Sənədə görə, könüllü fəaliyyət əlillərə, kimsəsizlərə, qocalara, aztəminatlı ailələrə, qaçqınlara və məcburi köçkünlərə kömək edilməsi, insanpərvərliyin və dözümlülüyün təbliği, hüquqi və mədəni maarifləndirmə, uşaq və gənclərin təhsili, tərbiyəsi, fiziki və əqli inkişafı, xəstəliklər və epidemiyalar barədə məlumatlandırma, sağlam həyat tərzinin təbliği üzrə həyata keçirilir. Həmçinin ətraf mühitin mühafizəsi, tarix və mədəniyyət abidələrinin, mədəni və mənəvi irsin qorunması, silahlı münaqişələr, təbii fəlakətlər, sənaye qəzaları, yanğınlar, epidemiyalar, epizootiyalar və digər fövqəladə halların nəticələrinin aradan qaldırılması, o cümlədən fövqəladə hallar nəticəsində zərər çəkmiş şəxslərə yardım göstərilməsi, idmanın inkişafı və dəgər istiqamətlər də sənəddə yer alıb. Heç şübhəsiz, bütün növ tədbirlərin həyata keçirilməsində könüllülər əsas qüvvədir.
Məhəmmədəli QƏRİBLİ
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
