ABŞ-la İran bir-birini açıq müharibə ilə hədələdi...
Yaxın Şərqdə davam edən müharibə İsrail və ABŞ-ın İranla münasibətlərini daha da gərginləşdirməkdədir. Tərəflər bir-birini getdikcə daha çox savaşla hədələyirlər. Belə görünür ki, İsrail Qəzza zolağı ilə bağlı məqsədinə çatmaqa israrlıdır. Bu isə İranı ciddi şəkildə narahat edir.
Qeyd edək ki, İsrail ordusu Qəzza şəhərini tamamilə mühasirəyə alıb və anklavı yarıya bölüb.
İsrail Silahlı Qüvvələrinin sözçüsü Daniel Haqari məsələ ilə bağlı bildirib: "Artıq Qəzzanın şimalı və cənubu var. İsrail ordusu hələ də mülki vətəndaşların Qəzzanın şimalını tərk edərək cənuba getməsinə icazə verəcək". Qeyd edək ki, bundan öncə ÇAXAL-ın Qəzzanın dənizdən sahilinə çatdığı deyilirdi.
İsrail hərbçiləri Qəzza zolağında HƏMAS hərəkatına qarşı əməliyyat zamanı anklavın sahillərinə çatıb və orada möhkəmlənib. İsrail ordusunun mətbuat xidməti bu xüsusda bildirir: "Son bir həftə ərzində quru əməliyyatlarının genişləndirilməsi çərçivəsində 36-cı diviziya Qəzza zolağının şimalında hərəkət edib və Qəzza sahili boyunca mövqelərə çatıb". İsrail Müdafiə Qüvvələrinin mətbuat xidməti ölkənin müdafiə qüvvələri Qəzza zolağında Fələstinin HƏMAS terror təşkilatının mühüm "qalasının" ələ keçirildiyini açıqlayıb. Məlumatda qeyd olunur: "Givati briqadasının əsgərləri baza üzərində nəzarəti bərqərar edib. Orada çox sayda əməliyyat xəritələri və komanda sənədləri, o cümlədən terror təşkilatının hazırkı komandirlərinin şəxsi məlumatları aşkar edilib. Əldə edilmiş sənədlər və kəşfiyyat məlumatları İsrailin HƏMAS terrorçularına qarşı mübarizədə uğuru üçün kritik ola bilər".
İsrail Müdafiə Qüvvələrinin Baş Qərargah rəisi Herzi Halevi qeyd edir ki, ölkə hərbçiləri ölkənin şimal sərhədində hər an hücuma keçməyə hazırdır: "Biz hər an şimalda hücuma keçməyə hazırıq, bunun baş verə biləcəyini anlayırıq və burada müdafiənin güclü olduğuna inanırıq". Məhz belə bir vaxtda İranın müdafiə naziri briqada generalı Məhəmməd Rza Aştiani ABŞ-ı təhdid edərək bildirib ki, Vaşinqton Qəzza zolağında müharibəni dayandırmasa, ona ciddi zərbə vurulacaq: "Amerikalılara tövsiyəmiz odur ki, İsrail və Fələstin arasındakı müharibəni dərhal dayandırsınlar və atəşkəsi təmin etsinlər, əks halda ABŞ ciddi zərbə alacaq". Xatırladaq ki, oktyabrın 7-də HƏMAS-ın İsrailə hücumundan və ardınca İsrailin Qəzzanı intensiv bombardmanından sonra İranın hansı münasibət sərgiləyəcəyi maraq doğururdu. Aştianinin bəyanatına oxşar fikri İranın xarici işlər naziri Hüseyn Əmir Abdullahian da səsləndirib: "Yaxın Şərqdəki müharibə ən yaxın vaxtda başa çatmasa, idarəolunmaz vəziyyət yaranacaq". O bildirib ki, vəziyyətə görə ABŞ məsuliyyət daşıyır: "ABŞ hazırda baş verənlərə, o cümlədən ölümlərə görə məsuliyyət daşıyır. ABŞ bu məsuliyyətdən yayına bilməz". O, Fələstin müqavimət hərəkatı və bölgədəki digər müqavimət qruplarının düşmənlə qarşıdurmaya hazır olduqlarını açıqlayıb. Vaşinqton isə açıq şəkildə bəyan edib ki, üçüncü tərəflər münaqişələrə qarışmamalıdır. Bu fobnda ABŞ-ın Aralıq dənizinin şərqində iki təyyarədaşıyan gəmisi və müxtəlif döyüş gəmiləri yerləşdirilib. Vaşinqtondan bildirilib ki, bu qruplar İran və "Hizbullah"ı müharibəyə girmək cəhdindən çəkindirmək məqsədi daşıyır. ABŞ həmçinin bölgədəki 2000 hərbçidən ibarət çevik reaksiya qüvvəsini hazır vəziyyətə gətirib. ABŞ Federal Təhqiqat Bürosunun (FTB) direktoru Kristofer Rey isə bildirib ki, Fələstin-İsrail münaqişəsinin kəskinləşməsi fonunda HƏMAS radikal hərəkatının ABŞ-a hücum edə biləcəyi istisna olunmur: "HƏMAS və ya başqa bir xarici terror təşkilatının burada, torpaqlarımızda hücumlar həyata keçirmək üçün indiki münaqişədən istifadə edə biləcəyini nəzərə almaya bilmərik və nəzərə alırıq". Onun sözlərinə görə, FTB HƏMAS və onunla əlaqəli təşkilatların fəaliyyətini izləyir. Kristofer Rey xatırladıb ki, il ərzində ABŞ-da terror təhlükəsi səviyyəsi artıb, Yaxın Şərqdəki münaqişə isə ABŞ-da amerikalılara hücum təhlükəsini tamamilə başqa səviyyəyə qaldırıb. ABŞ daxili təhlükəsizlik naziri Alexandro Mayorkas isə deyib ki, Fələstin-İsrail münaqişəsinin başlaması ilə Birləşmiş Ştatlarda, o cümlədən təhsil müəssisələrində antisemitizmin artması müşahidə olunur. ABŞ bütün bunlarda İran izinin olduğunu da açıq bəyan edir. Bunlar fonunda "Hizbullah" lideri Həsən Nəsrullahın dedikləri də xüsusi diqqət cəlb edir. O vurğulayır ki, ABŞ "Hizbullah"ın İsrailə qarşı əməliyyatları davam etdirəcəyi təqdirdə İranı bombalayacağı barədə xəbərdarlıq edib. Nəsrullah ABŞ-ın xəbərdarlığına cavab olaraq deyib: "Bizim müqavimətimizi təhdid etməyə necə cürət edirsiniz? Aralıq dənizindəki gəmiləriniz bizi qorxutmur. Əmin ola bilərsiniz ki, biz onları hədəfə ala bilərik". Qeyd edək ki, Pentaqon İranın proksi qüvvələrinin Amerika bazalarına qarşı hücumlarına cavab olaraq SEPAH-ın Suriyada istifadə etdiyi obyektləri hədəfə alıb. ABŞ prezidenti Co Bayden ölkəsinin bölgədəki qüvvələrinə hücumların davam edəcəyi halda İrana ağır zərbələr endiriləcəyi barədə xəbərdarlıq edib. İran parlamentinin Milli təhlükəsizlik və xarici siyasət komissiyasının üzvü Mahmud Abbaszadə Meşkini isə bildirir: "İran Həsən Nəsrullahın İsrailə xəbərdarlığını vaxtında və ciddi hesab edir. Həsən Nəsrullah çox vaxtında xəbərdarlıq edib. Nəsrullahın xəbərdarlığı ciddidir və o, heç kimlə zarafat etmir".
Tahir TAĞIYEV
